“Пиксар” анимэйшн студи сүнсний талаар өгүүлэх ээлжит шинэ бүтээлээ дэлгэлээ. Энэхүү “Soul” хүүхэлдэйн кино нь “Пиксар”-ын сүнсний тухай хүүрнэх анхны бүтээл биш бөгөөд үүгээр сүнсний ертөнцийг аль болох өөр өнцгөөс харуулахыг зорьжээ. Үүнээс өмнө тэд 2017 онд нээлтээ хийсэн, “Коко” хүүхэлдэйн киногоор дамжуулж гэр бүлийн үнэ цэнийг мэдрүүлж байсан бол “Онвард” бүтээлд хэзээ ч уулзаж байгаагүй аавыгаа сүнсний ертөнцөөс хайдаг ах дүү Иан, Барнигийн тухай гардаг билээ.

 Угтаа сүнсний тухай кино, бүтээл, ер нь энэ сэдэв бидний бодол, итгэл үнэмшлийн хувьд ч барьж авахад барьцгүй байх нь ойлгомжтой. Нэг талаар сонирхолтой байж мэдэх ч бусад хүнд итгэл үнэмшил төрүүлэхгүй ч байж мэдэх сэдэв юм. Гэвч энэхүү "Soul" хүүхэлдэй нь сүнс бус, бидний амьдралын тухай хүүрнэнэ. “Пиксар”-ын өмнөх “Тоглоомын түүх” болон “Бодлын ертөнц” зэрэг бүтээлүүд эхлэхдээ логикийн алдаатай мэт боловч үзэгчдээ татаж, итгүүлж, дүрүүдээрээ “ятгаж” чаддаг онцлогтой.

"Soul" хүүхэлдэйн эхлэл ч мөн логикийн алдаатай мэт боловч нэг хором ч анхаарлаа өөр тийш хандуулах завдал олгохгүйгээр үргэлжилнэ. Учир нь хүүхэлдэйн урлаг хором тутмыг урладагтаа нэг ч илүү кадр байдаггүй давуу талтай. Гэхдээ энэ тийм ч амар биш. Үүнийг “Пиксар”-ын уран бүтээлчид маш сайн эзэмшсэн учир  бүх л бүтээл нь одоо ч үнэ цэнтэй хэвээр байдаг байж мэднэ.

“Soul” хэмээх үг утгынх нь хувьд авч үзвэл “сүнс”-нээс илүү “сэтгэл” гэдэг үгтэй дүйж мэднэ. Хүний амьдралын утга учир, дурсамж, урам зориг зэрэг томоохон сэдвүүдийг ганц үгэнд эвлэгхэн цогцлоожээ.

“Soul” хүүхэлдэйн найруулагч Пете Доктер “Бодлын ертөнц” бүтээлийг мөн найруулсан бөгөөд түүний арга барилд “дурсамж” чухал үүрэгтэй. Тэрбээр дурсамжийн нандин мэдрэмжийг бүтээлдээ чадварлаг урладаг. “Бодлын ертөнц” бүтээлд гол дүр болох Аз жаргалын зөв мэт үзэгчдэд итгүүлдэг ч төгсгөлд нь амьдралын утга учир аз жаргал биш, уйтгар гуниг ч мөн бидэнд ямар их нөмөр нөөлөг болдог талаар сэтгэл хөдөлгөм дүрсэлдэг билээ. Мөн бидний дурсамж зөвхөн ганц мэдрэмжээс бус гунигтай, хөгжилтэй гээд олон мэдрэмжээс бүрддэгийг анзааран гаргасан байдаг. Харин “Soul” хүүхэлдэйнд алдартай жазз хөгжимчин болох хүсэлтэй дунд сургуулийн хөгжмийн багш Жое Гарднерт карьерээ эхлүүлэх боломж олдоно. Тэрбээр өөрийгөө хөгжмийн л төлөө энэ хорвоод төрсөн хэмээн итгэх ч хэзээ ч амжилттай байсангүй. Гэтэл түүний мөрөөдөл биелэхийн даваан дээр тэрбээр  осолд орсноор дөнгөж төрсөн, дэлхий рүү явахад бэлэн болсон сүнсний ертөнцөд зорчилно. Энэхүү ертөнцөөс дэлхийд төрөхдөө өөрийн амьдралын урам зориг, сонирхол, чадвар, амьдралын “оч”-оо олдог газар билээ.

            Хүн болгонд амьдралаас урам зориг авдаг, амьдрах итгэл өгдөг зүйлс бий. Харин эдгээр зүйл байхгүй бол бид яах билээ. Жое Гарднерийн дүрээр амьдралын гол зүйл нэгэндээ урам зориг өгөх “оч” нь байх гэсэн санааг дэвшүүлжээ.

            Киноны турш жазз хөгжмийн уур амьсгалыг хөгжимд дурлам үзүүлнэ. Киноны жазз хөгжмийг Жон Батист бичиж, Жое Гарднерийн дүрийн судалгааг ч мөн түүнээс авчээ. Энэхүү хөгжимлөг байдал нь дүрийг илүү бодитой, амьд болгож байлаа. “Коко” кинонд хөгжим тоглох хүсэлтэй хүүгийн дүрээр мөн амьд, хөгжимлөг хүүхэлдэй бүтээж, Пиксар студи тухайн жилийнхээ Оскарын шилдэг киноны дуу, шилдэг хүүхэлдэйн киноны шагналыг хүртэж байв.

“Пиксар” компани олон хүүхэлдэйн киногоороо хүсэл зорилго, дурсамж, бидний хайртай хүмүүс амьдралд ямар чухал болохыг чадварлаг гаргаж ирдэг. Харин энэхүү хүүхэлдэйд “Бид амьдралаас утга учир хайдаг ч амьдрах шалтгаан нь чухал биш, бид амьдарч, агшин бүрийг мэдэрч буй нь чухал” гэдэг санааг илэрхийлсэн нь өөрийнхөө сэтгэл рүү шагайх бүтээл болжээ.