БАГШ НЬ ТАЛИЙГААЧИЙГ “ДААЛГАВРАА ХИЙГЭЭГҮЙ БАЙНА” ГЭХ ШАЛТГААНААР ЗОДСОН УУ 

      Баянхонгор аймгийн 11 дүгээр ангийн сурагч багшдаа загнуулсаны улмаас өндрөөс унаж, амиа алдсан гэх харамсалтай мэдээлэл есдүгээр сарын 12-нд гарсан. Тодруулбал, хүү ялгаварлан гадуурхалтад өртөж, амиа хорлосон байж болзошгүй нөхцөл байдал тогтоогдож, Баянхонгор аймгийн цагдаагийн газраас тухайн хэргийг шалгаж байгаа аж. Талийгаач нас бардаг өдрөө хичээлдээ очсон байдаг. Гэтэл нэг багш нь гэрийнхээ даалгаврыг хийгээгүй байна гэх шалтгаанаар ангийнхнийх нь өмнө зодсон гэх. Тухайн үед ангийнхан нь “Даалгавраа хийхгүй бол багшид зодуулах нь зөв шүү дээ” гэж тухайн хүүг хэл амаар доромжилж, шоолсон гэдэг. Хүү хичээлээ тараад ... байрны долдугаар давхраас үсэрч, амиа алдсан гэдгийг зарим эх сурвалжууд хэлсэн юм. 

      Талийгаач өмнө нь өөр сургуульд сурдаг байхдаа ялгаварлан гадуурхалтад өртдөг байсан гэх. Тиймээс энэ жил сургуулиа сольж, тус сургуулийн арваннэгдүгээр ангид элсэн ороод 12 хоногийн дараа амиа хорлосон харамсалтай хэрэг гараад байгаа юм. 

ЦЕГ: БАГШТАЙГАА МУУДАЖ, ӨНДРӨӨС ҮСЭРЧ АМИА АЛДСАН ГЭХ СУРАГЧИЙН ХЭРГИЙГ ШАЛГАЖ БАЙГАА 

      Хэргийг хэрхэн шийдсэн талаар ЦЕГ-ын мэргэжилтнээс тодруулахад “Есдүгээр сарын 12-нд өсвөр насны хүүхэд өндрөөс унаж, ами алдсан нь цагдаагийн газар бүртгэгдсэн. Хүүгийн нас барсан шалтгааныг тогтоохоор шалгалтын ажиллагаа үргэлжилж байгаа. Тиймээс багшийн болон үе тэнгийнхний дээрэлхэлтийн улмаас хүүг нас барсан гэх хэлэх нь эрт байна. Шалгалтын ажиллагаа бүрэн дууссны дараа дараах мэдээллийг өгч болно” гэсэн юм. 

ЯЛГАВАРЛАН ГАДУУРХАХ ГЭМТ ХЭРЭГ ГЭЖ ЮУ ВЭ

        Ялгаварлан гадуурхах гэмт хэрэг: Эрүүгийн хуулиар хориглосон үйлдэл (“үндсэн гэмт хэрэг”) ба хохирогчийг тодорхой мөн чанараар нь ялгаварласан ялгаварлалтад үндэслэсэн (“ялгаварлан гадуурхах сэдэлт”) үйлдлийг хэлнэ. Ялгаварлан гадуурхах сэдэлт нь хохирогчийн ямарваа нэг бүлгийн харьяаллыг нь илтгэх гүн, үндсэн мөн чанар болох үндэс угсаа, шашин, хэл, хүйс, бэлгийн чиг баримжаа, хөгжлийн бэрхшээл, үзэл бодол, мэргэжил гэх мэт мөн чанараар нь ялгаварлах сэдэлт юм.

