УИХ-ын дарга Г.Занданшатар Хаан банкны хувь эзэмшил шилжих гэж буй асуудлаар Монгол банкны удирдлагуудад анхааруулга өглөө. Тодруулбал, Монгол Улсын системийн томоохон банк буюу Хаан банкны хувь эзэмшил зарагдах асуудлыг хуулийн дагуу шийдэхгүй бол өөрсдөө өргөдлөө өгөөрэй гэлээ. 

          Тэрбээр "Сүүлийн үед Хаан банкны хувьцаа эзэмшилтэй холбоотой үнэн худал нь мэдэгдэхгүй олон мэдээлэл хэвлэлийн мэдээллийн хэрэгслүүдээр гарч байна. Монгол банкны удирдлагуудад банкны тухай хууль болон Монгол банкны тухай хуулийг чанд мөрдөж, хууль зөрчсөн үйлдэл, ялангуяа ашиг сонирхлын зөрчил гаргахгүйгээр хуулийн дагуу энэ асуудлыг шийдэж, УИХ-ын гишүүдэд мэдээлэл хүргүүлэхийг даалгаж байна. Банкны салбарын тогтвортой байдлыг хангахын тулд системийн томоохон банкнуудын талаар худал, үнэн нь мэдэгдэхгүй олон мэдээлэл гарч байгааг эцэслэн шалгаж, шаардлагатай бол хууль хяналтын байгууллагуудаар шалгуулж, энэ асуудлыг нэг мөр шийдэх хэрэгтэй. Ялангуяа нэг банкны хувьцаа эзэмшигч өөр банкны хувьцаа эзэмших хатуу хориотой. Шинэ батлагдсан банкны тухай хуулиар хувьцаа эзэмшлийн төвлөрлийг 20 хувиас ихгүй байхаар заасан. Үүнийг тууштай хэрэгжүүлэх шаардлагатай. Мөн банкны өгч байгаа мэдээлэл үнэн зөв байх шаардлагатай. Хэрвээ худал мэдээлэл гаргаж өгсөн бол банкны тухай хууль, тогтоомжийн дагуу банкны хувьцаа эзэмшлийг хүчингүй болгох, ногдол ашиг хуваарилахгүй байх, саналын эрхгүй болгох зэрэг зохицуулалтууд бий. Банкны тухай хууль тогтоомжуудыг чанд мөрдөж ажиллахгүй бол Монгол банкны удирдлагуудад хатуу хариуцлага тооцох болно. Хууль зөрчсөн, ашиг сонирхлын зөрчил гаргасан бол өөрсдөө өргөдлөө өгнө шүү гэдгийг анхааруулж байна" гэлээ.