-БИ БҮЖИГЛЭХЭЭРЭЭ ӨӨР ЕРТӨНЦӨД ОЧСОН ЮМ ШИГ Л БОЛДОГ-

         Дэлхийн аварга шалгаруулах тэмцээнээс мөнгөн медаль хүртсэн “Moon dance” хамтлагийг бид "Монголын гэрэлт ирээдүй" булангийнхаа энэ удаагийн дугаартаа онцолж байна. Тус хамтлагийн хамгийн балчир бүжигчин болох 130 дугаар сургуулийн 12 дугаар ангийн сурагч М.Цэлмүүнтэй Дэлхийн аварга шалгаруулах тэмцээнд хэрхэн оролцсон талаар нь ярилцлаа.

-Чамд болон танай хамтлагийнханд Дэлхийн аварга шалгаруулах тэмцээнээс мөнгөн медаль хүртсэнд нь баяр хүргэе. Чиний хувьд анхны Дэлхийн аварга шалгаруулах тэмцээн байв уу?

        -Биднийг Дэлхийн аварга шалгаруулах тэмцээнээс мөнгөн медаль авсанд манай хамтлагийн бүжигчид төдийгүй тэдний гэр бүлийнхэн, монголчууд маш их баярлаж байгаа. Биднийг өчигдөр  эх орондоо ирэхэд бүжигчдийн гэр бүлийнхэн бүгд цай, сүүнийхээ дээжийг хадаг, мөнгөн аягатай бариад угтаж авсан. Энэ нь биднийг улам бүр огшоосон баярт үйл явдал боллоо. Биднийг үргэлж дэмждэг, дэмжсээр байгаа бүх хүнд баярлаж байгаагаа илэрхийлье. Би “Moon dance” хамтлагт 2020 онд орсон. 2021 онд ДАШТ-д сэлгээ бүжигчнээр оролцож байсан ч энэ жил анх удаа тайзан дээр гарч бүжиглэсэн. Дэлхийн аварга шалгаруулах тэмцээний тайзан дээр бүжиглэнэ гэдэг миний хувьд үгээр хэлэхийн аргагүй сэтгэл хөдөлгөм, догдлол дүүрэн мөч байлаа. Мөн тэмцээний үеэр “Санаа зөв бол заяа зөв” гэдэг шиг өөрийгөө “Чадна, болно, бүтнэ” гэж зоригжуулсан. Тийм учраас олны өмнө тайзан дээр бүжиглэхдээ ямар нэгэн зүйлд санаа зовж, алдаа гаргалгүй амжилттай бүжиглэж чадсан гэж бодож байгаа. Тамирчин болон урлагийн хүн бүхэнд сэтгэл зүй маш чухал байдаг. Тиймээс бидний хамгийн чухал болоод хүнд бэлтгэл сэтгэл зүй байдаг.

-Дэлхийн аварга шалгаруулах тэмцээнд бүжиглэхдээ маш их догдолсон гэлээ. Харин айж, сандарсан уу?

     -Анх тайзан дээр гарахад их сандарч байсан. Харин бүжиг эхлэхээс өмнө хамтлагаараа нэгэн зэрэг амьсгалж, зэрэг алхахад маш их эрч хүч авч, сандрахаа больсон. Тэгээд бүжигтээ бүрэн орж, бодол, санаагаа төвлөрүүлж чадвал олон сар бэлдсэн бүжгээ амжилттай үзүүлж чадна гэдгээ мэдэрч эхэлсэн дээ.

-Чи бүжгийн урлагаас ямар мэдрэмж авдаг вэ. Бүжиг чамайг өөрчилж чадсан уу?