Олон улсын хэм хэмжээ:

• Иргэний болон улс төрийн эрхийн тухай олон улсын пакт (1966)

• Эдийн засаг, нийгэм, соёлын эрхийн тухай олон улсын пакт (1966)

• Арьс үндсээр алагчилах үзлийн бүх хэлбэрийг устгах тухай олон улсын конвенц (1965)

• Хөгжлийн бэрхшээлтэй хүмүүсийн эрхийн тухай конвенц (2006)

• Хүүхдийн эрхийн тухай конвенц (1990)

• Эмэгтэйчүүдийг алагчилах бүх хэлбэрийг устгах тухай конвенц (1979)

• Алагчилахгүй байх (ажил мэргэжил, хөдөлмөр эрхлэлт) тухай 111 дүгээр конвенц (1958)

• Боловсролын талаар алагчилахтай тэмцэх тухай конвенц (1960)

• Хөгжих эрхийн тухай тунхаглал (1986)

• Бэлгийн чиг баримжаа, хүйсийн баримжаа илэрхийллийг олон улсын хүний эрхийн эрх зүйд ашиглах тухай Жогжакартагийн зарчим (2006)

• Хүний эрхийн боловсрол, сургалтын талаарх тунхаглал (2011

Хүүхдийн эрхийн тухай конвенц Хөгжлийн бэрхшээлтэй хүмүүсийн эрхийн тухай конвенц

Оролцогч улсууд хүүхдийн, түүний эцэг, эх буюу хууль ёсны асран хамгаалагчийг арьс үндэс, арьсны өнгө, хүйс, хэл, шашин, улс төрийн болон бусад үзэл бодол, үндэс, угсаа, нийгмийн гарал, эд хөрөнгө, эрүүл мэнд, төрсөн болон бусад байдлаас үл шалтгаалан аливаа хэлбэрээр алагчилахгүй энэхүү Конвенцид заасан бүх эрхийг харьяалалдаа байгаа хүүхэд бүрийн хувьд хүндэтгэн хангана. Оролцогч улсууд нь хүнийг хөгжлийн бэрхшээлийн улмаас бүх хэлбэрээр алагчилах явдлыг хориглох бөгөөд хөгжлийн бэрхшээлтэй хүмүүсийг ямарваа хэлбэрийн алагчилалд өртөхөөс хамгаалах адил тэгш, үр дүнтэй хууль зүйн хамгаалалтыг бий болгоно

Арьс үндсээр алагчилах үзлийн бүх хэлбэрийг устгах тухай олон улсын конвенц Эмэгтэйчүүдийг алагчилах бүх хэлбэрийг устгах тухай конвенц

     Энэхүү Конвенцид “арьс үндсээр алагчилах” гэж улс төр, эдийн засаг, нийгэм, соёл болон нийгмийн амьдралын бусад салбарт хүний эрх, үндсэн эрх чөлөөг тэгш хүлээн зөвшөөрөх, эдлүүлэх, хэрэгжүүлэхэд саад хийх, үгүйсгэх зорилго бүхий арьс үндэс, арьсны өнгө, ураг төрөл, үндэсний буюу угсаатны гарал үүслийн үндсэн дээр ялгаварлах, онцлох, хязгаарлах буюу дээрд үзэхийг хэлнэ. Энэхүү Конвенцийн зорилгоор “эмэгтэйчүүдийг алагчилах” гэсэн нэр томьёо нь гэрлэлтийн байдлаас үл хамаарч эрэгтэй, эмэгтэйчүүдийн тэгш эрхийн үндсэн дээр улс төр, эдийн засаг, нийгэм, соёл, иргэний болон аливаа бусад салбарт эмэгтэйчүүдийн хүний эрх, үндсэн эрх чөлөөг хүлээн зөвшөөрөх, эдлүүлэх, хэрэгжүүлэхэд саад хийх, эсхүл үгүйсгэх үр дагавар, эсхүл зорилго бүхий хүйсээр ялгаварлах, үгүйсгэн гадуурхах буюу хязгаарлахыг хэлнэ.