Үргэлжийн завгүй Тулгаа найруулагч өнөөд ч завгүй л явна. Тэр тусмаа сүүлийн жилүүдэд олон ангит киногоор дагнаад давгүй сайхан байгаа. Угаас даруухан урдах ажлаа л хийчихдэг түүнд найруулагчийн ажил нь зохисон гэж жигтэйхэн. Дүрд ч ялгаагүй дээ, “Сайн аав” киноны таван хүүхэдтэй эгэл жирийн таксины жолоочийн дүрээс эхлээд “Зөрлөг” киноны сүүний наймаачин будилуу Тайванаа, “Намрын синдром” киноны айлгүй дарга, “Онцгой даалгавар” киноны хөгжилтэй дүр гээд уужуу тайван, ухаалаг, хөгтэй, бүтэлгүй, будилуу дүрүүдэд нь үзэгчид хайртай. Хаа нэг нээрээ, дарга, босс, мафийн толгойлогч болсон харагддаг. Ийм л нэг халзан толгойгоо тойруулан илээд, ичингүйрэх мэт дулаахан инээмсэглэхээс өөрөөр элдэв маяг, ямба үгүй зөөлөн дөлгөөн уран бүтээлч Монголын урлагт бий.

     Тэр өөрийгөө салхинд найгах голын намуухан бургастай зүйрлэсэн байна лээ. Үнэхээр ч дүрээс ангид бол чанга дуутай, эг маггүй нэгэн биш. Ихэнхдээ л инээж, хэн нэгнийг “явуулж”, хөгжөөж суудаг, уужуу тайван зан чанартай ч гэх юм билээ. Аргагүй тийм уужим тэнүүн байж бүтээлээ дэлгэж, уран бүтээлчдээ хөглөж, тэдэнд урагшлах урам зориг өгдөг байх. Ах, найруулагч, аав, багшийн хайраар тэр уран бүтээлчидтэйгээ харилцаж, тэднийг ойлгож, дэмждэг нэгэн.

             Юугаа бодож, шаналдаг вэ гэж үү. Мэдээж тухайн найруулах гэж байгаа бүтээл ээ л. Удаан бодож, зовоож, шаналгаж бүтээл төрдөг тухай нэг бишгүй ярьсан байдаг, тэр. Аргагүй тэгж гэмээнэ үзэгчдийн тархи, зүрхэнд очиж, тэнд удаан амьдарч, цаашлаад тухайн бүтээлээр амьсгалдаг байх. Үзэх нэгэнд ийн киногоо үлдээхийн тулд хамаг байдгаа барж, бүхнээ шавхаж л бүтээлээ төрүүлдэг биз ээ. Найруулсан бүтээлийнхээ тухай тэр “Жил өнгөрөх тусам хийсэн киногоо чамлаад байдаг юм билээ. Зохиол түүнийг илэрхийлж байгаа аргачлалын хувьд “Дэлхийд дурласан сар” кино намайг их зовоосон. Олон ч зөрчил, шаналантай. Тэр бүрийг нарийн гаргах гэж хичээсэн” гэжээ. Аргагүй найруулагч гэдэг чимхлүүр ажил гэдгийг кино найруулдаггүй хүн ойлгодоггүй байх. Тэгэхээр С.Баттулга найруулагч мөнхийн бодогч, шаналагч, түүнийгээ нэрэгч юм. “Ийм нэгэн дурлал I,II” , “Надтай гэрлээч”, “Жексон амьд”, “Худалч залуу”, “Голланд сарнай”, “Гурван найз”, “Ар хударга”, “Их хотын залуус”, “Өнөр бүл өнөө цагт”, “Гурван найз эргэж ирсэн нь”, “Гэнэтийн зочид”, “Бүтэн амьдрал”, “Амьдралын урт замд” зэрэг бүтээл ч түүнээс ийм л процессоор төрсөн биз ээ. Ингээд найруулсан бүтээлээс нь харахад, хөгжилтэй, хөнгөн, адал явдалтай кино илүүтэй зонхилж байгаа бөгөөд өөрийнх нь хэлснээр дотоод ертөнцтэй нь холбоотойгоор урган гараад байна уу гэмээр. 

    Түүний үндсэн мэргэжил нь жүжигчин. Харин найруулагчийн ажлыг сонирхлоороо сурч л дээ. Тэрбээр 2001 онд сургуулиа төгсөөд шууд мэргэжлээрээ ажиллаагүй юм билээ. Ингээд дөрөв гаруй жил завсарлаж байгаад 2005 онд “Толбо” гэх анхны киногоо найруулж байсан гэдэг. Анхны эл бүтээл нь хэдийгээр бүтэлгүйтсэн ч гэсэн кино урлагт нэг мөр хөтөлж, "Сайхан бүтээл найруулах сан" гэх хүслээр хөтөлсөөр өнөөдөртэй золгож, үнэхээр тэр өөрийн өнгө өнгө аяс, ая дангтай олон сайхан бүтээлийг үзэгчдэд хүргэж чаджээ. Одоо ч үргэлжлүүлэн хүсэл мөрөөдлөө биелүүлж, бодож, төлөвлөж, найруулсаар л байна.     

БУДИЛУУ ТАЙВАНАА БУЮУ С.БАТТУЛГА