        -Бүжиглэхээр уйтгар гуниг, гомдол гээд бүгдийг нь мартаж, өөр ертөнцөд очсон юм шиг мэдрэмж авдаг. Бүжиг намайг олон зүйлийг амжуулахад сургасан. Мөн гэнэтийн нөхцөл байдалд өөрийгөө хэрхэн зөв авч гарах, тууштай шантрашгүй болгож сургасан гэж боддог. Өмнө нь олон удаа ганцаарчилсан бүжгийн төрлөөр хичээллэж, тэмцээнд ордог байсан. Тэгээд дэлхийн тайзан дээр бүжиглэдэг ах, эгч нарыгаа хараад тэдний нэг болж, Монгол Улсынхаа нэрийг дэлхийд гаргах юм сан гэх мөрөөдөлтэй болсон. Мөрөөдлийн минь нэгээхэн хэсэг биелэж буйд баяртай байгаа.

-“Moon dance” бүжгийн хамтлагт орох шийдвэрийг хэрхэн гаргаж байв. Хэн нэгэн нөлөөлсөн үү?

        -Манай гэр бүлийнхэнд урлагийн хүн байхгүй. Харин ээж минь залуудаа сонирхлоороо бүжиглэдэг байсан юм билээ. Энэ нь миний бүжигт дуртай болсон шалтгаануудын нэг байх гэж боддог. Магадгүй ээж намайг бүжигт хайртай бүжигчин болгосон ч байж мэднэ.

-Танай бүжгийн хамтлагийн үндсэн зарчим юу вэ. Бүгд нэг хүн шиг болж бүжиглэхийн тулд хэрхэн ойлголцдог вэ?

         -Манай хамтлагийн  баримталдаг зарчим бол монгол хүний ур чадварыг дэлхийд таниулах юм. Тийм учир бидний бүжигт монгол үндэстний хэв шинж, онцлогийг  агуулсан хөдөлгөөн олон байдаг. Хамтлаг гэдэг “Хамтаараа лаг” гэсэн үг шүү дээ. Тиймээс нэг хүн шиг зэрэг бүжиглэнэ гэдэг харж байгаа шиг амархан биш гэдгийг би хамтлагтаа орж байж л мэдэрсэн. Бүжигчдийн хурууны үзүүр хүртэл адилхан байх ёстой.  Олон жижиг зүйлийг ижилхэн болгоход тохирсон дасгал, хөдөлгөөн маш чухал байдаг. Тохирсон дасгалаа тоолж  хийж сурвал биесээ мэдэрч эхэлдэг юм билээ.

-Ах, эгч нартайгаа бүжиглэх үеийнхээ хүүхдүүдтэй бүжиглэхээс юугаараа ялгаатай вэ. Тэд чамд хэрхэн тусалдаг вэ?

        -Ах, эгч нар миний миний алдаа дутагдал, болохгүй байгаа зүйлийг  хэлж, хурдан засаж залруулахад үргэлж тусалж, дэмждэг. Тэгээд би олон жил бүжиглэсэн туршлагатай хүмүүсийг дагаж, хурдан  хөгждөг.

-Чи ямар мэргэжилтэй болохоор төлөвлөж байна вэ?

         -Би урлагийн олон салбарт хөрвөж болохуйц арт, энтэртайнмент менежментийн чиглэлээр суралцах сонирхолтой байгаа.

-Чи бүжигчин хүнийг ямар байх ёстой гэж боддог вэ?

      -Би бүжигчин хүнийг төрөл бүрийн бүжиг бүжиглэдэг, хөрвөх чадвартай байх ёстой гэж боддог. Тийм чадварлаг бүжигчин болохын тулд хичээж байгаа.

-Чөлөөт цагаараа юу хийдэг вэ?

        -Чөлөөт цагаараа кпоп ковер бүжгийн бичлэг хийж постлох эсвэл хамтлагаараа тэмцээнд ордог доо.

-Тэмцээнд оролцож байхад нь багш нар нь юу захиж, хэлсэн бэ. Чамд тэмцээнд оролцсон бүжгүүдийн аль элемент хэцүү байсан бэ?

      -Багш нар минь бидэнд “Тайван бүжиглээрэй,  сандарч болохгүй шүү” гэж захисан.