“Эх орондоо үйлдвэрлэв” булангийн энэ удаагийн дугаарт өвөрмөц загвараараа олонд танигдаад буй “93//Kidult”, “Ida Studios” брэндийн үүсгэн байгуулагч, загвар зохион бүтээгч Б.Лидаг урьж, түүний ажлын хэв маяг, онцлогтой танилцлаа.

-Та манай уншигчдад өөрийгөө танилцуулаач?

-Миний нэрийг Лида гэдэг. “93//Kidult”, “Ida Studios” брэндийн үүсгэн байгуулагч, загвар зохион бүтээгч мэргэжилтэй.

-Анх хэрхэн бизнесийнхээ санааг олж байв, Хэр удаан бодож, биелэлээ олсон бэ?

-2015 онд “93// Kidult” брэндийг М.Нямсүрэн гэдэг найзтайгаа хамт үүсгэн байгуулж байлаа. Бид ихэнхдээ залуучуудын “стритвеэр” хэв загварын хувцас урлаж байгаад 2018 оноос завсарлаж “Ида студиос” брэндээ үүсгэсэн. "Ида студиос" брэндээ сар гаруй хугацаанд төлөвлөж, 2019 оны аравдугаар сарын 12-нд нээсэн. Хамтрагч маань бельги дизайнер ба манай брэндийн зөвлөгч, график дизайнераар хамтардаг уран бүтээлч. Брэндийн логог маань Польш Улсад амьдарч, уран бүтээлээ туурвиж буй каллиграф зураач С.Тамир монгол бичгээр, латинаар ч уншихад ойлгомжтойгоор бүтээж өгсөн.

-Бизнесээ эхлүүлэхэд ямар саад бэрхшээлүүдтэй тулгарч, түүнийгээ хэрхэн даван гарч байв?

-Манай брэнд гарааны бизнес учраас бүх зүйлээ өөрөө бие даан хийх хэрэгтэй болдог. Тэр утгаараа тал талын авьяас шаарддаг. Бизнес төлөвлөгөө, коллекцын агуулга, хэнд зориулах, хаана борлуулах вэ гээд төлөвлөх, хийх ажлаа бүгдийг нь гардан хийдэг. Бидний хувьд удаан бодолгүй, шууд л хийж эхэлсэн дээ. Зурагчин олдсонгүй гээд зогсох биш, дараагийнх нь хүнтэй ярилцаж, гарц хайж, бүтээх гэж зүтгэдэг байлаа. Нэг үгээр дайраад орсон гэхэд болно. Ямар нэгэн байдлаар эхлүүлсэн байхад арга зам нь олдоно гэж найддаг. Бэрхшээл гэвэл маркетинг хийх маш хэцүү. Хувцас хийхээс ч их хүч зарцуулах ёстой юм шиг санагддаг шүү.

-Та ажлын онцлог юу вэ?

-Бидний ажил, мэргэжлийн давуу тал нь уран сэтгэмжээр бодож төсөөлсөн зүйлээ бодит болгодог нь сайхан. Гар болон тархиа нэгэн зэрэг ажиллуулдаг болохоор мэдээж маш их цаг зарцуулна. Гэтэл зарим хүн хоёр даавуу холбоод л болчихдог юм шиг ярьдаг. Хувцасныхаа давуу тал, онцлогийг биед эвтэйхэн, хүмүүст тайван тухтай байдал мэдрүүлдэг байгаасай гэж хүсэж хийдэгт байдаг болов уу гэж боддог.

/93//Kidult/

-Анх хэдэн ажилтантай эхэлж, одоо хэд болж өргөжив?

-Анх нэг туслах дизайнертай ажлаа эхэлж байв. Харин одоо гурван туслах дизайнер, хоёр маркетингийн ажилтантай, нийт долоон хүний бүрэлдэхүүнтэй ажиллаж байна.

-Бизнесээ өргөжүүлэх ямар шинэ санаа, төсөл хэрэгжүүлж байна вэ?

-Бид улирал болгоны төлөвлөгөө гаргаж, бүтээгдэхүүний тоогоо нэмж, салбар дэлгүүртэй болох зорилготой ажиллаж байна. Одоогоор төсөлд хамрагдаагүй ч өвлийн коллекцын ажилд төвлөрч байна.

-Үйлдвэрлэл хэрхэн явагддаг талаар уншигчдад товч сонирхуулбал?

-Би гэрийнхээ том өрөөнд урлантай болсноо давуу тал болжээ гэж хардаг. Тиймдээ ч сахилга баттай байхыг хичээдэг юм. Өглөө эрт босож загварын судалгаа хийж, зургаа гаргаад, материалаа хайж олж, эсгүүрээ хийгээд бүтээгдэхүүний туршилтын загвараа хийнэ. Дараа нь размерчлан масс дамжлага оёдолдоо орж үйлдвэрлэх үйл явц эхэлнэ. Бүх алхмыг өөрөө хянадаг гэсэн үг.

/Ida Studios/

-Алсын хараагаа хэрхэн төсөөлж байна вэ?

-Бид “Wu wei” буюу flow хэмээх эртний даозмын бясалгалын “Ус болон урсгалт бүх юм нэгэн хэвийн бус, хувьсан өөрчлөгддөг” гэсэн философийн санааг бүтээгдэхүүндээ тусгадаг юм. Тэр утгаараа өдөр тутмын хувцсандаа “Ус шиг бай” гэсэн санаа тусгахыг зорьдог. Та сайн анзаарвал усны урсгал бүр бидний хувцасны детальд агуулагдаж байдаг. Нэгээс хоёр жилийн хугацаанд гаднын зах зээлд бүтээгдэхүүнээ гарахыг зорьж байна.

-Та шинэ залуу бүтээгчдэд болон манай уншигчдад ямар зөвлөгөө өгөх вэ?

-Та бол онцгой, цор ганц хүн. Өөрийгөө сайн сонсож, юу хийж бүтээхийг хүсэж байна түүнийгээ бусадтай харьцуулж, эргэлзэлгүй шууд л хийж эхлээрэй. Бүтээх нь гол учир бүтэлгүйтсэн ч, дараагийн алхам аяндаа гараад л ирнэ. Гол нь тууштай хөдөлмөрлөх хэрэгтэй гэж зөвлөмөөр байна.

Дэлгэрэнгүй мэдээллийг: https://www.facebook.com/93KIDULTSTUDIO

https://www.facebook.com/idastudiosfashion