Эргэлт.мн мэдээллийн сайт “Эх орондоо үйлдвэрлэв” булангаараа “M.Handmade” брэндийг онцлон танилцуулж байна. Тус брэнд нь зөвхөн танд зориулж, эсгийн дээр хатгамал ашиглаж, бүтээгдэхүүн урладгаараа онцлог юм. Ингээд хүүхдээ өсгөж, хүмүүжүүлэнгээ зүгээр суулгүй хоббигоо бизнес болгосон Б.Мөнх-Эрдэнэтэй ярилцсан ярилцлагаа уншигч танд хүргэж байна.

-Танд энэ өдрийн мэнд хүргэе. Манай уншигчдад өөрийгөө танилцуулахгүй юу?

-Сайн байна уу, Намайг Батгэрэл овогтой Мөнх-Эрдэнэ гэдэг. Хүмүүс Мөнхөөлэй гэдэг нэрээр маань илүү мэддэг. График дизайнер мэргэжлээр их сургууль төгссөн. Хоёр сайхан хүүхдийн ээж, гарааны бизнес эрхлэгч эмэгтэй байна.

-Яагаад зааавл энэ төрлийн гар урлал хийх болсон бэ?

    -Багаасаа юм оёх дуртай байсан. Өөр мэргэжил сонгосон ч оёх хоббигоо орхиж чадаагүй. Тэгээд гурван жилийн өмнөөс хатгамлын урлал сонирхож эхэлсэн. Судлаад үзтэл Монгол Улсад энэ төрлийн  гар урлалыг хийдэг хүн байгаагүй. Тэгээд хүсэл мөрөөдлөө биелүүлэнгээ ажил болгохоор шийдсэн дээ.

-Анх хийж эхлэхдээ сургалтад суусан уу. Яаж сурсан бэ?

    -Ямар нэг сургалтад хамрагдаагүй ээ. Цахимаас хичээлүүдийг нь үзэж, оролдсоор сурсан даа.

-Бага насны хүүхэдтэй гэсэн. Их ажлын хажуугаар хэрхэн бүтээгдэхүүнээ хийдэг вэ?

    -Хүүхэдтэй хүний ажил их шүү дээ. Хүүхдүүдээ харангаа хийдэг учраас унтсан хойгуур нь эсвэл нөхөр маань хүүхдүүдээ харах үеэр бүтээгдэхүүнээ оёдог. Ихэвчлэн оройн цагаар л оёдог.

-Анх бизнесээ эхлүүлэхэд ямар саад бэрхшээл тулгарч байсан бэ?

    -Энэ чиглэлийн бүтээгдэхүүн манай улсад анх удаа хийгдэж байгаа учраас хүмүүс содон бас дахин давтагдашгүйг нь бодож их захиалж авдаг. Цорын ганц гэдэг утгаараа онцгой л доо. Гараар оёдог учраас нэг цэцгийн дэлбээ, ганц зураасан дээр ч гмаш их анхаарах ёстой болдог учир бүтээгдэхүүн бэлэн болох хугацаа урт байдаг. Машинаар оёх боломжгүй нарийн урлал. Нэг жижиг хэсэгт ч их сэтгэл шингэдэг.

-Бүтээгдэхүүний захиалга ихтэй үедээ хэрхэн бүгдийг нь амжуулдаг вэ?

     -Анх хийж эхлэх дээ ганцаараа байсан бол одоо хоёр охинтой хамт оёдог. Бас бүтээгдэхүүн хүргэлтийн хоёр ажилтантай. Хамтран хийдэг охид маань гэрээсээ бүтээгдэхүүнээ хийдэг. Заавал уулзаад хамт сууж хийнэ гэж байхгүй. Хүн бүр өөрийн хийх ёстой зүйлээ ойлгосон байхад л болно.

-Түүхийн эдээ хаанаас авдаг вэ?

     -Яг хийж эхэлж байхад энэ төрлийн оёдлын утас манай улсад байдаггүй Солонгос Улсаас захиалж авчирдаг байсан. Одоо бол бүх материал Монгол Улсад худалдаалагддаг болсон. Манай бүтээгдэхүүн хийгддэг эсгий, оёдлын утас нь будаг гардаггүй сайн чанарын түүхийн эд байдаг. Хайрладаг, баярлуулахыг хүсдэг хүмүүстээ бэлэглэдэг учраас аль болох чанартай зүйл хэрэглэхийг боддог.

ЭЗЭНД НЬ БЭЛЭН БОЛСОН БҮТЭЭГДЭХҮҮНЭЭ ӨГӨХ ХАМГИЙН САЙХАН БАЙДАГ

-Ямар үед захиалга их байдаг вэ?

     -Баяр ёслолын үеэр  захиалга их байдаг. Манай гар урлалын бүтээгдэхүүн тухайн хүндээ зориулж цор ганцаар хийгддэг учир  хүмүүс бэлэг болгон өгөх гэж захиалдаг. Цорын ганц гэдэг утгаараа давуу тал болдог.

-Хамгийн содон захиалга нь юу вэ?

      -Олон хүнээс  захиалга авсан тэр бүгд маань надад нандин байдаг. Хөдөө амьдардаг нэг залуу манай бэлгээс захиалаад авч амжихгүй байсаар бүтэн жилийн дараа авч байсан юм. Бэлгийг нь авсан охин их баярласан гэсэн /инээв/. Захиалга солигдох үе олон тохиолдоно. Манай урлангаас  гадаад улсын иргэд их захиалж авдаг. Гадаадын жуулчид гар урлалыг хамгийн их сонирхдог, үнэлдэг, үнэ цэнийг нь мэддэг юм шиг санагддаг. Эзэнд нь бэлэн болсон бүтээгдэхүүн өгөх мэдрэмж хамгийн сайхан нь байдаг даа.

-Шантарсан үед нь хэн хамгийн их тусалж дэмждэг вэ?

     -Шантрах, хийх ажил амжихгүй байх үе олон тохиолддог. Энэ үед хамгийн сайн туслах , ард минь байдаг хүн үргэлж миний хань байдаг. Бүх боломжоороо тусладаг учраас ханьдаа баярлалаа гэж хэлмээр байна.

-Цаашдаа бизнесээ өргөжүүлэх төлөвлөгөө гаргасан уу?

     -Мэдээж өргөжүүлмээр байна. Мөн илүү олон хүнд хатгамал зааж өгмөөр байгаа учраас өөрийн гэсэн урлангаа нээмээр байна.  Манай бүтээгдэхүүнийг хараад сурталтын талаар охид их асуудаг юм аа. Бас өмнө нь миний сургалтад суусан охид гарааны бизнес эхлүүлээд явж байгааг харах сайхан байдаг. Нэг тийм бахархсан мэдрэмж авдаг.

-Ярилцсанд баярлалаа, цаашдын ажилд нь амжилт хүсье.

    -Танд ч бас баярлалаа.