“Төгөлдөр хуур тоглохоор үлгэрийн оронд оччихсон юм шиг санагддаг. Би төгөлдөр хуур тоглох хамгийн дуртай” хэмээн ярих охиныг Г.Бадмаараг гэдэг. Таван настайгаасаа төгөлдөр хуураар хичээллэсэн тэрбээр тив, дэлхийд Монголын нэрийг өндөрт өргөж яваа бяцхан төгөлдөр хуурч. Монгол Улсын Консерваторын тавдугаар ангийн сурагч тэрбээр 2024 онд Чех Улсад зохион байгуулагдсан "Virtuosi per musica di pianoforte", 2025 онд Итали улсад зохион байгуулагдсан "IBLA Grand Prize" тэргүүтэй тэмцээнд амжилттай оролцож, Гран при хүртсэн авьяаслаг нэгэн билээ.

-Чамд энэ өдрийн мэнд хүргэе. Эх орноо төлөөлөн төгөлдөр хуурчдын олон улсын уралдаанд орж тэргүүн байр эзэлсэн гэсэн. Тус тэмцээнийхээ талаар ярихгүй юу?

                -Анх 2024 оны арванхоёрдугаар сард  Чех Улсад зохион байгуулагдсан тэмцээнд ороод, Гран при хүртсэн. Эхэндээ өөрийгөө ялна гэж огт бодоогүй, бусад оролцогч үнэхээр чадварлаг, сайн тоглож байгааг сонссон юм л даа. Гэтэл ялчихсан, үнэхээр их баярласан. 2025 оны долдугаар сард "IBLA Grand Prize" уралдаанд оролцож, мөн Гран при шалгарсан. Оролцогч хүүхэд олон байсан учраас тэмцээний хариу сарын дараа гарч, саяхан өөрийгөө Гран при хүртсэн гэдгээ  мэдсэн. Үнэхээр баяртай байгаа.

-"IBLA Grand Prize" уралдаанд оролцоход чамайг хамгийн их сандаргаж, догдлуулж байсан зүйл нь юу вэ?

                -Тус тэмцээн таван өдөр үргэлжилдэг. Өдөр бүр оройн цагаар 2-3 удаа бэлдсэн хөгжмөө тоглож, шалгаруулалтдаа орсон. Нойр хүрээд алдчихвал яана аа гэж бодогдсон. Гэхдээ өмнө нь хэд хэдэн тэмцээнд оролцсон учраас төдийлөн алдчихвал яах уу гэж айгаагүй ээ, бэлтгэлээ сайн хийсэн байх гэж бодож байсан.

-Ж.Брамсын нэрэмжит олон улсын өсвөрийн төгөлдөр хуурчдын уралдаанд тэргүүн байр эзэлсэн гэсэн. Тэргүүн байрт шалгарсан сэтгэгдлээсээ хуваалцаач?

                -Ж.Брамсын нэрэмжит олон улсын өсвөрийн төгөлдөр хуурчдын уралдааны Монголд болсон шалгаруулалт, тэмцээний тэргүүн байрт шалгарсан. Хэдийгээр Хонгконг явж дараагийнхаа шатад оролцох ёстой байсан ч Итали Улсад зохион байгуулагдсан тэмцээнтэй давхцаад оролцож чадаагүй.

-Тэмцээнд оролцох бэлтгэлээ хэрхэн хийсэн бэ?

                -Итали Улсад болсон тэмцээнээсээ өмнө хэд хэдэн уралдаан оролцсон юм. Тэгхээр байнгын бэлтгэлтэй байсан л даа. Хичээлээс гадна өдөр бүр дөрвөн цаг төгөлдөр хуураа бэлдсэн. Норовбанзад сангийн нэрэмжит төгөлдөр хуурын тэмцээнд ороод дэд байрт шалгарчихсан учраас "IBLA Grand Prize" тэмцээнд заавал ялна гэж өөртөө амласан юм.

-Ийм мундаг төгөлдөр хуурч болох эхлэлийг хэзээ тавьсан юм бэ. Хэдэн настайгаасаа төгөлдөр хуур тоглож эхлэв?

