Төв аймгийн Мөнгөнморьт сумын Жаргалант багийн нутаг Илүүрийн гол хэмээх газарт самар түүхээр явсан 35 настай эрэгтэй Д сураггүй алга болжээ. Тодруулбал, аймгийн төвөөс зүүн хойд зүгт 284 км, сумын төвөөс зүүн хойд зүгт 90 км-т самар түүхээр явсан гурван иргэн буцах замдаа автомашин нь шаварт суусан үед хамт явсан 35 настай эрэгтэй Д сураггүй алга болсон тухай дуудлага энэ сарын 24-ний 18:45 цагт бүртгэгдсэн байна. Дуудлагын дагуу тус аймгийн Онцгой байдлын газрын Эрэн хайх, аврах салбар, Мөнгөнморьт сум дахь Гал түймэр унтраах, аврах 75 дугаар ангийн алба хаагчид, сумын Цагдаагийн хэсгийн алба хаагчид, ар гэрийнхэн иргэн Д-г эрэн хайх ажиллагааг зохион байгуулан ажиллаж, зургаа дахь өдрөө цогцсыг олжээ.

ЖАРГАЛАНТ СУМЫН ЗАСАГ ДАРГА: САМРЫН ЧЕНЖ НАР 10 ХҮНЭЭ МОДОНД ҮЛДЭЭЧИХЭЭД БУЦАЖ ЯВАХДАА НЭГИЙГЭЭ АЛДЧИХСАН ЮМ БИЛЭЭ

    Эрлийн ажиллагааг хэрхэн үргэлжлүүлж, цогцсыг олсон талаар Жаргалант багийн даргаас тодрууллаа. Тэрбээр “Анх 13 хүн “ЗИЛ-130” автомашинтай самарт явсан юм билээ. Самрын ченж гэх гурав нь 10 хүнээ модонд үлдээчихээд буцаж явахдаа шаварт суусан гэсэн. Тэднийг машинаа шавраас гаргах гээд янз бүрийн аргаар үзэж байхад нь 35 настай эрэгтэй Д нь алга болчихсон юм билээ. Тэгээд энэ сарын 24-ний 18:45 цагт аймгийн Онцгой байдлын газарт модонд хүн сураггүй болсон гэх мэдээлэл бүртгэгдсэнээр онцгой, цагдаагийнхан болон ар гэрийнхэн нь эрлийн ажиллагааг эхлүүлсэн. Эрлийн ажиллагаа зургаан өдөр үргэлжилсэний эцэст өнөөдөр цогцсыг олсон” гэсэн юм.

     Харин өөр эх сурвалжийн мэдээллээр “Талийгаач архины хамааралтай болчихсон байсан учир хүмүүсийг машинаа шавраас гаргах хооронд нь алга болчихсон байсан гэсэн. Тэгэхээр тухайн үедээ согтууруулах ундаа уучихсан явсан байх. Эрлийн багийнхан цогцсыг олж, задлан шинжилгээ хийлгэхээр Шүүх шинжилгээний үндэсний хүрээлэн рүү хүргүүлсэн” гэв.