УОК-ын шийдвэрийн дагуу бүх нийтийн бэлэн байдлын хугацааг сунгасан. Энэ хугацаанд залуусын төлөөлөл юу хийж, хэрхэн хөгжиж буйг “Эргэлт.мн” сайт сонирхлоо. Хөл хорионы үеэр өөрийгөө хөгжүүлэхээр зорьж, хичээж буй багш, цэрэг, зохиолч мэргэжилтэй залуусын дуу хоолойг хүргэе.

С.Батзориг

/Сэлбэ сургуулийн Монгол хэл, уран зохиолын багш/

          Багш учраас өмнө нь хичээлээ заагаад, ном унших цаг бараг гардаггүй байлаа. Харин хөл хорио тогтоосноор багагүй цаг зав гарч байна. Карантинд Томас Манны "Венец дэх үхэл"-ийг уншиж дуусгалаа. Одоо худалдаж аваад бараг таван жил болсон ч унших цаг, нөхцөл бүрдэхгүй байсан “Түшмэл Мышкин”-ийг уншина. Хөл хорионы энэ цагийг ихэвчлэн "Монгол тулгатны зуун дуу" контентыг үзэхэд зориуллаа. Их ч сайхан контент юм. Тэдэн дундаа "Ханан сүлжээ нэхээс" хэмээх сэтгэлийн цэнгэл эдлүүлдэг нэгэн дуу бий. Мөн "Хан шувуу" гэж сайхан дууг олж сонсоод байна. Монгол дуу хуурын соёл хэчнээн шавхагдашгүй арвин болохыг мэдэрч сууна даа. Харин үеийн залуустаа хандаж “Урлагтай ойрхон хөлөө хориулцгаана шүү" гэж хэлмээр байна.

Г.Даваацэнд

/Залуу зохиолч/

              Өчигдөр цонх руугаа ширтэж суухдаа нисэж буй шувуудыг анзаарлаа. Үнэндээ, хүн төрөлхтөн шувуудаа торноос нь гаргаад, оронд нь өөрсдөө орсон мэт мэдрэмж төрсөн. Тэрхүү нь тор хэчнээн дулаахан, аюулгүй байдаг тухай бодож сууна. Хөл хорио эхлэхээс өмнө амжиж “Нэг килограмм үгс” өгүүллэгийн номоо хэвлэлтэд өгсөн. Одоогоор амьд хөгжим ихэвчлэн сонсож байна. Энэ насандаа хатуу төрийн нүүр үзээгүй, дайн, байгалийн аюулд өртөөгүй, бууны дуу сонсоогүй залуусын нэг байгаагийнхаа хувьд би гудамжаар баатарлаг алхаж чаддаггүй. Тийм ч учраас энэ цар тахлыг ялан дийлмээр санагдаж байна.

Н.Пүрэв-Очир

/Зэвсэгт хүчний дэд ахлагч/

           Хөл хорионы үеийг ашиглан гэрийн нөхцөлд бие бялдраа идэвхтэй хөгжүүлж байгаа. Мөн энэ хугацаанд “Шар хадны үлгэрүүд” хэмээн анхны яруу найргийн номоо хэвлүүлэхээр зэхээд байна. Цэргийн хүн учир утга зохиол, яруу найргийн бүтээлүүд унших цаг зав гардаггүй байсан юм. Мөн ирэх жилийн наймдугаар сард Герман Улсыг зорьж, суралцахаар төлөвлөж байгаа бөгөөд хэлээ сайжруулах сайхан боломж гарлаа.