Цахим орчинд Зам тээврийн сайд асан М.Зоригтын буулгасан морь унаж, нум сум харвасан бяцхан охины зураг олон нийтийн анхаарлыг ихэд татаад буй. Тэгвэл түүнийг П.Ангараг гэдэг бөгөөд өдгөө долоо настай. Ахыгаа хүүхдүүдэд морь унаж, нум сум харвахыг зааж байгааг нь хараад харвах дуртай болсон хэмээн хэвлүүхэн ярих түүнтэй ярилцлаа.

-Төрсөн нутаг нь хаанах вэ гэдгээс яриагаа эхэлье?

-Хэнтий аймгийн Батноров суманд аав, ээж, ахтайгаа амьдардаг. Энэ жил хоёрдугаар ангийн сурагч болсон.

-Хэзээнээс нум сум харваж, морь унах болсон бэ. Юу нь гоё санагдсан болохоор нум сум харвах эрдэмд суралцах болсон бэ?

-Өнгөрсөн зун нум сум харваж эхэлсэн. Ах маань клубийнхээ хүүхдүүдтэй манай хашаанд бэлтгэл хийдэг байсан юм. Тэгээд л би ахынхаа тэр хүүхдүүдэд зааж байгаа байдлыг нь их ажигладаг байсан. Нэг удаа “Ах аа, би харваж үзье” гэхэд зөвшөөрсөн. Эхлээд огт харваж чадахгүй байсан. Харин хэд хэд харвасны дараа байгаа оносон. Тэгээд л би чадах юм байна гэж бодсон.

-Харин хэзээ морьтой харвахыг сурав?

 -Эхлээд нум сум харваж сураад, дараа нь морьтой харвадаг болсон. Ахдаа “Би морьтой харваж сурмаар байна” гэхэд унах эрсдэлтэй гээд хориглодог байсан. Тэгээд өнгөрсөн зун нэвтрүүлэгт оролцохоор хот руу явах болтол ах маань морьтой харвахыг зааж өгсөн дөө.

-Наадмын нэвтрүүлэгт оролцсон дурсамжаасаа бидэнтэй хуваалцвал?

-Ах намайг наадмын нэвтрүүлэгт орж, морьтой нум сум харвана гэхэд маш их баярласан. Бас хотод очиж нэвтрүүлэгт орох үеэр хүмүүс намайг “Ямар мундаг охин бэ. Улам сайн харваач болоорой” гэж урам өгсөн.

-Ах нь чамайг морь унаж, нум, сум харвахад нь юуг хамгийн их захидаг вэ?

-Эрхийвчилж байгаад гүйцэт татаж, байгаа онож харва гэдэг. Морьтой харвахдаа хамгийн гол нь эхлээд тэнцвэрээ олж, мориныхоо амыг сайн татсан байх хэрэгтэй гэж захидаг.

-Нум, сум харвахад гар нь өвддөг үү. Тийм үедээ тэсээд харваад байх уу, больё гэдэг үү?

-Эрхий хуруугаар өвддөг болохоор гараа жаахан амрааж байгаад харвадаг. Харвахгүй удахаар илүү өвддөг.

-Өөрийнхөө морь унаж, нум сум харваж байгаа зургаа харахад ямар санагдсан. Тэр зургийг хэзээ авахуулсан бэ?

-Их гоё санагдсан. Аав, ээж, ах маань миний зургийг хараад, “Сайн байна. Улам сайн мундаг харваач болоорой” гэсэн. Тэр зургийг би өнгөрсөн зун наадмын нэвтрүүлэгт оролцохоор хот руу явсан юм.

-Одоо бэлтгэлээ хийж байна уу?

-Цар тахал гарсан гээд бэлтгэл хийхгүй байгаа.

-Морь унаж, нум сум харвахаас өөр ямар сонирхолтой вэ. Том болоод ямар мэргэжилтэй болно гэж боддог вэ?

-Том болоод нум сум харвадаг хүн болоод хүүхдүүдэд зааж өгнө. Мөн загвар өмсөгч, тогооч, зураач болохыг хүсдэг.

-Ярилцсанд баярлалаа. Монголынхоо нэрийг гаргасан нум сум харваач болоорой.

-Надаас ярилцлага авсанд баярлалаа. Танд бас амжилт хүсье.