УИХ-ын чуулганаар Засгийн газраас арванхоёрдугаар сарын 17-нд өргөн мэдүүлсэн Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслигн хэлэлцэх эсэхийг хэлэлцэж байна. Шадар сайд Я.Содбаатар болон Сангийн сайд Ч.Хүрэлбаатар нар гишүүдийн асуултад хариулт өгч байна. 

УИХ-ЫН ГИШҮҮН Ц.АНАНДБАЗАР  “Энэ удаагийн эдийн засгийн хямрал 1990 оны эдийн засгийн хямралыг давтаж байна. Засгийн газраас ард иргэдийн дулаан, цахилгааны үнийг тэглэсэн нь сайн зүйл. Үүн дотор малчин ардууд маань нэг ч төгрөг аваагүй үлдчихсэн. Малчин ардууддаа хөнгөлөлт өгөх хэрэгтэй байна. Мөн бизнесийн салбарыг хэрхэн дэмжих вэ гэдгээ тодорхой хэлэхгүй байна. Өнөөдөр бараа нь байгаа ч иргэд мөнгөгүй байна. Би өмнө нь хүн бүрд 100 мянган төгрөг өгөх ёстой гэсэн санал гаргасан. Үүнийг хэрхэн харж байна вэ” гэхэд САНГИЙН САЙД Ч.ХҮРЭЛБААТАР “Коронагийн үед хүүхдүүд, нийгмийн эмзэг бүлгийн иргэдээс гадна малчид тусламж авсан. Хил хаагдсан үед ноолуурын бизнес явахгүй байсан. Хамгийн анхны арга хэмжээ болох 174.6 тэрбум төгрөгийг ноолууранд зориулж байсан. Боломжийнхоо хэрээр арга хэмжээ аваад байгаа” гэсэн тайлбар өглөө.