Хийн буудлагын ихэр тамирчид болох Я.Маргад, Я.Марал энэ удаагийн “Монголын  гэрэлт ирээдүй” буландаа урьж, ярилцлаа.

        Тэд Сэлэнгэ аймгийн Мандал сумын Ерөнхий боловсролын III сургуулийн 10В ангид суралцдаг. Ихэр охид саяхан хамтдаа Спортын мастер цолны болзлыг хангасан билээ.

-Сайн байцгаана уу. Хэзээнээс буудлагын спортоор хичээллэж эхэлсэн бэ, түүхээ хуваалцаач?

        -Я.Марал:Өнгөрсөн жил манай ангийн найз Т.Максим буудлагын спортоор хичээллэдэг юм. Тэгээд бид хоёрт сонирхуулаад л бид хичээллэж үзсэн дээ.  Бид хоёр нэг жилийн дотор спортын мастер цол хангасан.

-Буудлагын спорт тэвчээр, анхаарал шаарддаг шүү дээ. Спортын олон төрлөөс буудлагын спортын татсан бэ?

          -Я.Маргад:Хичээллэж эхлээд сорилт өгөхөд, бодсоноосоо сайн буудсан. Тэгээд цаашдаа хичээллэх юм бол  илүү сайжрах юм байна гэж бодоод буудлагын спортыг сонгож байсан даа.

-Анх ямар багш дээр хичээллэж эхэлсэн бэ?

       -Я.Маргад:Анх спортын мастер Э.Юмжирмаа багш дээр өдийг хүртэл хичээллээд явж байгаа.  Хийн буудлагаар хичээллэж байгаа хүмүүс суурь техникүүдээ тавиад галт зэвсэг лүү орвол илүү сайн сурдаг юм шиг санагдсан.

      Я.Марал: Энэ дашрамд богино хугацаанд амжилтад хүргэж, буудлагын спортод хөтөлж оруулсан дасгалжуулагч багшдаа маш их баярлаж гэж хэлмээр байна. Мөн Сэлэнгэ аймгийн буудлага спортын хорооны удирдах зөвлөл, Сэлэнгэ аймгийн Мандал сумын Засаг дарга н. Дашцэвэг, “Спирт Бал Бурам” ХХК захирал н.Чинтогтох нарт талархсанаа илэрхийлье.

-Тэмцээний өмнө бэлтгэлээ хэрхэн хангадаг вэ, хүндрэлтэй зүйлс байдаг уу?

        -Я.Маргад: Олон тэмцээн уралдаанд явахаар ивээн тэтгэгч багатай болохоор өөрсдөө зардлаа гаргах үе ч байдаг. Бэлтгэл сургуулилт хийхэд тийр, талбайн хүрэлцээ муу байдаг. Мөн техник, тоног төхөөрөмж авъя гэхээр санхүүгийн асуудал тулгарах үе бий. Бид хоёр чинь арван жилийн сурагч болохоор байнга аав, ээжээсээ аваад  байх хэцүү шүү дээ.

         Я.Марал: Буу сумны хангамж муу байдаг учир бид хоёр багшийнхаа нэг буугаар ээлжилж буудаж ээлжилж бэлтгэл сургуулилтаа хийдэг.

-Анхны тэмцээн хамгийн дурсамжтай байдаг шүү дээ. Тухайн үеийн дурсамжаасаа хуваалцаач?

             -Я.Марал:Хамгийн анхны тэмцээн болох “Үнэ”н сонины нэрэмжит “Сүхбаатарын мэргэн бууч” тэмцээнд оролцсон. Тухайн үед бага зэрэг сандарч байсан ч сайхан байсан.

          Дараа нь Холбооны цомын тэмцээнүүд, Сэлэнгэ аймгийн аварга шалгаруулах тэмцээн, Залуучуудын улсын аварга, Монголын хүүхдийн спортын зуны VII наадам, Эрдэнэт хийн буудлагын нээлттэй тэмцээнд тус тус оролцсон.

-Гэр бүлийнхээ талаар яриа дэлгээч, та хоёрыг спортоор хичээллэхэд хэр дэмждэг вэ?

        -Я.Марал: Аав маань хувиараа хөдөлмөр эрхэлдэг. Ээж маань тэтгэвэрт байдаг. Бид хоёр багаасаа ээж аавдаа тусалж төрөл бүрийн ногоо тарьж ирсэн. Манайх ам бүл дөрвүүлээ, гэр бүл маань биднийг маш их дэмждэг. Өглөө хичээлдээ яваад өдөр ирэхэд ээж маань хоол хийгээд хүлээж байна. Харин аав маань байнга хүргэж өгч, авдаг даа.  Аав маань буудлаганд маань сайн санаа тавьж зөвлөж судалгаа хийж ярилцдаг. Гэр бүлийнхээ хүрээнд байнга зөвлөж ярилцаж, сэтгэл ссанаагаар дэмжиж байдаг даа.

-Ихэр заяанд төрж, хамтдаа спортоор хичээллэх сайхан шүү дээ.  Тэр талаар яривал

        -Хоёр биендээ спортынхоо талаар ярилцаж ямар ч асуудал дээр хоорондоо зөвлөлдөж бие биенийхээ алдаа оноог ярилцдаг.

-Ирээдүйн мэргэжлээ сонгосон уу, цаашдын зорилгоосоо хуваалцаач?

         -Буудлагынхаа спортоор үргэлжлүүлэн хичээллэж мэргэжлийн тамирчин болохыг хүсдэг. Буудлагынхаа спортоор чадах чинээгээрээ амжилт гаргахыг хичээж явдаг.

-Ярилцсанд баярлалаа. Тэмцээнд нь амжилт хүсье.

          -Баярлалаа.