Монголын төр Л.Эрхбаатар гэх эрхэм мэдэлтнийг дийлэхгүй нь. Бүүр толгойг нь илээд, тендер өгөөд сууж байна. Тодруулбал, “Дулааны цахилгаан станц-3” ТӨХК-ийн захирал Л.Эрхбаатарыг гурван жилийн өмнө Эрүүгийн цагдаагийн албанаас баривчилсан байдаг. ЭЦА-ны Эдийн засгийн гэмт хэрэгтэй тэмцэх хэлтсийн мөрдөгчид Л.Эрхбаатарыг бусдаас их хэмжээний авлига авч байх үед нь буюу үйлдэл дээр нь саатуулж, баривчилсан түүхтэй. Авлига авсан ч албан тушаалтайгаа үлддэг зарчим Л.Эрхбаатарт л үйлчилж байна.

    Хууль хяналтын байгууллагад шалгагдаж, бусдаас их хэмжээний буюу 100 сая төгрөгийн хахууль авсан гэгдэх  “Дулааны цахилгаан станц-3” ТӨХК-ийн захирал Л.Эрхбаатарыг өнөөдрийг хүртэл ажлаас нь чөлөөлөөгүй, ажлаа хийсээр байна. Бүүр “ДЦС-3”-ынхаа зуухыг шатааж, нийслэлчүүдийг хөлдөөхөөр болсон ч ажилтайгаа, албан тушаалтайгаа байна.

Эх сурвалжийн мэдээлснээр “Бусдаас авлига аваад үйлдэл дээрээ баригдсан хүн захирлын суудалдаа суусаар байна. Л.Эрхбаатар эрх мэдэл, албан тушаалын байдлаа урвуулан ашиглаж, бусдад давуу байдал олгосон гэнэ лээ. “Дулааны цахилгаан станц-3” ТӨХК-иас зарласан тендерийн сонгон шалгаруулалтад хамаарал бүхий компаниа зохиомлоор тэнцүүлж, хариуд нь 100 орчим  сая төгрөгийн хахууль авсан. Энэ хүний хууль бус үйлдлийг хууль хяналтын байгууллагынхан таслан зогсоож, үйлдэл дээр нь барьсан хэрнээ хариуцлага тооцохгүй, ажлыг нь хийлгэж байгаад гайхаж байна. Л.Эрхбаатар өмнө нь “Эрдэнэт” дулааны цахилгаан станцын даргаар ажиллаж байсан гэсэн” гэв.

Мөн хэвлэл мэдээллийн хэрэгслээр “Хасу-Эрчим” ХХК-ийн захирал, Аж үйлдвэрийн гавьяат ажилтан Б.Бат-Эрдэнэ “Дулааны цахилгаан станц-3” ТӨХК-ийн захирал Л.Эрхбаатарт 100 сая төгрөг өгөхөөр тохиролцож, урьдчилгаа 30 саяыг нь өгөөд ийнхүү баригдсан. “Хасу-Эрчим” ХХК нь “ДЦС-3” ТӨХК-иас 2022  онд зарласан 274.6 сая төгрөгийн үнийн дүнтэй утаа сорогчийн гол худалдан авах, 738 орчим саяын үнийн дүнтэй өрлөг дулаалгын материал (багц-2) нийлүүлэх, нэг тэрбум гаруй төгрөгийн үнийн дүнтэй труба хоолой худалдан авах зэрэг тендерт шалгарч, гэрээ байгуулсан юм билээ. Эдгээр тендерт “Хасу-Эрчим”-ийг шалгаруулсныхаа урамшуулалд хахууль авсан байж болзошгүй” хэмээн бичиж байсан юм.

ШҮҮР АЖИЛЛАГААГ "ДЦС-3"-ААС ЭХЭЛСЭН ДЭЭР ЮМ БИШ ҮҮ, ЕРӨНХИЙ САЙД АА

Засгийн газраас 5Ш ажиллагааг эхлүүлсэн. Эрх мэдэл, албан тушаалын байдлаа урвуулан ашиглаж, авлига авсан этгээдүүдийг шүүр ажиллагаагаар шүүрдэж, төрийн албыг цэвэрлэхээр болсон гэх. Тэгвэл Шүүр ажиллалааг “Дулааны цахилгаан станц-3” ТӨХК-аас эхлэх нь зүйтэй юм биш үү, Ерөнхий сайд аа. Авлига авсан этгээд төрийн албанд, даргын суудалд заларсаар байна шүү дээ.

