“Ерөнхийлөгчийн илгээлт 2100” тэтгэлэгт хөтөлбөрийн эзэд аав, ээждээ үнсүүлээд  ихийн сурч, мэргэжил эзэмшихээр явлаа. Тэд бүгд ихийг мэдэх хүслээр жигүүрлэж, хамгийн гэгээн мөрөөдлийг мөрөөдөж байгаа. Ерөнхийлөгчийн тэтгэлэгт Архангай аймгийн Өлзийт сумаас шалгарсан Н.Хонгорзултай ярилцлаа. Тэрбээр программ хангамжийн чиглэлээр Герман Улсад суралцахаар явсан юм.

-Танд энэ өдрийн мэнд хүргэе. Манай уншигчдад өөрийгөө танилцуулаад яриагаа эхлэх үү?

                -Сайн байна уу, намайг Насантогтохын Хонгорзул гэдэг. Архангай аймгийн Өлзийт сумаас “Ерөнхийлөгчийн илгээлт-2100” тэтгэлэгт хөтөлбөрт шалгарсан. Багаасаа олимпиад уралдаан тэмцээнд оролцож ялж, ялагдаж сурсан минь өнөөдрийн намайг бүтээж, энэ хүртэл явах хөшүүрэг минь болсон байх.

-Ерөнхийлөгчийн илгээлтийн эзэн болсон сэтгэгдлээсээ хуваалцахгүй юу?

                -Арванхоёрдугаар ангидаа математик, физикийн чиглэлээр үргэлжлүүлэн сурна гэж төлөвлөсөн. Ерөнхийлөгчийн тэтгэлэгт орохын тулд англи хэлээр ЭЕШ өгсөн. Хамгийн итгэлтэй шалгалт өгсөн математик дэрээ сансандаа хүртэл оноо аваагүй учраас жаахан урам хугарсан. МУИС-ийн ХШУИС-д суралцаж байх үед ерөнхийлөгчийн тэтгэлэгт тэнцсэн талаарх мэдээ ирсэн. Зорьсондоо хүрсэндээ хамгийн их баярласан. ЭЕШ-ынхаа оноог мэдэж байсан учраас тэнцэнэ гэдгээ мэдэж байсан. Гэхдээ яг тэнцсэн гэссэн мэдээ хараад догдолж мөн маш том үүрэг хариуцлага ирж байгааг ойлгосон. Өнөөдрийн Хонгорзулыг бүтээхэд тусалж, зөвлөсөн бүх хүмүүстээ баярлалаа.

-Гэр бүл багш нар нь их бахархсан байх тэдэнд баяр мэдээгээ хуваалцах ямар байсан бэ. Хэрхэн хүлээж авав?

                -Гэр бүл минь надад хамгийн сайн хүмүүжлийг өгсөн. Бүх зүйлийг бие дааж хийж сурсан минь миний хамгийн том эрдэм. Одоо маш их хэрэг болдог. Багаасаа хичээл хэнээр ч хэлүүлэхгүй хийдэг байсан. Намайг тэтгэлэг авахад над шиг их баярласан хүмүүс гэр бүл минь байсан. Энэ хүртэл дэмжсэн бүх хүмүүстээ баярлалаа. Ээж минь “Эзэн хичээвэл заяа хичээнэ” гэж их хэлдэг. Би энэ үгийг өдөр бүр бодож, хичээсэн.

-Герман Улсад сурахаар шийдсэн юм билээ. Ямар чиглэлээр сурах гэж байна?

                -Герман Улсын амар тайван амгалан байдал, уур амьсгал нь таалагдсан учраас сонгосон. Одоо программ хангамжийн чиглэлээр сурах гэж байна. Хичээл маань өнөөдөр эхэлж байгаа.

-Юу сурч ирээд эх орондоо хэрэгжүүлэхийг хүсэж байгаа вэ?

                -Эх орондоо акдемик мэдлэг эзэмшээд очино. Дэлхийн өнцөг булан бүрээс их зүйл сураад ирж байгаа залуустайгаа олон зүйлийг хийнэ гэж төлөвлөж байна. Бид гадаад явж сурдаг биш, тэд Монголд ирж сурахыг хүсдэг улс болгож хөгжүүлэхийн төлөө суралцаад ирнэ.

-Суралцах хугацаандаа юуг хамгийн их сурах хүсэлтэй байгаа вэ?

                -Суралцах хугацаандаа хичээлээ сайн сурахын хажуугаар Герман Улсын соёл болон хэрхэн гадаад оюутан залуусыг улсдаа татаж байгаа талаар нь судалж, мэдмээр байна.

-Яагаад программистаар сурахаар шийдсэн юм бэ?

                -Багаасаа компьютероор тоглох дуртай байсан. Мөн математик, физикийн хичээлд дуртай байсан нь гол шалтгаан байсан байх. Миний зан аашинд  хамгийн их тохирсон байсан. Гэр бүлийнхээ эн чиглэлээр ажилладаг хүмүүсээс их урам зориг авсан.

-Өөр тэтгэлэгт хөтөлбөрт хамрагдаж байв уу. Тэтгэлэгт хамрагдахад юуг хамгийн их анхаарах хэрэгтэй вэ?

                -Арванхоёдугаар ангидаа Хаан банкнаас их сургуулийн эхний жилийн төлбөрийн тэтгэлэг авсан. Гэхдээ ерөнхийлөгчийн илгээлт эхний жилийн хэлний бэлтгэлийн төлбөрийг хүртэл төлсөн учраас Хаан банкны тэтгэлээ буцааж, дараагийн хүүхдэдээ шилжүүлсэн.

-Ерөнхийлөгчийн тэтгэлэгт хамрагдсан туршлагаасаа дүү нартаа хуваалцвал. Юу дээр хамгийн их анхаарах хэрэгтэй юм шиг санагдсан бэ?

                -Тэтгэлэг авахад хувь хүний бодол, хичээл зүтгэл хамгийн чухал. Өнөөдөр бидний хаана байгаа чухал биш, маргаашийнхаа төлөө өнөөдөр юу хийж байгаа нь чухал. Ерөнхийлөгчийн илгээлтэд хамрагдаж, тэтгэлэг авснаар үе тэнгийн олон манлайлагч хүүхдүүдтэй найзууд болсон. Сайхан орчин угтсан. МУИС-ийн  гадаад хэлний танхим багш нар болон биднийг сургуульдаа ирэх хүртэл санаа тавьж, тусалсан Ч.Лодойравсал ахал маш их баярлалаа. Бидний төлөө санаа тавьж, онгоцонд суухын өмнө нулимс дуслуулж байсан.