Ж.Гүррагчаа сансарт ниссэний 40 жилийн ойд зориулсан “Холын мэт ойрхон сансар” зохион бичлэгийн уралдаанд 14 дүгээр сургуулийн төгсөх ангийн сурагч Э.Цолмон шалгарлаа. Сансрын нисгэгч болох хүсэл мөрөөдлөөр жигүүрлэсэн тэрбээр сургуулиа амжилттай төгсөж, хүссэн мэргэжлээрээ сурахыг тэсэн ядан хүлээж буй гэнэ.

-“Холын мэт ойрхон сансар” зохион бичлэгийн уралдаанд түрүүлсэнд баяр хүргэе. Чи зохион бичлэгээрээ ямар санаа илэрхийлэхийг хичээсэн бэ?

-Баярлалаа. Би монголын анхны сансрын нисгэгч Ж.Гүррэгчаа ахыг их хүндэлдэг. Зохион бичлэгээ бичээд сууж байхдаа Монгол Улсаас сансарт ниссэн хүний тухай болон тухайн үеийн түүхэн үйл явдлыг талаар бичсэн.

-Сансрын нисгэгч болох хүсэл, мөрөөдөлтэй гэлээ. Танай гэр бүлийнхэнд нисэхийн салбарт ажилладаг хүн бий юү?

-Би цэцэрлэгт байхаасаа сансрын нисгэгч болохыг хүсдэг байлаа. Миний ээж нисэхийн салбарт ажилладаг. Ах маань онгоцны нисгэгч. Тийм болохоор одоо ч гэсэн онгоцны нисгэгч болох мөрөөдөлтэй хэвээрээ. Сансар огторгуйгаар хүн бүр аялаж үзээгүй шүү дээ. Тийм учраас надад маш гайхамшигтай, сонирхолтой санагддаг.

-Чиний төсөөллөөр сансар гэж  юу вэ?

-Сансар гэдэг хэзээ ч хүн төрөлхтөнд дийлэгдэшгүй зүйл. Хүн төрөлхтний очиж үзээгүй, олж хараагүй маш олон гараг бий.

-Удахгүй сургуулиа төгсөнө. Ямар сургуульд орохоор төлөвлөж байна  вэ?

-Орос Улсын хоёр дахь сансарын нисгэгч эмэгтэйн сурч байсан Савецкийн сургууль сурах мөрөөдөлтэй. Хичээлээ сайн хийж, сургуулиа амжилттай төгсөөд сансрын  нисгэгч болно.

О.БАТ-ЭРДЭНЭ