Реппер MO’G-ийн  “Mongol swag”  дууг өөрийн хэв маягт оруулан, тун эвлэгхэн дуулж сонсогчдын хайрыг татаад буй Б.Чойнямыг “Гэрэлт ирээдүй” буландаа урьж, цөөн хором ярилцлаа.           

-Сайн байна уу. Манай уншигчдад өөрийгөө танилцуулаач. Аль нутгийнх вэ?

    -Эргэлт.мн сайтыг уншиж буй та бүхэнд энэ өдрийн мэндийг хүргэе. Баянхонгор аймгийн Баянлиг сумын Ерөнхий Боловсролын Сургуулийн  12 дугаар ангийн сурагч Батжаргалын Чойням байна.

-Багаасаа дуулдаг байв уу. Гэр бүлд нь урлагийн хүн байдаг уу?

       -Багаасаа дуулах сонирхолтой, дуу аялаад л сууж байдаг хүүхэд байлаа. Урлагийн авьяастай хүмүүс  манай гэр бүлд олон бий. Гэхдээ мэргэжлийн уран бүтээлч хүн байхгүй.  

-“Mongol swag”  дууны ковер гарсан цагаас хойш цахим сүлжээнд та хоёрын тухай хүмүүс сайхан сэтгэгдэл олныг бичиж байна. Үүнийг яаж хүлээж авч байна вэ?

               -MO’G-ийн ковер дууны тэмцээнд түрүүлсэн нь илүү ихийг хийх очлуур болсон. Сонсогчдын хайртай энэ дууг сонгоод жаахан айдастай байсан. Дуучинд нь таалагдсанд баяртай байгаа. Мөн цахим сүлжээнд эерэг сэтгэгдэл бичиж, урам хайрлаж байгаа хүмүүст чин сэтгэлээсээ талархал илэрхийлье. Илүү чанартай уран бүтээлүүдээр бэлэг барих болно оо. 

-Та хоёрын нөхөрлөл хэзээнээс эхэлсэн бэ. Цаашдаа хамтлаг болж уран бүтээлүүд гаргах уу?

               -Анх Хуягаа ганцаараа ковер дуулдаг байсан. Өнгөрсөн багш нарын баяраар бид хоёр санаандгүй байдлаар хамтдаа дуулсан. Өмнө нь нэгнийгээ таньдаггүй байсан. Одоо сайн найзууд бас хамтрагчид болсон байна. Бид хоёрын нөхөрлөл дуу хөгжимтэй салшгүй холбоотой болохоор хамтдаа уран бүтээлүүд гаргах бодолтой байгаа.

-Хамтдаа чөлөөт цагаа хэрхэн өнгөрүүлдэг вэ?

               -Сонирхол нэг найзтай байх сайхан шүү дээ. Бид хоёр чөлөөт цагаараа дууны ковер хийдэг. Илүү чадварлаг болохын тулд нэгнийхээ хөшүүрэг болж, алдааг нь хэлж өгдөг.

-Хөгжим тоглодог уу?

               -Гитар тоглодог, цаашдаа илүү хөгжүүлэхийг эрмэлзэж байгаа.

-Үлгэр дуурайлал авч, дууг нь дагаж дуулах дуртай дуучин байгаа юу?

               -Gee, Rokit bay, Desant нарыг хүндэлж, дууг нь сонсох дуртай. Дуунууд нь гүнзгий утга санаатай, ухаарал хайрласан санагддаг.  Бас тэдэн шиг олны хайр, хүндэтгэлийг хүлээсэн уран бүтээлч болохыг дотроо нууцхан хүсэж явдаг.

-Өөрсдөө дуу зохиож байсан юм билээ. Тэр талаараа яриа дэлгээч?

               -Ирээдүйд дуучин болохын тулд өөрсдөө үгээ бичиж сурах хэрэгтэй. Бичих тусам илүү сайжирч байгаа. Хэдий нийтлээгүй ч бичиж байсан дуунуудаа эргээд харахаар сайжирч байгаагаа мэдэрдэг.  

-Хэн нэгэнд зориулж дууны үг бичиж байв уу?

               -Хамгийн сүүлд “Алдагдсан сэтгэл” гэх дууг  нэг хүнд зориулж хийсэн. Хэнд гэдгийг нь хэлмээргүй байна.

-Цаашдаа ямар мэргэжлээр суралцах бодолтой байгаа вэ?

               -Соёл Урлагийн Их Сургуульд дуулаачаар суралцахаар бэлтгэж байгаа. Чанартай уран бүтээл хийхийн тулд мэргэжлийн сургуульд суралцах, өдөр бүр өөрийгөө хөгжүүлэх хэрэгтэй гэж боддог доо.

-Ярилцсанд баярлалаа. Цаашдын уран бүтээлд нь амжилт хүсье.

               -Баярлалаа.