Эргэлт.мн сайт хүүхдийн номын Жангар редакцтай хамтран “Үлгэрийн цаг” буланг толилуулж байна.

Хулгана ширмэн тогоо идсэн нь

Нандук нэрт хүний байшин шатаж орхижээ. Шатсан гэрийнх нь буурин дээр ганцхан ширмэн тогоо л үлдэж гэнэ. Орох оронгүй болсон хөөрхий залуу хэсэг хугацаагаар өөр хотод очиж ажил хийж мөнгө хураахаар шийдсэн ба үлдсэн цорын ганц эд хөрөнгөө өөрийн сайн найз Лакимандаа үлдээхдээ: - Надад гай зовлон тохиолдлоо. Би түр хугацаагаар явна. Энэ тогоог намайг эргэж иртэл хадгалж байгаарай гэж гуйхад найз нь дуртай зөвшөөрч гэнэ. Хэдэн жилийн дараа Нандук төрсөн нутагтаа эргэж ирээд найз Лакиманаасаа өөрийнхөө тогоог эргүүлж өгөхийг хүсэв. Харин найз нь заль зохион: - Тун ч харамсалтай юм болсон. Чиний ширмэн тогоог хулганууд идчихсэн гэж хэлж гэнэ. Нандук хэдийгээр найз нь түүний тогоог өгөхийг хүсэхгүй, худал хэлж байна гэдгийг мэдээд найздаа гомдсон боловч түүнийгээ ил гаргаж үзүүлсэнгүй. - Тогоог хулгана идээ л биз. Найз нь голын эрэг дээр очиж гараа угаана. Хүү чинь миний гар дээр ус хийж өгөхийг зөвшөөрөөч гэж гэнэ. Нандук Лакиманы хүүг ирэхэд нь барьж аваад агуйд хийж агуйн амыг чулуугаар дарж таглажээ. Дараа нь тэр эргэж ирээд Лакиманд:

- Эрхэм нөхөр минь. Гай зовлон тохиолдлоо. Намайг гараа угааж байтал хараацай нисэж ирээд хүүг чинь хулгайлан авч одлоо гэж гэнэ. Лакиман галзуурсан мэт уурлаж түүнийг худалч, хулгайчаар нь дуудаж шүүх рүү чирч иржээ. - Долоон настай хүүг хараацай шүүрэн авч одлоо гэж яаж хэлж чадаж байна худалч муу нохой. Хүүг хаана нууснаа хэл! гэж шүүгч ууртайгаар зандарч гэнэ. Ухаант шүүгч минь. Энэ хүний хүү, миний ширмэн тогоог хулгана идсэн тэр газарт байгаа гэжээ. Учрыг ойлгоогүй шүүгч тогооны тухай асуухад Нандук ширмэн тогооны түүхийг ярьж өгчээ. Шүүгч чанга инээж: - Нандук, Лакиман та хоёр одоо маргахаа больцгоо! Харин Лакиман Нандукт ширмэн тогоог нь, Нандук Лакиманд хүүг нь эргүүлээд өгчих гэж хэлжээ. Шүүгчийн энэ шийдвэр хоёр залууд хоёуланд нь таарч байлаа. Найздаа худал хэлж итгэлийг нь алдсан Лакиман найзаасаа уучлалт гуйсан ба буцаад эвлэрсэн гэдэг. Тэр цагаас хойш “Хулгана ширмэн тогоо мэрж дуусгадаг тэр газар хараацай хүүхэд хулгайлан нисдэг юм” гэдэг үг гарсан ба худал хуурмаг бүхэн хэзээ нэгэн цагт баригддаг бөгөөд төлөөс нь авснаасаа илүү байдаг гэсэн үг юм.

“365 үдэш” номоос

Монсудар хэвлэлийн компани, Жангар редакц хамтран хүүхэд багачуудад зориулж гаргасан “365 үдэш” үлгэрийн номоос үлгэрийн цаг буландаа нийтлэж байна. “365 үдэш” үлгэрийн номонд монгол ардын болон дэлхийн олон үндэстний алдартай, сонирхолтой үлгэр түүхүүдээс түүвэрлэж, хялбаршуулж, хүүхдийн сэтгэхүй, анхаарал төвлөрөлтөд тохирсон найруулгатай богино үлгэрүүдийг нэгтгэсэн билээ.

Монгол ардын үлгэрүүдэд хүүхдийн сонсож байгаагүй үгс олон байдаг тул үгийн утгыг тайлбарлан ярилцсанаар хүүхдийн үгсийн сан арвижиж, эх хэлний мэдлэг нэмэгддэг. Уг номонд хүүхдийн танин мэдэхүйг хөгжүүлэх оньсого, шинээр зохиосон дуу, шүлгээс түүвэрлэн оруулсан бөгөөд хүүхэдтэйгээ оньсого таалцаж, шинэ дуу, шүлгээс хамтдаа уншиж, суралцах боломжтой.