Тодруулбал, улс төрд нөлөө бүхий этгээд болон нийтийн албанд ажиллаж байгаа этгээд нь хууль ёсны орлогоосоо давсан хэрэглээгээ нотолж чадахгүй бол “Шүүр”-дүүлнэ. Мөн авлига, албан тушаалын гэмт хэрэгт холбогдож, авлига авсан бол нийтийн албанаас шүүрдэн цэвэрлэж, хариуцлага тооцно гэдгийг албаныхан хатуу анхааруулсан. Гэтэл энэ ажиллагаа нь хэрэгжихгүй, Засгийн газар ТӨХК дахь авлигатай тэмцэхгүй, авлига авсан авсан дарга нарын толгойг энэ мэт илсээр байна.

Сүржин эхэлсэн Л.Эрхбаатарын авлигын хэрэг замхарч, албан тушаалтайгаа зууралдаж байгаа нь хуульд нийцэх үү. ТӨХК-ууд авлигын эх уурхай, албан тушаалын наймаа болсныг ганцхан “Дулааны цахилгаан станц-3” ТӨХК-аас харж болохоор байна. Учир нь, Л.Эрхбаатарын өмнө “Дулааны цахилгаан станц-3” ТӨХК-ийн захирлаар ажиллаж байсан Ч.Чинбат нь мөн л авлигын хэрэгт холбогдож, хууль хяналтын байгууллагад шалгагдаж, албан тушаалаасаа огцорч байсан билээ.

  “Дулааны гуравдугаар цахилгаан станц” ТӨХК-ийн гүйцэтгэх захирал Лэгцэгийн Эрхбаатар 144 сая төгрөгийн орлоготой, 755 сая төгрөгийн орон сууцтай, 74 сая төгрөгийн хадгаламжтай. 2016 оноос хойш Орхон аймгийн ИТХ-ын төлөөлөгч бөгөөд “Эрдэнэт дулааны цахилгаан станц” ТӨХК-ийн гүйцэтгэх захирлаар ажиллаж байсан. Орхон аймгийн Засаг дарга асан, УИХ-ын гишүүн, Батлан хамгаалахын сайд Д.Батлуттай тун ойр харилцаатай гэлцдэг. 2021 оны наймдугаар сард “Дулааны гуравдугаар цахилгаан станц” ТӨХК-ийн гүйцэтгэх захирлаар томилогдсон.

            Ноцтой нь, “ДЦС-3” ТӨХК-д осол гарч, дөч гаруйхан настай инженер амиа алдсан. Нэмээд, ослын улмаас “ДЦС-3” ТӨХК-ийн турбин генератор эргэн засагдахгүйгээр эвдэрч, тэг зогссон тул ирэх өвөл нийслэлчүүд дулаан, цахилгаангүй тэс хөлдөх аюулд орчихлоо гэж эл салбарын экспертүүд шогширч байна. Одоогоор хууль хяналтынхан хэргийг шалгаж байгаа бөгөөд амиа алдсан инженер залуу, ажиллагаагүй болсон турбин генераторын асуудалд хэн ч хариуцлага хүлээсэнгүй.  

“ДЦС-3” ТӨХК-ИЙН ЗАХИРАЛ Л.ЭРХБААТАРЫН ГЭР БҮЛ 9.7 ТЭРБУМ ТӨГРӨГИЙН ТЕНДЕР АВЧЭЭ

            Угтаа Л.Эрхбаатарыг авлигын хэргээр нь явуулж чаддаггүй юм бол хүний амь эрсэдсэн ослын шалтгаанаар нь хангалттай явуулах боломж байсан. Гэвч түүнийг төрөөс явуулах нь байтугай гэр бүлийнхэнд нь тендер өгөөд сууж байна, Монголын төр.

ДЦС-3” ТӨХК-ийн захирал Л.Эрхбаатарын гэр бүлийнхэн эрчим хүчний салбарын төрийн өмчит компаниудад ажиллацгааж байгаа гэдгийг бид өмнө нь мэдээлсэн.       “ДЦС-3” ТӨХК-ийн захирал Л.Эрхбаатарын хүү, “Диспетчерийн үндэсний төв” ТӨХК-ийн инженер Э.Булганхүүгийн эхнэр Б.Нямсүрэн нь “ЭСБА” ХХК-ийг эзэмшдэг. Анх Л.Эрхбаатарын эхнэр Ч.Сарантуяа “ЭСБА” ХХК-ийг байгуулж, бэр Б.Нямсүрэндээ бэлэглэсэн байдаг. Тэгвэл Л.Эрхбаатарын бэр Б.Нямсүрэнгийн “ЭСБА” ХХК нь эрчим хүчний салбарын тендерүүдийг тоншиж байна. Жишээ нь,

