“Эх орондоо үйлдвэрлэв” буландаа керамикч, зураач мэргэжилтэй, “Art jewellery by Tsagaanaa” брэндийн үүсгэн байгуулагч Э.Цагаанцоожийг урилаа. Тэрбээр 2016 оноос “Art jewelry” чиглэлийн дизайнераар ажиллаж байна. 
Брэндийн нэр: Art jewellery by Tsagaanaa 
Үүсгэн байгуулагч: Э.Цагаанцоож
Үүсгэн байгуулсан он: 2016 он
Бүтээгдэхүүний чиглэл: Гоёл чимэглэл /jewelry/

Материал: Цэвэр цагаан мөнгө 

-Брэнд байгуулах санаагаа хэрхэн олсон бэ?
-Дүрслэх урлагийн сургуульд сурч байхад музейн судалгаагаар зохиомж хийх хичээл ордог байлаа. Би эртний олдвор, гоёл чимэглэлийн дүрслэлд их татагдаж, биширдэг байсан юм. Анх III курсийнхээ зун өөрийн анхны загвараа буганы дүрслэлээр хийж, сургуулиа төгсөөд арт гоёл чимэглэл зохион бүтээх ажил руу орсон доо. 
 

-Үйл ажиллагаа явуулсан дөрвөн жилийн хугацаанд тулгарсан хамгийн том бэрхшээл юу байв?

-Би уран дархны мэргэжлээр сураагүй. Дүрслэх урлагийн чиглэлээр сурсан туршлага маань аливаа зүйлийг бие даан хийж сурах, бүтээлч оролдлоготой байхад сургасан. Би үүнийг сураагүй, чадахгүй гэж бодолгүйгээр хийж эхлэхэд нөлөөлсөн юм. Анхандаа уран хөрөө барьж, гагнуур хийх нь амаргүй даваа байлаа. Тэгсэн ч шантралгүй олон давтах тусам туршлага минь чадвар болж байсан. Аливаа хийж байгаа зүйлээ тогтвортой авч явах нь амаргүй шүү дээ. Заримдаа шантарсан ч шинэ зүйл бүтээх мэдрэмж нь хамгийн сайхан. Арт гоёл чимэглэл хийх хугацаандаа төсөөлж байгаагүй бүтээлүүд хийсэн болохоор цаашдаа яаж хөгжүүлж, юунд хүрч болох вэ гэсэн бодлоор өөртөө урам зориг өгдөг дөө. 

-Таны ажлын онцлог юу вэ?
-Би аль болох өөр хаана ч байхгүй сонин, өвөрмөц загвар бүтээх дуртай. Тиймээс эскизээ дүрслэх урлагийн зохиомж шиг гаргадаг. Бүтээгдэхүүнийхээ хэлбэр, хөдөлгөөн, хэмжээ, харьцааг нарийн олох нь ажлын маань хамгийн чухал хэсэг. Ингэснээр бүтээлч байдал, мэдрэмжийг давхар хөгжүүлж байдаг юм билээ. Шинэ загвар зохион бүтээх тэр мэдрэмж л хамгийн гоё. 
-Анх хэдэн ажилтантай брэндээ эхэлж, одоо хэд болж өргөжсөн бэ?
-Манай философийн багш “Зохиогч гэж өөрөө санаагаа олж, өөрөө хийж гүйцэтгэдэг хүнийг хэлнэ” гэж ярьж байсан юм. Өөрөө загвараа гаргаад өөрөө хийж гүйцэтгэх нь сэтгэлгээ болон ур чадварыг зэрэг хөгжүүлдэг юм. Түүнээсээ дүүрэн мэдрэмжийг авдаг даа. Тиймээс бүтээгдэхүүнээ үйлдвэрлэл шиг олон тоогоор гаргадаггүй. Ирээдүйд илүү өргөжүүлээд, олон ажилтантай болж магадгүй. Гар хийцийн авторын “jewelry” гэдэг нь худалдааны гэхээсээ урлаг талдаа ойрхон бүтээл юм.

-Бүтээгдэхүүнээ өргөжүүлэх чиглэлээр ямар шинэ санаа, төсөл хэрэгжүүлж байна вэ?
- Шинэ загварууд зохиох, зураг авалт хийх, бүтээлээрээ санаа концепц илэрхийлж ажиллахыг хичээдэг дээ. 2019 онд “Red Ger creative space”-д "Inspire" нэртэйгээр гоёл чимэглэлийн үзэсгэлэн гаргаж байсан. Өөрийн бүтээлээ контемпорари тал руугаа илүү хөгжүүлэхийг хүсдэг юм. 
-Үйлдвэрлэл хэрхэн явагддаг талаар уншигчдад товч танилцуулаач?
- Арт гоёл бүтээх ажил маань их сонирхолтой. Ямар нэг сэтгэл хөдөлгөсөн зүйлээс сэдэл, санаагаа олно. Эскизээ гараар зурж, олон хувилбараар гаргана. Зарим загвараа эскиз гаргахгүйгээр хийсэн тохиолдол ч бий. Загвараасаа шалтгаалаад ямар аргаар хийхээ бодно доо. Манай бүх загвар хийц, цутгуур ашиглалгүй нэг бүрчлэн гараараа хийдэг. Эскизээ металл дээрээ буулгаад гагнуур хийнэ, хамгийн сүүлд өнгөлгөө гүйцэтгэлийн ажиллагаа хийгээд шинэ загвар бэлэн болдог доо. 

- Ижил төрлийн бизнес эрхлэгчдээс ялгарах онцлог нь юу вэ?
 -Монгол үндэснийхээ гоо зүйн сэтгэлгээ, өнгө төрхийг бүтээлдээ илэрхийлэхийг хичээж ажилладгаараа онцлог байх. Загварууд маань зүүж байгаа хүндээ онцгой, цорын ганц гэсэн мэдрэмжийг өгдөг байгаасай гэж бодож бүтээдэг. Бүтээл маань гар хийц учраас дахин давтагдахгүй. Хамгийн гол нь сэтгэл шингээн урлах нь чухал. Материалын хувьд цэвэр цагаан мөнгөөр хийдэг учир харшил өгдөггүйгээрээ онцлог. 
-Та брэндийнхээ алсын харааг хэрхэн харж байна вэ?
- Ирээдүйд энэ ажлаа тогтвортой, бүтээлч байдлаар хөгжүүлж, илүү өндөр ур чадвар, үнэ цэнийг бүтээхийг хүсдэг. Олон улсын энэ төрлийн уран бүтээлчдийн оролцдог үзэсгэлэн, урлагийн долоо хоногт оролцохыг мөрөөддөг. 

-Шинээр бизнес эхлүүлэх гэж байгаа залуу үеийнхэн болон манай уншигчдад өгөх зөвлөгөө бий юү?
- Бүтээлч, тууштай, хөдөлмөрч, хийж байгаа зүйлдээ хайртай байхад чиний хийж чадах зүйлд хязгаар гэж байхгүй. Бусад хүний магтаал урмыг үг сайхан ч хийсэн зүйл чинь эргээд өөрт чинь маш их урам зориг өгдөг шүү гэж зөвлөмөөр байна .

Цахим хаяг: https://www.facebook.com/Art-jewellery-by-Tsagaanaa-525974170914160