                -Би таван настайгаасаа төгөлдөр хуур тоглож эхэлсэн. Манай дунд ахын төрсөн өдрөөр авга эгч минь төгөлдөр хуур бэлэглэсэн юм. Тэгээд ахтайгаа хамт гэрийнхээ хажууд төгөлдөр хуурыг дугуйланд явж эхэлсэн. Дугуйлангийн минь багш “Авьяастай юм байна, Монгол Улсын консерваторт шалгалт өгөөд үзээрэй” гэсэн юм. Шалгалтдаа тэнцэж, О.Лхагвасүрэн багшийнхаа шавь болсон доо.

ААВ, ЭЭЖИЙНХЭЭ ДУРТАЙ АЯЫГ ТОГЛОЖ ӨГӨХ ХАМГИЙН САЙХАН

-Ах нь төгөлдөр хуураа тоглож байгаа юу, гэр бүлд нь өөр хөгжим тоглодог хүн бий юү?

                -Ах минь одоо хичээлээ хийгээд завгүй байгаа. Манай гэр бүлд хөгжим тоглодог хүн байхгүй ээ. Би анхных нь, гэрийнхэн минь миний хөгжим тоглож байгааг сонсох дуртай. Дахиад, дахиад тоглоод өг гэдэг юм. Шинэ жилээр гэрт ирээд “За, Г.Бадмаарагийнхаа тоглолтыг үзье, хөгжим тоглоод өг” гэдэг. Аав, ээждээ уянгын ая тоглож өгөх их дуртай. Би дугуйланд явж эхэлсэндээ, төгөлдөр хуур тоглож сурсандаа үргэлж талархдаг.

-Тэгвэл чи хэний ямар хөгжмийн зохиолыг тоглох хамгийн дуртай юм бэ?

                -Вольфганг Амадей Моцарт, Ференц Листын зохиолыг тоглох дуртай. Хөнгөн, хөгжилтэй хэмнэлтэй учраас үнэхээр гоё байдаг юм.

-Тэмцээнд оролцохоосоо өмнө, тайзан дээр гарахаасаа өмнө заавал хийдэг зүйл бий юү?

                -Би бээлий өмсдөг. Гар даарчихвал илүү сандраад төгөлдөр хуур тоглоход хэцүү болчихдог юм. Эмээ минь намайг сандарчихвал гүнзгий амьсгаа аваарай гэдэг юм. Тиймээс өөрийгөө тайвшруулах гээд гүнзгий амьсгаа авдаг.

-Хамгийн анх тайзан дээр гарахад ямар мэдрэмж төрсөн бэ?

                -Нэгдүгээр ангид байхад долоон ноотоо цээжилсэн гээд “Долоон ноотны баяр” гэж хийдэг юм. Тэр үед анх удаа тайзан дээр гарсан. Жаахан байсан учраас бага зэрэг сандарсан. Дараа нь, гуравдугаар ангидаа анх бие даасан тоглолтоо хийсэн. Өмнө нь олон тоглолтод орж байсан ч бие даасан анхны тоглолт учраас бүр онцгой тайз байсан. Гэрийнхэн минь бүгд ирж, тоглолтод ирж, намайг үзэж, магтсан.

-Төгөлдөр хуур тоглоход ямар бэрхшээл тулгардаг вэ. Тэр бэрхшээлийг хэрхэн давж гарч байна?

                -Миний хурууны сунгалт жаахан муу, тэгэхээр хүссэнээрээ хөгжмөө тоглож чадахгүй байгаа юм. Үүнийгээ сайжруулахын тулд байнга дасгал хийж байгаа. Гэр бүл минь надад итгэдэг учраас бэрхшээл бүрийг даваад гардаг.

-Үргэлж дэмждэг багш, гэр бүлийнхэндээ хандаж үг хэлмээр байна уу?

                -Намайг үргэлж дэмжиж, хайрладаг, надад итгэдэг багш нартаа, гэрийнхэндээ хайртай шүү, баярлалаа. Ирээдүйд сайн хүн, сайн төгөлдөр хуурч болчхоод ачийг нь хариулна аа.

-Чиний мөрөөдөл юу вэ?

                -Би сайн төгөлдөр хуурч болохыг хүсдэг. Вольфганг Амадей Моцартын төрсөн нутагт очиж төгөлдөр хуураараа илүү хичээллэж, сурахыг хүсэж байгаа.