Нүд хужирласан чамин загвартай, нандин сав баглаа боодол бүхий шүрэн цүнхээрээ хэрэглэгчдийн танил болсон “The Alissa craft” шүрэн цүнхний брэндийн үүсгэн байгуулагч Ш.Шүрэнцэцэгтэй ярилцлаа.

Брэндийн цахим хуудас: The Alissa craft 

-Танд энэ өдрийн мэнд хүргэе. “The Alissa craft” брэндийг анх хэрхэн үүсгэн байгуулсан бэ. Брэндийн эхлэл юу байв?

                -Жирэмсэн байх үе хамгийн их нөлөөлсөн. Анхны жирэмслэлт анхны хүүхэд маань учраас тухайн үед хийж байсан ажил, карьер гээд бүх зүйлсээ хойш тавих шаардлагатай болсон. Тэр үед би дотроо “Энэ л биш шүү, би зүгээр л сайн гэрийн эзэгтэй сайн ээж баймааргүй байна. Гайхалтай зүйл хийж чадна” гээд сэтгэлээр бага зэрэг унаж эхэлсэн. Тэр орой унтаж чадахгүй шөнөжин “Би юу хийж чаддаг билээ” гэж бодож байхдаа брэндийнхээ санааг олсондоо.

-Яагаад заавал энэ төрлийн гар урлал хийх болсон бэ?

                -Би өөрөө тийм ч эмэгтэйлэг ганган чамин зүйлд дуртай хүн байгаагүй.  Гэхдээ эргэн тойрны хүмүүс, олны танил эрхмүүд цүнхэнд хорхойтой байдгийг анзаарсан.Тэгээд шүрээр цүнх хийхээр шийдсэн .

-Саяхан гаргасан арьсан оруулгатай цүнхний талаар дурдахгүй өнгөрч болохгүй байх. Илүү олон төрлийн загвар гаргахаар ажиллаж байгаа юу?

                -Манай анхны арьсан оруулгатай Office bag маань саяхан худалдаанд гарсан. Манайх ихэвчлэн дан шүрээр хийх алтан дүрэмтэй ажилладаг. Байгуулагдаад гурван жилийн хугацаа өнгөрөхөд эргэлтийн шинэчлэл хийх хэрэгтэй санагдсан. Энэ цүнхийг би санаачилж хийсэн биш шүү, дэлхийн бүх л орны beaded bag үйлдвэрлэгч нар хийж тренд болгосон юм. Трендээ л дагасан төдий гол онцлог нь бэлэн бэлдэц авалгүй “hera witch craft”-тай хамтарч арьсан оруулгаа Монгол үйлдвэрлэгчээр хийлгүүлсэн нь байлаа.

-Бага насны хүүхэдтэй шүү. Их ажлын хажуугаар хэрхэн бүтээгдэхүүнээ хийдэг вэ?

                -Би үнэхээр завгүй ээж бас бизнес эрхлэгч эмэгтэй. Нарийн цагийн хуваарийн дагуу төлөвлөгөөгөө эртнээс гаргаж ажилладаг. Нарийн жижиг зүйлсэд ч өөрөө оролцохгүй бол сэтгэлд хүрэхгүй байх нь их байдаг учраас хамгийн сүүлд хэзээ олон цаг унтсанаа ч санахгүй байна

-Анх бизнесээ эхлүүлэхэд ямар саад бэрхшээл тулгарч байсан бэ?

                -Монголдоо бүх шаардлагатай зүйлүүдээ хийлгүүлэх цуглуулах хамгийн төвөгтэй байсан ч хамгийн хүндрэлтэй нь ийм төрлийн гар урлалыг ойлгож хөдөлмөрийг маань үнэлэх хүмүүс тун цөөхөн байсан нь харамсалтай санагддаг. Одоо бол харьцангуй сайн дэмждэг болсон.

-Бүтээгдэхүүний захиалга ихтэй үедээ хэрхэн бүгдийг нь амжуулдаг вэ?

