Төрийн ордонд "Эрүүдэн шүүлт тулгах, хүнлэг бус, хэрцгий хандахаас ангид байх хүний эрхийн хэрэгжилт" хүний эрх, эрх чөлөөг хамгаалахтай холбоотой УИХ-ын хяналтын сонсгол болж байна.

       Энэ үеэр Малайз Улсад харамсалтайгаар амиа алдсан Алтантуяагийн аав С.Шаарийбуу "Бид өнөөдөр Монголд эрүүдэн шүүх үйл ажиллагаа, түүнээс гарах арга замын тухай ярилцаж байна. Энд гадаадад амьдарч байгаа хүмүүсийн тухай асуудал яригдах ёстой. Бид эх орноосоо гараад явсан улсаа үнэндээ мартчихсан. Тэд өөрийнхөө эр зоригоор өөрсдийнхөө тэр улсын хуулиар эрх мэдэл нь хохирч явдаг. Төр хохирогч бас нэхэмжлэгч байх ёстой. Би үүний төлөө 19 жил явлаа. Би хуулийн бүх байгууллагад хэдэнтээ өргөдөл өгсөн. Надад ганцхан боломжгүй гэх хариу л өгдөг. Эрхзүйн гэрээгүй гэдэг. Эрхзүйн гэрээгээ байгуулал л даа. Эрхзүйн гэрээгүй юм бол энэ ертөнцөд амьдрах хэрэг байна уу. Энэ асуудлаа саяхан Ерөнхий сайд, Хууль зүйн яаманд тавьсан. Энэ удаад надтай уулзаж байж "Боломжгүй" гэх үгээ хэлэх болов уу гэж би горьдож байна. Манай хуулийн байгууллагууд хүний өргөдөл өгдөг. Өөртэй нь уулздаггүй. Би хүн хүнтэйгээ уулздаг гэж ойлгодог. Гэтэл хүн цаастай харьцдаг болоод удаж байгаа нь харамсалтай байдаг. Үнэнийг хэлье гэхээр үнэнг хэлж байгаа хүний эрхийг хамгаалах хууль манай оронд байхгүй. Тиймээс энэ Шүгэл үлээгчийн эрхийг хамгаалах хууль гэдгээ оруулаад хэлэлцээд өгөөч. Боломжгүй юм гэж байхгүй. Миний хувьд Малайзын хуульд нөлөөлсөн. Хэрэг үйлдэгсдийн ялыг аравдугаар сарын 2-нд өөрчлүүлж чадсан" гэв.