УИХ-ын гишүүн Н.Номтойбаяр цаг үеийн асуудлаар мэдээлэл өглөө. Тэрбээр "УИХ дахь "Үндэсний эвсэл" түүний бүрэлдэхүүнд байгаа улс төрийн намуудын удирдлага, УИХ-ын гишүүд бид өнөө өглөө хуралдаж, улс төрд үүсээд байгаа нөхцөл байдлын талаар санал солилцлоо. Олон гишүүн санал гаргасныг алдагдуулахгүй байх үүднээс хурлын тэмдэглэлээс та бүхэнд товчхон танилцуулъя.

         Тэмдэглэлд "Ерөнхий сайдад олон нийтийн зүгээс орлогоо нотол, Ерөнхийлөгчийн зүгээс ажлаа өг зэрэг тавигдаад буй шаардлагуудтай санал нэг байна. Гагцхүү ажлаа өгөхдөө төрд үүсэж байсан ноцтой хагарал, задралыг эргэн санаж, төрд хагарлын хар мөр үлдээхийг бид хэрхэвч зөвшөөрөхгүй. УИХ-ын дарга Д.Амарбаясгалангийн удирдлага зохион байгуулалтаар УИХ-ын гишүүд нам үл харгалзан ажил хэрэгч байдлаар гар нийлээд ажиллаж байгаа нэр тогтолцоог битгий эвд гэж хэлэхийг хүсэж байна. Ерөнхий сайд Л.Оюун-Эрдэнийн УИХ-д ирүүлсэн итгэл хүлээлгэх тухай албан бичигтэй бид анхааралтай танилцлаа. "Үндэсний эвсэл" нь үндэсний баялгийн сан болон зарим мега төсөл нь макро эдийн засгийг тэлж, татвар, нийгмийн даатгалын шимтгэл, ажилгүйдэл, ядуурлыг бууруулах нь улс орны эдийн засгийн нэн чухал хөгжлийн асуудал болохыг ямагт дэмжинэ. Энэ нь хуулиар баталгаажсан монгол төрийн хэрэгжүүлэх зайлшгүй бодлого болохоос хувь хүний өдрийн тэмдэглэл биш юм. Гэтэл энэ албан бичигт үүсэн улс төрийн нөхцөл байдлаас шалтгаалан цаашид сонгодог парламентын тогтолцоог төгөлдөржүүлэх шаардлагатай байна гэж тодорхой бичсэн нь онцгой анхаарал татаж байна...". Тэгэхээр УИХ-ын гишүүддээ хэлэхэд итгэл үнэмшлээрээ зоригтой бай. Хэний ч нөлөөнд үл автаж шийдвэр гаргаасай гэж хүсэж байна" гэв.