Хөвсгөл аймгийн Тариалан суманд хоёр настай амиа алдсан харамсалтай хэрэг гараад байгаа. Тодруулбал, Тариалан сумын Баянхошуу багийн Сайхан мод хэмээх газраас есдүгээр сарын 17-нд хоёр настай хүү сураггүй болсон байдаг. Хүүг эрэн хайх эрлийн ажиллагаанд Онцгой байдлын газар, цагдаа, ШШГГ, Хүүхдийн байгууллагын алба хаагчид, орон нутгийн удирдлагууд, иргэд, төрийн албан хаагчид эрэлч нохдын хамт оролцсон. Гэвч харамсалтай нь хүүгийн цогцсыг найм хоногийн дараа олсон байдаг.

        Уг харамсалтай хэрэг монголчуудын сэтгэлийг эмзэглүүлээд байгаа. Хүүгийн ээж “приус-20” маркийн автомашинтай Сайхан мод гэх газар руу хоёр хүүхэдтэйгээ очсон. Таван сартай, хоёр настай хүү нь машин дотор унтаад үлдсэн. Ингээд мод бэлтгэж байсан нөхөр, хадам ааваасаа шуудай аваад, модны үйс түүгээд 20 орчим минутын дараа машин дээрээ ирэхэд хоёр настай хүү нь алга болсон байсан. Талийгаач хүү өмнө нь таван сартай дүүтэйгээ машинд үлддэг байсан. Ингэхдээ хэзээ ч дүүгээ орхиж явж байгаагүй гэдгийг түүний ээж ярьдаг. Хүү машины арын суудал дээр унтаж байсан бөгөөд жолооч талын хаалгаар гарсан байх магадлалтай. Машины хаалга хаалттай, таван сартай дүү нь унтаж байсан гэх. Ингээд хүүгийн ээж мод түүж явсан хүмүүст хэл дуулгаж, ойр орчимд хайсан боловч олоогүй. Эцэст нь, сумын онцгой байдалд дуудлага өгч, эрлийн ажиллагааг эхлүүлсэн. Харамсалтай нь, өргөн бүрэлдэхүүнтэйгээр хүүг найм хоног хайсан ч эсэн мэнд олж чадаагүй юм.

ХҮҮ ТҮРҮҮЛЭГЭЭ ХАРААД УНАСАН БАЙДАЛТАЙ ӨВСӨН ДООРООС ОЛДЖЭЭ

       Хүүгийн цогцсыг машин байсан газраас 9-10 км-ийн зайнаас олсон гэдгийг албаныхан мэдээлээд байгаа. Цогцос олдсон газар нь эрлийн ажиллагааны эхний өдрүүдэд самналт хийсэн газар байжээ. Хүүгийн цогцос түрүүлэгээ хараад унасан байдалтай, өвсөн доороос олджээ. Урьдчилсан байдлаар ил харагдах шарх байгаагүй гэдгийг эх сурвалж мэдээлж байгаа юм.

Хүүгийн ээж С.Мягмарсүрэн цогцос олдохоос хэд хоногийн өмнө буюу эрлийн ажиллагаа үргэлжилж байх үед “Манай Хөвсгөл аймгийн Тариалан суманд дөрөв дэх жилээ өвөлжих гэж байна. Бид саахалтынхантайгаа мод бэлтгэхээр ярилцаад аав, ах хоёрынхоо араас бид хүүхдүүдтэй явсан юм. Биднийг мод бэлтгэх газар ирэхэд хоёр настай хүү, таван сартай охин минь унтаж байсан. Нөхөр маань мод бэлтгэхээр явсан байсан. Би хоёр хүүхэдтэйгээ үлдсэн юм. Хүүхдүүд минь унтаж байсан болохоор машиныхаа ойролцоо үйс түүхээр шуудай асуухаар 200-аад метрын ойролцоо байсан машин дээр очиж шуудай асуусан юм. Шуудай байхгүй ажиллахгүй хөрөөг машиндаа тавиарай гэхээр нь тэр хөрөөг нь аваад ирэхэд хүү минь алга болчихсон байсан. Тэгэхэд би хамгийн удаандаа 20 минут л явсан. Тэгээд би хэсэг хайж, гүйсэн. Аавыг нь харанхуй болохоос өмнө хүмүүст мэдэгдэе гэхэд нь утсаа аваад сүлжээ барих газар руу явсан. Тэгээд аймгийн Онцгой байдлын газарт 16:55 цагийн үед мэдэгдсэн. Хүүг минь алга болсныг мэдсэн ойр дотны хүмүүс маш хурдан ирсэн” гэж яриа өгсөн байдаг.

Гэв харамсалтай нь, ийн ярьснаас хойш дөрвөн хоногийн дараа хоёр настай хүүгийн цогцсыг олсон байдаг.

ХҮҮГИЙН ЦОГЦОСТ ХИЙСЭН ЗАДЛАН ШИНЖИЛГЭЭНИЙ УРЬДЧИЛСАН ХАРИУ  ӨНӨӨДӨР ГАРНА

      Хүүгийн цогцост задлан шинжилгээ хийсэн шүүх шинжилгээний урьдчилсан хариу өнөөдөр гарна. Тодруулбал, хүүгийн цогцсыг олоод 14 хонож байна. Харин шүүх шинжилгээний эцсийн хариу долоо хоногийн дараа юу аравдугаар сарын 16-нд гарах гэнэ. Одоогийн байдлаар хүүгийн шүүх шинжилгээний урьдчилсан хариуг ар гэрийнхэнд нь болон холбогдох байгууллагуудад мэдэгдээгүй байгаа талаар эх сурвалж мэдээллээ.

Тодруулбал, эх сурвалжийн мэдээлснээр “Хүүгийн аав, ээж хөдөө гэртээ байгаа бөгөөд утас нь унтраатай байгаа. Албаныхан хэд хэдэн удаа залгаж, мэдээлэл солилцохоор холбогдсон ч хариу өгөхгүй байгаа. Ийм учраас шүүх шинжилгээний хариу урьдчилсан байдлаар яаж гарсныг ар гэрийнхэн нь мэдээгүй. Багийн дарга, сумын удирдлагууд, улсын бүртгэгч нар ч мэдэхгүй байгаа юм билээ. Хүүгийн цогцос олдож, ажил явдал болсны дараа хүүгийн аав, ээж хөдөө гэр рүүгээ явсан. Том хоёр хүүхдээ сургуулиас нь чөлөө авсан” гэлээ.

ШҮҮХ ШИНЖИЛГЭЭНИЙ ХАРИУ ГАРААГҮЙ УЧРААС ХҮҮГИЙН АР ГЭРИЙНХЭН НАС БАРСНЫ ГЭРЧИЛГЭЭ, ОРШУУЛГЫН ЗАРДАЛ АВЧ ЧАДААГҮЙ БАЙНА

       Шүүх шинжилгээний хариу гараагүй учраас хүүгийн нас барсны гэрчилгээ гараагүй, улсын бүртгэл, оршин суух багаас хасалт хийгдээгүй байгаа талаар Тариалан сумын Баянхошуу багийн дарга н.Соёлмаа хэллээ.

Нас барсны гэрчилгээ хийгдээгүй, задлан шинжилгээний хариу гараагүй учраас хүүгийн ар гэрт олгогдох оршуулгын зардал, бусад тэтгэмж ч олгогдоогүй байгаа аж.