Төгөлдөр хуурч С.Одгэрэл Монгол дахь ээлжит ганцаарчилсан тайлан тоглолтоо энэ сарын 28-нд Монгол Улсын филармонид хийхээр товложээ. Эл тоглолт хоёр хэсгээс бүрдэх байна. Тодруулбал, тоглолтын эхний хэсэгт Латин Америк, Аргентин хөгжмийн зохиолчдын бүтээлээс Монголд анх удаа тоглох бол удаах хэсэгт Монголын нэрт хөгжмийн зохиолчдын, тэр дундаа сүүлийн үеийн мэргэжлийн хөгжмийн зохиолчдын тоглогдож байгаагүй зохиол бүтээлээс тоглох юм байна.

                 Тоглолтод Аргентины хөгжмийн нэрт зохиолч, танго хөгжмийн эцэг гэгддэг Астор Пиаццоллагийн (Astor Piazzolla) төгөлдөр хуурт зориулсан гурван цуврал прелюдиг Монголд анх удаа сонордуулахаас гадна мөн орны алдарт хөгжмийн зохиолч Албэрто Жинастэра-ийн (Alberto Ginastera) "Аргентин бүжгүүд" (Danza Argentina) хэмээх цуврал бүтээлийг эхний хэсэгт толилуулах юм.

Удаах хэсэгт Монголын хөгжмийн нэрт хөгжмийн зохиолчид болох Сэмбийн Гончигсумлаа, Зундуйн Хангал, Бямбасүрэнгийн Шарав, Шатарын Өлзийбаяр, Хишигтогтохын Алтангэрэл нарын олонд танил зохиол болон, тоглогдож байгаагүй шинэ зохиол бүтээлээс нь түүвэрлэн үзэгч түмэндээ хүргэхэд бэлэн болсон байна. Тоглолтыг хөгжим судлаач Доктор, профессор Б.Батжаргал тайлбарлан хүргэхээрээ онцлог юм. Solo recital dуюу гоцлол тоглолт нь хөгжимчин тоглолтын эхлэл, өрнөл, төгсгөл бүгдийг дангаар буюу ганцаар авч явах, үзүүлэхдээ ур чадвар, мэдрэмж бүхнээ хөгжмийн зохиолчдын үзэл санаа, хүргэхийг хүссэн бодол сэтгэлгээг дамжуулахыг эрмэлздэгтээ оршдог тоглолтын хэлбэр юм. Анх Унгарын хөгжмийн зохиолч гарамгай виртуоз хөгжимчин Франц Лист энэхүү гоцлол төгөлдөр хуурын хэв маягийг бий болгосон гэдэг.