• Өнөөдөр 2021-04-18

Мэндчилгээ дэвшүүлэхээс өөр “гавьяагүй”, алх цохихоос өөр “шидгүй” Г.ЗАНДАНШАТАР

2021-04-11,   398

              УИХ-ын дарга Г.Занданшатарын албан ёсны цахим хуудсаар “тэнэж” үзлээ. Нэгэнт төрийн ажил твиттер, фейсбүүкт явагддаг болсон учраас хэлсэн үг, хийсэн ажил, хаа хүрэх гээд байгаа хандлагыг нь цахим хуудаснаас нь олж мэдэж болмоор санагдаад тэр. Гуравдугаар сарын 15-нд хаврын чуулган эхэлнээс хойш Г.Занданшатар “Наурызын баярын мэнд хүргэе”, “Орчин цагийн зэвсэгт хүчин үүсэж хөгжсөний 100 жилийн ойн мэнд дэвшүүлье”, “Монгол хүн сансарт ниссэний 40 жилийн ойн мэнд хүргэе”, “Дэлхийн цаг уурын өдөр тохиож байна”, “Дэлхийн театрын өдрийн баярын мэнд хүргэе”, “НАМЗХолбоо үүсэж хөгжсөний 24 жилийн ойн баярын мэндийн үе үеийн гишүүд, журмын нөхөд та бүхэндээ хүргэе”, “Дэлхийн эмч нарын баярын мэнд хүргэе” гэж баяр алгасалгүй мэндчилгээ дэвшүүлж, хамгийн сүүлд “Япон лугаа адил хөгжье” гэжээ. Ингэхдээ мэндчилгээ бүр нь “УИХ-ын дарга Г.Занданшатар” гэсэн гарын үсэгтэй, өөрөө гоёмсог хослолтой, эсвэл тод өнгийн торгомсог дээлтэй, зориулж, зоосоор “зодож” хийлгэсэн гэмээр чимэглэл бүхий зурагтай, дүрстэй, дуутай дэвшүүлэхийг нь яана. 
 

УИХ-ын даргынхаар бол улс орон урагшилж хөгжөөд, увайгүй улс төрчид ухаажиж соёлжоод, уруудаж доройтсон нийгэмд шинэ нар мандчихсан юм шиг л...Нэг тийм гэрэл гэгээтэй, баяр баясалтай, бадрангуй үгтэй “пост”-ууд. УИХ-ын даргын хувиар улс төрд цэгцлэх ажил үлдээгүй мэт хачин сайхан. 

 
Түүний цахим хуудаснаас гарч, нийтийн хуудсуудаар хэсэг “туучлаа”. Гэтэл эсэргээрээ “Улс төрд гарсан увайгүй луйварчид огцор”, “Боломжоо хулгайлуулсан аж ахуйн нэгжүүд дампуурч дууслаа”, “УИХ-ын гишүүдийн гуравны нэг нь архичин”, “Төмөр торны цаанаас төрийн ордонд заларсан анхны гишүүн энэ парламентийнх”, “Сү.Батболдын луйвар монголын улс төрийн нэр хүндийг олон улсад шороотой нь хутгалаа”, “Энэ парламентийн гурван гишүүн нь сонгуульд ялах гэж 33 тэрбум төгрөг банкнаас шуучихаж гэнэ”, “Чуулганы танхимд рестораны меню зохиодог боллоо” гэх “пост”-ууд “хөглөрөх” аж. Гэрэл гэгээтэй зүйл хайгаад ч эс олов. 
 

Урьд хожид байгаагүй унтаа, унжуу, унхиагүй, урагшгүй парламент бол Г.Занданшатарынх гэнэ. Бас гишүүдийнхээ ирцийг бүрдүүлж, хэрүүлгүй хуралдаан хийж чадахгүй байж, “Юун, Япон лугаа адил хөгжих, Эрээн шиг хөгжиж байвал барав” гэцгээнэ. УИХ-ын дарга Г.Занданшатар хөрсөн дээрээ бууж, баярын мэндчилгээ дэвшүүлж суухаас илүүтэй ард түмэнд агаар ус шиг гарцаагүй хэрэгтэй ганц ч болов хууль баталж, энгийн иргэдийн боломжийг хулгайлсан эрх дархтай гишүүддээ хариуцлага тооцож, түүнийгээ харин баяртайгаар зарлаж байвал өргөн олон жинхэнээсээ баярлах бололтой юм. Цахим орчинд ийн Г.Занданшатарын ажил хийсэн мэт баяр, бахдалтай хандлага, ард иргэдийн түүний эсрэг шүүмжлэл хоёр гал ус шиг харшилж байна. 

