Хөл хорио тогтоосон энэ үед хайртай дотнын хүндээ шинэ жилийн бэлэг өгөхийг хүссэн ч таны хүссэн бэлэг олдохгүй байж мэднэ. Тэгвэл та өөрийн гараар бэлдсэн, сэтгэл шингэсэн бэлгээ бэлэглээрэй. Гарын доорх материалаар бэлэг бэлдэх 10 аргыг хүргэж байна.

1. Жигнэмэг бэлэглэх

Та хайртай хүнийхээ дуртай амттанаар энгийн хэдий ч шинэ жилийг санагдуулам бэлэг бэлдэж болно. Овьёос болон гурил, шоколад, лемон, самраар өөрийн хүссэн загвараар жигнэмэг бэлдэн хайрцаглан бэлэглээрэй.

2. Гацуурын тоглоом

Гацуурын тоглоом жил бүр хэрэглэх гайхалтай бэлэг болно. Эсгий, мод ямар ч материалаар жижигхэн гацуурын чимэглэл бэлдэн, хайртай дотнын хүндээ бэлэглэж болно. Мөн дурсамжит зургаар чимэглэл бүтээн, дээр нь туузаар гацуурын тогтоогч хийн бэлэглэж болох юм.

3. Ноосон хувцас

Онлайн бичлэгээс хэрхэн ороолт, оймс нэхэх талаар үзээд л хайртай хүмүүстээ өөрийн гараар хувцас нэхэж бэлэглэж болно. Сэтгэл татам, гайхалтай бэлэг биш гэж үү.

4. Дурсамжийн ном

Зөвхөн та хоёрын дурсамж шингэсэн зураг, тоглолтын тасалбар зэргээр түүх агуулсан дурсамжийн ном бэлэглэх боломжтой. Зөвхөн та хоёрын дунд л үлдэх сэтгэл шингэсэн сайхан бэлэг болно.

5. Тэмдэглэлийн дэвтэр

Гарын доорх материалаар тухайн хүний хэв маягт тохируулан хавтасны зургийг нь өөрөө бүтээж, цаасыг нь ижил хэмжээтэй сонгож, тэмдэглэлийн дэвтэр бүтээх боломжтой.

6. Гэрэлтдэг жааз

 Хэрэв гэрт тань нарийн мод бий бол фото зургийн хэмжээгээрээ модоо тайрч жаазлан дөрвөн талтай болгон хадаад, дотор нь зургаа нааж, лаа тавихад гэрэлтдэг жааз бэлэн болно.

7. Даавуун тор

Хүссэн өнгийн даавуугаар 37*32 см харьцаатай даавуу хайчлан оёж, дотор талаар нь харуулж, оосор оёход л даавуун тор бэлэн болно. Даавуун торон дээр зураг хэвлэж, эсвэл зурж, наасан ч болно шүү дээ.

8. Синнамонтой лаа

Шилтэй лаа худалдан аваад гадуур нь синнамоноор бүрэн нааж, туузаар орооход л шинэ жилийн бэлэг бэлэн болно.

9. Гэрлийн чийдэн чимэглэл

Ажиллахаа больсон гэрлийн чийдэн дотор хүссэн чимэглэлээ хийж, эсвэл шилэн дээр нь зурж гацуурын чимэглэл хийж болно.

10. Цасан хүнтэй халбага

Чихрэн суурь, какао, хөөсөн чихэр байхад л халуун шоколаданд ороод хайлдаг цасан хүнтэй халбага хийж болно.