Монголын урлагт эгэл даруухан төрх, энгийн дуу хоолойгоороо хит болсон тэдний тухай юу ярих билээ дээ. Ямар ч гоёчлол, гангарал үгүйгээр тайзнаа гараад ирэхэд л үзэгчид тэднээр дүүрч, дуу хуурт нь жаргадаг. Тийм хувь тавилан, хүний сэтгэлийн орон зайд дуулсан дуугаараа хэзээ ч хуучрахгүйгээр амьдрах хувь ерөөл аргагүй тэднийхээ. 

Энэ хайр бидэн хоёрын насны хайр аа” гээд л ар араас нь хөтөлсөн тэдний цаг хугацаа, орон зай Монголын урлагт дэндүү тусгай. Ямар сайндаа л хөдөөнөөс дуучин болохоор Соёл урлагийн их сургуулийг зорьсон хүүхдүүд “Жавхлан Баясгалангийн ангид орьё” гэж хэлэх нь олонтаа байсан гэдэг.

      Үнэхээр ингэж хүрч, хоногшиж, ард түмний хайр энэрэлд амьдарч, тэдний итгэл сэтгэлийг даасан шиг даан явж чаддагийг өөрсдөөрөө том үлгэрлэсэн. Тэгвэл өнөөдөр тэд Монгол Улсын Гавьяат жүжигчин, зууны манлай хос дуучин С.Вандан, Д.Дуламсүрэн нарын “Ханьсахын заяа” дууг шинэчлэн дуулахад л үзэгчид нэрхийсэн алга ташилтаар хүлээн авч сонсож, өнөөд ч хуучраагүй дуунд нь хайртай гэдэг нь илэрхий байна. Ингэж бүдгэрч, мартагдахгүйгээр, дундарч, дуусашгүйгээр хүний сэтгэлийн аялгуу эгшгийн орон зайд том амьдарч, аль ч цаг үед хит дуучин байна гэдэг аргагүй ард түмний хайранд бүрэн багтаж, бүтэн амьдарсны илэрхийлэл мөн.