Өсвөр насныхны хамгийн их үзэх дуртай “Girls” цувралын жүжигчин, “Girls” хамтлагийн дуучин О.Энхжинтэй ярилцлаа. Тэрбээр “Шилдэг тоглогч” цувралд ажилласан билээ.

-Танд энэ өдрийн мэнд хүргэе. “Girls” кинонд тоглох болсноо мэдээд юу мэдэрсэн бэ. Уран бүтээл дээрээс өөрийгөө үзэх ямар санагдсан бэ?

                -Уншигчдадаа энэ өдрийн мэнд хүргэе. Анх киноныхоо шалгаруулалтад тэнцсэн гэдгээ мэдээд итгэж өгөхгүй, “Нээрээ тэнцсэн юм байхдаа” гээд зөндөө баярлаж байсан. Догдлол, айдас, сандрал ч байсан. Уран бүтээл дээрээс өөрийгөө харах гоё байдаг юм билээ. Киноны төгсгөлд жүжигчдийн нэрс дундаас өөрийнхөө нэрийг хараад үнэхээр том зүйлийн ард гарсан өөрөө бахархсан.

-“Girls” хамтлаг анх хэрхэн нэгдэв. Анхны дуу нь хандалт өндөртэй байсан шүү дээ. Юу мэдэрсэн бэ?

                -Манай хамтлаг гурван хүний бүрэлдэхүүнтэй охидын хамтлаг. Бид гурав анх “Girls” киноны гуравдугаар  бүлгийн шалгаруулалт дээр танилцаж байсан. Төслийн хүрээнд бидэнд хамтдаг болох санал тавьсан. Гишүүд маань бүгд тун баяртайгаар хүлээж авсан даа. Бидний хамгийн анхны уран бүтээл тэгж олон хандалт авна гэж төсөөлөөгүй ээ. Мөрөөдөл биелэх мөч үнэхээр гоё юм билээ.

-“Шилдэг тоглогч” кинонд ажилласан юм билээ. Шинэ уран бүтээлд тоглох ямар байв?

                -“Шилдэг тоглогч” киноны Номингийн дүрд ажилласан. Шинэ уран бүтээлд өөр дүр төрхөөр тоглох сайхан байлаа.  Манай  “favway”нэгдлийн ах эгч нар киноны зураг авалтын үеэр  надад их тусалсан. Энэ завшааныг ашиглаад баярлалаа гэж хэлмээр байна.

-Спортын сургуулийн сурагчийн дүр шүү дээ. Тус дүрээс сурч, мэдэх зүйл олон байв уу?

                -Үнэхээр олон зүйл сурч мэдсэн. Эхлээд спортын тамирчин охины дүр учраас чадах болов уу гэж санаа зовж,  бодож байлаа. Дүр дээрээ ажиллахад манай “favway”  уран бүтээлийн нэгдлийн ах эгч нар, гол дүрийн жүжигчид, найруулагч сайн тусалсан.

-Ерөнхий боловсролын сургуулийн сурагч шүү дээ. Хичээлийнхээ хажуугаар уран бүтээлийнхээ ажлын хэрхэн цалгардуулахгүй хийдэг вэ?

                -Хичээлүүдээ аль болох л цалгардуулахгүй байхыг хичээдэг. Хувийн зохион байгуулалт төлөвлөгөөтэй байж, хичээлүүд болон уран бүтээлийн ажлаа орхигдуулахгүй хийдэг.

-Яагаад жүжигчин болохоор шийдсэн бэ. Ирээдүйн мэргэжлээ сонгосон уу?

                -Би багаасаа урлагийн хүн болно гэж мөрөөддөг байсан . Хүсэл мөрөөдлийнхөө төлөө болон  хүнд өгсөн амлалтынхаа төлөө жүжигчин болъё гэж шийдсэн. Би ажлаа хийж байхдаа хамгийн жаргалтай эрч хүчтэй байдаг. Ирээдүйд өмгөөлөгч болно гэж бодож байгаа гэхдээ урлагийн ажлаа орхигдуулахгүй хийнэ ээ.

-Мэргэжлийн жүжигчин биш шүү дээ. Кинонд ажиллах ямар байв?

                -Анх  үнэхээр гайхаж байсан. Гуравхан минутын дүрс авах гэж  олон хүний хүч хөдөлмөр шаарддаг юм билээ. Кинонд ажиллахад минь олон хүн тусалсан. Тэр хүмүүсийн ачаар би дүр дээрээ ажиллахад олон хүндрэлтэй учраагүй ээ.

-Багийнхан нь “Girls” киногоороо дамжуулж үзэгчдэд ямар мэдрэмж, ойлголт өгөхийг зорьсон бол?

                -Манай үеийнхэн дунд байгаа үе тэнгийн гадуурхалтыг зогсоох, энэ буруу зүйл гэдгийг харуулахыг хүссэн. Мөн сайн найзуудын нөхөрлөл, хайр дурлал, өрсөлдөөн гээд  олон зүйл агуулагдсан.

-Олны танил байж анхаарлын төвд орох ямар байсан бэ?

                -Хүн болгоны харах хүлээж авах өнцөг нь өөр байсан. Хүүхдүүд надаас үлгэр дуурайлал авч байгаа гэж бодоод биеэ зөв авч явахыг хичээж тэдэнд зөвийг үлгэрлэхийг хичээдэг.

-Дараагийн зорилго төлөвлөгөө нь юу вэ?

                -Одоогоор аравдугаар ангиа сайн төгсөхийг хүсэж байна. Мөн дараа дараагийн уран бүтээлээ гаргана. Ярилцлагыг минь уншсан хүмүүст энэ өдрийг сайхан өнгөрүүлээрэй ахиж олдохгүй үнэ цэнтэй шүү гэж хэлмээр байна.