                -24 цаг идэх, унтахаа мартаж суух нь их шүү. Тийм тохиолдол олон байлгахгүйн тулд захиалга дүүрэх үед захиалгаа хааж дараагийн сарын захиалгад орохыг санал болгодог тэгээд л нэг цүнх дээр хэдэн цаг суух хуваариа гаргаад ажиллаж эхэлдэг дээ.

-Бүтээгдэхүүний чанар чухал шүү дээ. Түүхийн эдээ бэлтгэхдээ юун дээр нь анхаардаг вэ?

                -Хэзээд умартаж болохгүй зүйл бол чанар. Хүмүүс төдийлөн анзаарахгүй байж магадгүй ч бидэнд хамгийн хамаатай зүйл бол стандарт.  Манай брэндээс гарч буй цүнхний шүр бүрийг нарийн шалгаж хэлхэж хийдэг тийм учраас стандарт гэж байгаа юм. Цүнх бүр кодлогдсон ширхэг тоотой яг адил гарах ёстой учраас юу юунаас илүү хийц чанар стандарт гурав дээр дээд зэргээр анхаарч ажилладаг.

-Өөрөө хийдэг учраас засвар, эвдрэлийг янзалж өгдөг үү?

                -Эвдрэл гарах тохиолдол тун цөөн, бараг байхгүй гэж болно. Тийм тохиолдол одоогоор бүртгэгдээгүй байгаа. Энэ бол маш том амжилт хэрэв гарсан тохиолдолд засвар хийж өгнө өө.

-Миний хувьд та сав, баглаандаа хүртэл сэтгэл гаргадаг юм шиг санагдсан. Хайрцаг, саванд анхаарал хандуулдаггүй газар олон бий шүү дээ. Та үүн дээр ямар бодолтой байдаг вэ?

                -Би өөрийнхөө брэндийн дараагийн Hermes гэж боддог.Тийм ч учраас худалдан авагч бүр Chanel, Doir, Hermes-ийн цүнх худалдаж аваад задалж байгаа мэт тансаг тэр хүнд л зориулж бүтээгдсэн гэдгийг мэдрүүлэхийг хүссэн. Гэхдээ одоо ч дутмаг санагддаг учраас сав баглаагаа сайжруулах талаар бодож, хэрэгжүүлсэн байна.

-Шантарсан үед нь хэн хамгийн их тусалж дэмждэг вэ?

                -Эхнээсээ сэтгэл зүрхнээсээ брэндээ амжилтад хүргэхийг зорьсон учраас надад шантрах эрх байхгүй гэж боддог. Үнэхээр ачаалал ихтэй, ядралттай үед манай нөхөр их дэмждэг.

-“The Alissa craft” брэндийн ондоошил бусдаас ялгарах зүйл нь юу юм бэ?

                -Манайхаас гадна шүрэн цүнх хийдэг хувь хүмүүс олон бий. Үүнийг би борооны дараах мөөг гэж нэрлэнэ. Би бол анхдагч. Хэн ч хуулбар бүтээгдэхүүнийг чин сэтгэлээсээ догдолж задалдаггүй шүүдээ.

-Худалдан авагчдадаа хүссэн бүтээгдэхүүнийг өгсний дараа тэднээс баярлалаа гэдэг үг сонсох хамгийн сайхан байдаг байхдаа. Таныг хамгийн их баярлуулдаг, илүү их ажилламаар санагдуулдаг зүйл юу вэ?

                -Тийм шүү, улам эрч хүчтэй ажиллах шалтгаан нь цүнхээ хүлээж аваад сэтгэл нь хөөрсөн баярласан үедээ бичсэн үгнүүд л байдаг даа. Хамгийн гоё мэдрэмжийг мэдрүүлэх үгс ирдэг юм. Мөн манайхаас нэг цүнх авсан хүн дахин худалдан авалт хийх үед баярладаг.