УИХ-ын гишүүн Б.Энхбаяр нарын 13 гишүүний өргөн мэдүүлсэн Шүүгчийн эрх зүйн байдлын тухай хуульд өөрчлөлт оруулах тухай, Прокурорын тухай хуульд өөрчлөлт оруулах тухай, Авлигын эсрэг хуульд өөрчлөлт оруулах тухай хуулийн төслүүдийн хэлэлцэх эсэхийг хэлэлцэж байна.

Хуулийн төсөлтэй холбогдуулан УИХ-ЫН ГИШҮҮН С.ГАНБААТАР “Эрх баригч МАН-ынхан хонгилын түлхүүрийг булааж байна. 62 гишүүн бярдаж Ерөнхийлөгчөөс хамаг эрхийг нь булааж авч байна. Үе үеийн Ерөнхийлөгч нарын шүүхийн эрх мэдэл давуу байдаг нь төсөв баталдаггүй, төсөв хэрэгжүүлдэггүй учраас. Өнгөрсөн хугацаанд цагаан захтан, улс төржсөн бүлэглэлүүдийн хэрэг Үндэсний аюулгүй байдлын зөвлөл (ҮАБЗ)-д хүрсэн. ҮАБЗ-өөс шийдвэр гарч байж Салхитын мөнгөний ордны 17 шүүгчийн бүлэг хэрэг шийдэгдсэн. Энэ буцна гэсэн үг үү. Дээр нь нэмээд ГОК-ын 49 хувийн асуудал байна. Оюутолгойтой холбоотой асуудлаар Ардын намын том дарга нар шоронд байгаа.  Тэдний захиалгаар Шүүхийн багц хууль орж ирж байна гэж үзэж байна. Би хүний муу үзэх гэсэнгүй. Ар гэр, үр хүүхдэд нь хэцүү байгаа байх. Хамгийн гол нь Монгол оронд шударга ёс хэрэгтэй байна. Улс төрийн бүлэглэлүүд шүүхийн хараат байдалд нөлөөлдөг. Анхан шатандаа ял нь хөнгөрөөд эхэлсэн. Энэ хуулийн буянаар дээрх хүмүүс шоронгоос гарч ирэхгүй гэсэн баталгаа байгаа юу. Хариуцлага нь улам чангарна гэж ойлгож болох уу. Өнөөдөр шүүгч нарыг шүүдэг Сахилгын хороог УИХ-аар авч хэлэлцэх тухай ярьж байна. Энэ чинь эрх баригчдын дуу хоолойг гүйцэлдүүлэх болж байгаа юм биш үү” гэлээ. 

Харин УИХ-ЫН ГИШҮҮН Б.ЭНХБАЯР С.Ганбаатар гишүүнтэй санал нэг байгаагаа хэлээд “2019 оны энэ хууль нэг талаараа үүргээ гүйцэтгэсэн. Өөрөөр хэлбэл, авлигач, хэнд ч дийлдэхээ больчихсон, эх орныхоо газар шороог харийнхны халаасанд хийж байсан авлигач шүүгч нарыг шударга шүүхийн өмнө аваачиж ял шийтгэх шаардлага байсан. Өнгөрсөн хугацаанд 17 шүүгчийн бүрэн эрхийг түдгэлзүүлж шалгаснаас найман шүүгч нь гэм буруугүй байна гээд хамгийн сүүлийн хоёр шүүгчийн бүрэн эрхийг өнгөрсөн долоо хоногт сэргээсэн. Мэдээж хонгилыг нураахад амаргүй. Үндсэн хуулийн өөрчлөлтөөр шүүгчийг зөвхөн Сахилгын хороо хэмээх Үндсэн хуулийн байгууллага огцруулах эрхтэй гэж заасан. Энэ заалт 2020 оны тавдугаар сараас хүчин төгөлдөр үйлчилж эхэлсэн. Тийм учраас бид Үндсэн хуультайгаа зөрчилдсөн хуулийн заалтыг цаашид үргэлжлүүлэх боломжгүй гэж үзээд УИХ-ын 13 гишүүн санаачлаад явуулж байсан. Шүүхийн багц хуультай уялдаж шийдэгдэнэ” гэсэн тайлбар өглөө. 

Харин С.Ганбаатар гишүүн энэ хуулийн төсөл дээр олон нийтийн санал асуулга, хэлэлцүүлэг явуулах шаардлагатай гэсэн саналыг хэллээ.