Уяхан цэнхэр хавраа үдээд, мэргэжлээ сонгох торгон мөчид сандран, догдолж суугаа Архангай аймгийн Лаборатори нэгдүгээр  сургуулийн 12А ангийн сурагч Мөнхбатын Хунцэнгэлтэй цөөн хором ярилцлаа. Тэрбээр Элсэлтийн ерөнхий шалгалтаа математик, англи хэл, физикийн хичээлээр өгсөн бөгөөд математикийн хичээлээр 800 оноо авсан билээ.

-Сайн байна уу. Элсэлтийн ерөнхий шалгалтдаа 800 оноо авсан сэтгэгдлээсээ манай уншигчдад хуваалцаач?

                -Шалгалтнаасаа гараад, оноогоо харж чадахгүй их сандарч байсан. Дэлгэцээр оноо гарах үед нэг хүүхэд 800 оноотой гараад ирсэн. Тэгээд өөрийгөө гэдэгт итгэхгүй дахин дахин нүдээ арчаад харсан. Сургуулиасаа гарч ирээд багшдаа хэлтэл багш минь намайг тэврээд “Баярлалаа” гээд уйлсан.  Гэр бүлийнхэндээ одоогоор дуулгаж амжаагүй байна.

-Хэр хугацаанд бэлтгэсэн бэ?

                -Би гуравдугаар ангиасаа хойш математикийн хичээлийг гүнзгийрүүлэн судалж, аймаг, бүс, улсын олимпиадад оролцож ирсэн. Элсэлтийн ерөнхий шалгалтдаа сүүлийн сар гаруйн хугацаанд өмнөх оны материалуудыг сайн ажиллаж л бэлтгэсэн дээ.  Багаасаа математикаар хичээллэсэн болохоор сургуулийнхан, гэр бүл минь намайг “800 оноо аваарай” гэж байсан. Яг шалгалтаа өгсөн чинь надад итгэж буй хүмүүсийн итгэлийг алдахвийдээ гэж их сандарч байсан. Одоо уужраад, инээгээд л баймаар сайхан байна.

-Математикийн хичээлийг олон жил тууштай судалжээ. Энэ талаар яриа дэлгээч?

                -Математик хүнд маш их зүйлийг өгдөг гэж би хувьдаа боддог. Тоо бодсоноор хүн төвлөрч, удаагаар хугацаагаар тууштай сууж, аливаа зүйлийг утга учрыг богино хугацаанд олж сурна.  Математикийг сурсан хүн цаашдаа юуг ч амархан сурдаг байх.

-Мэргэжлээ сонгосон уу?

                -Монгол Улсын Их Сургуульд IT-ийн чиглэлээр суралцах бодолтой байгаа. Техник технологи асар хурдтай хөгжиж буй энэ үед хамгийн тохиромжтой мэргэжил гэж бодож сонгосон.

-Хүний амьдралын хамгийн жаргалтай, гэгээн, нандин үе сурагч нас байдаг гэдэг. Ангийн найзууд болон багш нарынхаа тухай дурсамж яриа дэлгээч?

                -Ангийнхан минь нэгнээ аливаа тэмцээн уралдаанд ороход нь их дэмжинэ. Хааяа багшаас нууцаар ангидаа хөзөр тоглох сайхан байдаг. Ер нь тэгээд сурагч нас минь тэр чигээрээ дурсамжаар дүүрэн сайхан өнгөрсөн дөө. Одоо ингээд өөр өөрсдийн сонгосон замаар салаад явна гэхээр нэг л хорогдох сэтгэл төрөөд л байх юм. Хэрвээ болдогсон бол үргэлж л сурагч баймаар байна.

-Ярилцлагын төгсгөлд дүү нартаа зөвлөгөө өгөөч?

                -Аливаа зүйлд тууштай байгаарай. Элсэлтийн ерөнхий шалгалтаа тулгаж битгий бэлдээрэй. Шалгалтад ороод тайван байгаарай, амжилт хүсье.