-“Дарханы дулааны сүлжээ” ТӨХК-д Ган хоолой нийлүүлэх 101 сая төгрөгийн тендер

-“Цахилгаан дамжуулах үндэсний сүлжээ” ТӨХК-д Аваар бүртгэх АУРА-07 төхөөрөмж нийлүүлэх 260 сая төгрөгийн тендер

-“Эрдэнэт-Булганы цахилгаан түгээх сүлжээ” ТӨХК-д Трансформаторын коэффициент тодорхойлох зөөврийн төхөөрөмж нийлүүлэх 45.0 сая төгрөгийн тендер

-Орхон аймгийн Кабелийн шугамыг шинэчлэх 88.5 сая төгрөгийн тендер

-Орхон аймгийн Хөтөлд 0.4 кВ-ын цахилгаан дамжуулах шуга тавих 98.5 сая төгрөгийн тендер

-Орхон аймагт 6/0.4 кВ-ын ЦДАШ тавих 53.3 сая төгрөгийн тендер

-Орхон аймагт 0.22кВ-ын ЦДАШ тавих 80.0 сая төгрөгийн тендер

-Орхон аймагт Гэрэлтүүлэг хийх 50.0 сая төгрөгийн тендер зэрэгт шалгарсан байна.

  “ДЦС-3” ТӨХК-ийн захирал Л.Эрхбаатарын төрсөн дүү, “Улаанбаатар цахилгаан түгээх сүлжээ” ТӨХК-ийн Ахлах нягтлан бодогч Л.Энхцэцэг нь нөхөр Алтангэрэлийн Батхуягийн хамт “Сантбаян бэрх” ХХК-ийг эзэмшдэг. Тэгвэл “Сант баян бэрх” ХХК нь 2024, 2025 онд нийт 8.9 тэрбум төгрөгийн тендерт шалгарчээ.

Тухайлбал, 2025 онд

-Улаанбаатар хотын төв буюу Бага тойруугийн явган хүний зам, талбайг тохижуулах 3.9 тэрбум төгрөгийн тендер

-ХУД-ийн 20-р хороо, Чингисийн өргөн чөлөөнөөс Үйлдвэрийн цагаан хаалга хүртэл авто замыг засварлах 896 сая төгрөгийн тендерт шалгарсан.

-Өнгөрөгч 2024 онд

БЗД-ийн 37-р хороонд 0.6 км зам тавих 1.8 тэрбум төгрөгийн тендер

-“Тавантолгой түлш” ХХК-ийн үйлдвэрийн шороон замыг хатуу хучилтаар солих 1.8 тэрбум төгрөгийн тендер

-“Тавантолгой түлш” ХХК-ийн Зүүн бүсийн үйлдвэрийн талбайг засах 300 сая төгрөгийн тендер

-ХУД-ийн 8-р хороо, Яармагийн дэнжид автобусны буудал байгуулах 300 сая төгрөгийн тендерт тус тус шалгарсан байна.

Ашиг сонирхлын зөрчлөөс урьдчилан сэргийлэх тухай хуулийн 20.2-т "Төрийн өмчит компанийн захирал, түүний хамаарал бүхий этгээд нь төрөөс тендер авч болохгүй" гэсэн заалттай. Энэ хуулийн 3.1.5-д “Хамаарал бүхий этгээд гэдэг нь тухайн захирлын эхнэр, хүүхэд, төрсөн ах, эгч, дүүг хэлнэ” гэж тодорхой заасан байдаг. Өөрөөр хэлбэл, “ДЦС-3” ТӨХК-ийн Гүйцэтгэх захирал Л.Эрхбаатар, түүний хүүгийн эхнэр Б.Нямсүрэн, төрсөн дүү Л.Энхцэцэг хоёр нь төрөөс тендер авч болохгүй, хуулиар хориотой гэсэн үг. Гэтэл нийлээд 9.7 тэрбум төгрөгийн тендер төрөөс авчихсан байгааг бид мэдээлсэн.

            Зуухаа шатааж, 100 саяын хахууль авсан “ДЦС-3”-ын захирал Л.Эрхбаатар төрөөс явах нь байтугай тендер тоноод дууслаа.