ЖАРГАЛ,СҮНДЭР ХОЁРЫН ХАЙРЫН ТҮҮХИЙГ БИ Ч МӨН ДУРЛАН СОНСЛОО

Д. Бямбасүрэн:
Соёл урлаг

2023-10-07, 1052

Сайхан хайрын түүх сонсохоор нэг тийм сэтгэл үймэрч байснаа уужрах шиг, дотор минь хөндүүр оргиод байсан шарх минь эдгэх шиг, бачууран яахаа мэдэхгүй суухад минь бүхнийг амар тайван болгох шиг мэдрэмж надад лав төрдөг юм байна. Үүнийг өчигдөр Цэнгэлийн яриаг чагнахдаа мэдсэн юм. Хүүхэлдэйн театр руу ирж явахдаа би жүжиг үзнэ гэж зорьсноос сайхан хайрын түүх сонсож, бүр тэр хайрынх нь гэрч болж, нэгнийхээ зүрх сэтгэлийн гүн рүү нэвтрэн зорчих виз олгоход нь гэрч болно гэж санаагүй. Тэгэхээр энгийн нэгэн жүжиг гэхээс илүү бүр хэзээ ч мартагдахгүй хайрын түүхийг нам суугаад дурлан сонслоо.

Жаргалд, баярлалаа. Анх Цэнгэлтэй хамт “Анхны харцаар дурлаж чадах уу” гэх реалити шоу хийнэ гэхэд нь “Өө, энэ ч дээ” гэж хөнгөн бодож, түүнийг нэг тийм үл бүтэх, хайр сэтгэлийн сайханг үл мэдэгчээр ойлгож байлаа. Бүр түүнийг хэн нэгэнд дурлаад, бүр бүхнээс татгалзаж чадна, томоожно, даруухан болно чинээ төсөөлөөгүй. Гэтэл тэр Сүндэрийг хараад л балмагдчихсан, бүр гүн дурлаж, харцаа ч салгаж чадахгүй байдалд орж, өнөө зугаа цэнгэл, жаргалд дуртай хүн тэрхэн зуурт хувирч, ёстой л хайр сэтгэлийн өмнө нуран унасан. Жаргалыг ийн үзэгчдийн нүдэн дээр өөрчлөгдөж, өсөхөд нь “Сүндэрээ айлтгүй ээ, битгий зугатаа, наад Жаргал чинь чамд үнэхээр хайртай болсон. Анх зорилго өөр байсан нь үнэн” гэж шууд очоод хэлчихмээр, үгүйдээ л сэмхэн шивнэчихмээр байсан ч алив нэгэн зохиол, жүжиг, кино, хайрын түүх ээдрээтэй, адал явдалгүй бол амтгүй гэдгийг ойлгон зохиолч Ц.Балдорж, найруулагч М.Батболд нарынхаа аясыг харан л суулаа.

Гэхдээ хайр гаднаа хэдий үгүйсгэн байсан ч мөн чанартаа хүний зүрх сэтгэлийг хүчтэйгээр ховстон татаж, тэрхүү зүрх сэтгэлийнхээ эрхэнд хүн өөрөө ордог гэдгийг Сүндэр хамгаас их мэдэрсэн байх.

Анх тэр Жаргалд дургүйхэн хандахдаа хэдийнэ дурласан байв. Цэнгэл, Ану хоёр яах вэ. Тэднийг тодотгож, эвлүүлж, жаахан холдуулж, цаад чанартаа нэгтгэсэн л хүмүүс. Энэ дунд үл ойлголцол, багахан зөрөлдөөн, хувийн асуудлын хутгалдаан, тэдний хайр сэтгэлийг ашиглан ашиг хонжоо хайсан зүйл мэдээж гарах нь тодорхой. Хамгийн гол нь хайр сэтгэл тоглоом наргиан, шоун цэнгээн биш юм гэдгийг эл жүжиг бидэнд бат нот хэлж өгч байна. Нэг зүйлийг мартаж, магад бусад ч анзаарсан байх. Сайн бодвол, Жаргал анхнаасаа л аливаад үнэнч нэгэн байж. Тэр жүжиг эхлэхэд Цэнгэлтэй шоугаа хийх тухай төлөвлөн ууж явахдаа “Жинхнээсээ анхны харцаар дурладаг нэвтрүүлэг хийнэ” гээд байсан даа. Цэнгэл “СУИС-аас хөөрхөн жүжигчин охин авчраад үнэмштэл тоглуулья” гээд байхад нь зөрөөд байсан. Эндээс л түүний мөн чанар цухуйж байж. Тэр жинхнээсээ сайхан хайрыг хайж явсан байна. Түүний энэ чин үнэнч сэтгэл түүнд Сүндэрийг илгээжээ. Тэр аавынхаа “Өөр юугаар ч тоглож болно, хайр сэтгэлээр л тоглож болохгүй” гэсэн үгнээс өмнө өөрөө мэддэг, түүний гэсэн бүхэнд ариун тунгалаг, бүр юу ч халдаагүй үнэн хайрын эрэл цэх шулуун оршиж, тэр өөрөө дотоод сэтгэлийнхээ тэр нандин хүслийг юугаар ч солиогүй байна.

Тийм л болохоор гадаад хүчин зүйл, хүний нөлөөллөөс үүдэн дундаа жаахан саатсан ч алсдаа хүрэх цэг, ирэх хариу нь чин үнэн, хувирашгүй байлаа. Одоо тэд уулзсан, хоёул нийлэн жаргалтай суугаа.

Хайрын түүх аз жаргал, учрал баяраар төгсөх сайхан. Хоёр хүн ээдрээ нугачаа, адал явдлыг давж, хоёр талд шархалж, уйлж, дуулж, хүлээж, хүлээлгэж, орхин одож, буцан ирэх бүх мэдрэмжийн хойно уулзахын сайхныг юутай зүйрлэх билээ. Сайхан хайрын түүхэд саатлаа. Хайр ийм л болохоор, хайр ямагт үнэн, бүр хоёр хүн хоёул үгүйсгэсэн ч зүрх сэтгэл нь “Тийм ээ” гэж хэлээд байдаг болохоор л хүмүүс хайрын төлөө үхэн хатан гүйж, хайрыг магтан дуулдаг биз ээ. Одоо л би арван жилд жүжгийг нь үзээгүй ч дуунд нь татагдаж, яагаад давтан сонсдог байснаа ойлголоо. Би ч бас Жаргал шиг гаднаа үгүй юм шиг мөртлөө дотроо сайхан хайрыг хайж, эрж яваа юм байна. Гэхдээ би түүн шиг “Анхны харцаар дурлаж чадах уу” шоу нэвтрүүлэг хийе гэж бодохгүй байна. Учир нь тэр түүний хайраа хайхаар суусан завь нь.

Гэхдээ тэр ийн хайж явахдаа хайрыг хайж олдоггүй юм, хайрыг бүтээдэг гэдгийг ойлгосон шүү дээ. Би ч бас түүний хайрын түүхээс хайж биш, бүтээх ёстойг ойлгоод буцаж явна.

ЖАРГАЛ,СҮНДЭР ХОЁРЫН ХАЙРЫН ТҮҮХИЙГ БИ Ч МӨН ДУРЛАН СОНСЛОО

Шинэ мэдээ

Нийтлэлчид