УИХ-ын үдээс хойших чуулганы нэгдсэн хуралдаанаар  “Монгол Улсын Үндсэн хуулийн цэцийн 2021 оны 02 дугаар дүгнэлтийн тухай” Улсын Их Хурлын 38 дугаар тогтоолд бүхэлд нь тавьсан Ерөнхийлөгчийн хоригийг хэлэлцэж байна.

Энэ үеэр УИХ-ын гишүүн А.Адъяасүрэн “Ардчилсан нийгмийн үнэт зүйл болох шударга ёс, хууль дээдлэх ёс, ёс зүйн тухай ойлголт УИХ-ын энэ танхимд булшлагдаж, үүний гэрч болоод энд сууж байгаадаа харамсаж байна. Хүмүүнлэг ёс, эрх чөлөөний баталгаа болдог хувь хүний сонгох, сонгогдох эрхэнд хууль бусаар халдаж байгаа МАН-ын олонхын түрэмгийлэлд АН-ын бүлгийн гишүүд бид хүчин мөхөстөж байна. Хувь хүний сонгох, сонгогдох эрхийг хуульчлан хасдаг байсан дарангуйллын үеэ санагалзсан МАН энэ санаархлаа биелүүлэхэд хэдхэн минут үлдлээ. АН-ын бүлгийн гишүүд бид цөөдөж байгаа ч Монголын ард түмэн цөөдөхгүй шүү. Тун удахгүй МАН-ыг шүүмжилж, эсэргүүцэл хэлснийхээ төлөө хавчигддаг, дарамтлуулдаг он жилүүд эхлэх гэж байна. Ард түмний үг хэлэх, жагсан цуглах эрхийг ч хязгаарлах болно. Монголчуудын ярьдгаар өрсөлдөгч нь хүчтэй байх тусам ялалтын алдар нь түмний бахархал, түүх судрын чимэг болж дурсагдаж ирсэн монгол эрчүүдийн ёс зүй хаана байна вэ, МАН-ынхаан. Аархлаар хүч түрж, Монгол төрийн манаачийн үүрэгтэй Үндсэн хуулийн цэцийг ёс бус үйлдэлдээ татан оруулснаараа нийгмийг тогтворгүй байлгаж, улс үндэстнээ хагаралд түлхсэн байдал чинь танай намын 100 жилийн хар толбуудыг тодруулан нэмж байгааг хэлэх нь зүйтэй. АН-ын бүлэг энэ удаад хүчин мөхөстөж байгаа ч зөв зүйлийн төлөө, шударга ёсны төлөө сөрөг хүчний байр сууринаас үзэл бодлоо илэрхийлсээр байх болно. Эцэст нь, энэ танхимаас түрэмгийлэл, мунхаглал зайлж, ардчилал, шударга ёс эргэн ирэх болтугай гэж хэлье” хэмээв.