Тэгээд бодлоо, ер нь УИХ-ын дарга Г.Занданшатар 2019 оны хоёрдугаар сарын 1-нээс хойш юу хийж бүтээв ээ гэж. "УИХ-ын дарга М.Энхболдыг л зайлуулчихвал улс орон хөгжих гээд, УИХ-ын гишүүд нэр мөр цэвэр болж, идэж уусан мөнгөө гаргаж ирчих гээд, ард иргэдэд хууль тэгш үйлчилж, ардчилсан, алагчлалгүй нийгэм жинхэнэ ёсоор тогтчих гээд байна" гэсээр унагаасан. Оронд нь У.Хүрэлсүхээр дэмнүүлэн УИХ-ын даргын суудалд зарласан Г.Занданшатар дээрх бүгдийгээ хийж чадав уу.
 
Яах вэ, намар, хаврын чуулганыг цар тахалтай хэдий ч тасалдуулахгүй явуулж, заримдаа “бандааштай”, хааяа хоосон зурагтай, халбага, шанагатай үргэлжлүүлж л байна.
 

Гэхдээ зөвхөн чуулган эхэлсэн, дууссаныг зарлаад, ирц, санал бүртгэж алх цохиод суудаг хүнийг УИХ-ын дарга гэхгүй байх л даа, зүй нь.

 
Сүүлийн үед Г.Занданшатар “Япон лугаа адил хөгжье” гэх хөгжлийн загвар ярьж явах болсон. Дотуур хувцасны загвар өмсөгчтэй санаандгүй зургаа татуулсныхаа төлөө духаа өвдгөндөө хүртэл бөхийж, сайдын суудлаасаа огцордог ёс зүйн өндөр хэм хэмжээтэй Япон улс шиг болъё гэвэл манайд парламентийн нас хүрэлцэх үү. Хүчингийн хэрэг үйлдсэн, хулгай хийсэн, төсвийн мөнгө идсэн, төрийн сангуудыг тоносон зэрэг бузар булхайнууд нь баримтаар илэрчихээд байхад л албан тушаалаа өгөхгүй чаргууцалдаж, толгой бөхийгөөд уучлал гуйж чадахгүй гүрийгээд байдаг улс төрчидтэй улс Япон шиг хөгжиж чадах уу. Дархан хүртэл 200 километр замаа барьж чадахгүй байгаа манай улс сарнаас шороо авчраад шинжилж байгаа, алсдаа Ангараг гарагийг хотжуулахаар судалж байгаа Япон улстай хөгжлөөрөө хэзээ эн зэрэгцэх вэ. Бодох л асуудал. Тэрний оронд түмэн сонгогчдийн итгэлийг өвөртөлж ирчихээд хуралдаа суудаггүй хэнэггүй гишүүддээ хатуухан сануулга өгч, халбага, шанагатай хуралдаан багахан хийвэл дээр санагдах. 
 
Ангийн хүүхэд хичээл таслаад, фондын мөнгөнөөс хувьдаа завшаад, гэрийн даалгавараа хийхгүй, гадаа сайртатлаа тоглоод, ангиараа муу сураад байвал багш ангийн даргыг л “донгодож”, өөрөө үлгэр жишээ байхыг шаарддаг байсантай нэг их ялгаагүй юм л даа. Өөрөөр бол УИХ унтаа, урагшгүй байгааг УИХ-ын дарга Г.Занданшатартай холбоход нэг их буруудахгүй. 
 
Уг нь Г.Занданшатар МАН-ын гишүүн болж, улс төрд хөл тавиад 23 жил болж буй. Г.Занданшатар төр нийгмийн зүтгэлтэн С.Зоригийг алагдсаны  маргааш өглөө буюу 1998 оны аравдугаар сарын 3-нд МАХН(МАН)-д элссэн. Улс төр үймэж, нийгэм цочирдсон өглөө намын гишүүн болох өргөдөл бичээд, өдөр нь батлахаа гардаад зогсож байсан хүн түүнээс гадна хэд байсныг мэдэхгүй юм. Ямартай ч тэр улс төрийн тогоонд 23 жил болж байна. Акул болвол болох хангалттай хугацаа. Хуралдааны дэгээ хатуухан бариулаад, худлаа попрогсдынх нь микрофоныг хаачихаад “Зи” шиг жуумалзаж сууж сурах боломжтой хугацаа. Гэвч одоогоор түүнд мэндчилгээ дэвшүүлэхээс өөр гавьяа, алх цохихоос өөр шид алга аа. 
 

Мэндчилгээ дэвшүүлэхээс өөр “гавьяагүй”, алх цохихоос өөр “шидгүй” Г.ЗАНДАНШАТАР
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3
  • Сэтггэгдэл үлдээсэн: 2021-04-07 13:39:33
    кккк: Үнэн шүү
  • Сэтггэгдэл үлдээсэн: 2021-04-07 12:15:01
    Хүндэт иргэн: үнэн2
  • Сэтггэгдэл үлдээсэн: 2021-04-07 08:22:50
    Zochin: Xaxaxa. Ynen shyy .
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, XI хороолол, 14193-Их тойруу 43, "N tower" V давхар 501-2 тоот
7713-1414