Шатрын насанд хүрэгчдийн Монгол Улсын аварга шалгаруулах тэмцээний рапид төрөлд 11 настай хүү нэг ч хожигдолгүй есөн өрөгт ялснаар тус төрлийн аварга боллоо. Насанд хүрэгчидтэй энэ тэнцүү, бүр илт давуу өрсөлдсөөр ийнхүү аварга болсон Ц.Ананд хүү өдгөө зургадугаар ангийн сурагч. Таван настай байхдаа шатрын нүүдэл сурсан түүнийг хоёрдугаар ангид байхад аав нь шатар зааж, тэмцээнд оруулж байжээ. Тэмцээндээ түрүүлсэн тул “Босоо ноён” шатрын клубт элсүүлсэн байна.

-Чамд энэ өдрийн мэнд хүргэе. Монгол Улсын шатрын аварга шалгаруулах тэмцээний рапид төрөлд аварга болсонд баяр хүргэе. Сэтгэгдлээсээ хуваалцахгүй юу?

                -Баярлалаа, насанд хүрэгчидтэй өрсөлдөөд аварга болсондоо баяртай байна, сэтгэл үнэхээр өндөр байгаа.

-Өөрөөсөө ах, насанд хүрэгчидтэй өрсөлдөх ямар байсан бэ, сандарч эмээсэн зүйл бий юү?

                -Би сандраагүй ээ. Ах нар туршлагатай, бага алдаа гаргадаг болохоор илүү хичээж тоглох ёстойгоо мэдэж байсан. Илүү анхааралтай тоглохыг зорьсон.

-Нэг ч хожигдолгүй тэмцээнээ өндөрлүүлэх ямар санагдсан бэ?

                -Өөрөөсөө ах хүмүүстэй тоглохдоо нэг хожигдолгүй ялж, тэмцээнийхээ аварга болсон болохоор үнэхээр сайхан байна.

-Хамгийн хүнд, өрсөлдөөнтэй өргийн тоглолтыг хэддүгээр өрөгт хэнтэй хийв?

                -Тэмцээний долдугаар өрөгт “Босоо ноён” клубийнхээ Яармаг салбарын багш FM Болдоотой хийсэн өрөг хамгийн өрсөлдөөнтэй болсон. Тоглолтын дунд үед дутуу байрлал аваад цаашид хамгаалж байгаад хожсондоо.

-Катар Улсын Доха хотод болох блиц болон рапидын дэлхийн аварга шалгаруулах тэмцээнд оролцох эрхээ авсан шүү дээ. Тэмцээнд оролцох эрхээ авсан сэтгэгдлээсээ хуваалцахгүй юу, бэлтгэлээ хэрхэн хийх гэж байна?

                -Олон улсын тэмцээнд оролцох эрх авсандаа үнэхээр баяртай, сайхан байна. Дэлхийн шилдэг шатарчидтай нэг тэмцээнд өрсөлдөж, шатар нүүнэ гэдэгтээ баярлаж, догдолж байна. Чухал тэмцээнийхээ бэлтгэлийг “Босоо ноён” клуб дээрээ багш нартайгаа хийнэ ээ.

МИНИЙ ДАРААГИЙН ЗОРИЛГО ШАТРЫН ИХ МАСТЕР, ШАТРЫН ДЭЛХИЙН АВАРГА

-Хэдэн настайдаа нүүдэл сурч, шатар тоглож сурав?

                -Анх таван настайдаа нүүдэл сурч тоглодог болсон. Шатрын клубт найман настайгаасаа явж эхэлсэн.

-Шатрын спортыг чухам яагаад сонирхон хичээллэх болов, юу нь чиний сонирхлыг татсан юм бэ?

                -Шатар тун сонирхолтой спорт, олон зүйл нь хүнийг хөгжүүлдэг юм шиг санагддаг. Миний хувьд шатрын бодлого бодож, хариуг нь олох мөч хамгийн сонирхолтой байдаг.

-Шатар тоглоход юуны өмнө сууж сурах, анхаарлаа төвлөрүүлж сурах хэрэгтэй гэдэг. Олон цагаар хөдөлгөөнгүй тоглож суухад ядардаг уу?

                -Хэдийгээр ядардаг ч дуртай учраас үргэлжлүүлэн хичээллэдэг.

-Рапит төрөл хурдтай тоглож бодож, төлөвлөхийг шаарддаг байхдаа. Чиний хувьд энэ төрлийн онцлог нь юу вэ?

                -Шатар нь ерөнхийдөө тоглох хугацаанаасаа хамаараад стандарт, рапид, блиц гэсэн гурван төрөлтэй байдаг. Миний хувьд рапид бодох хугацаатай мэт боловч хурдан сэтгэж шийдвэр гаргах шаардлагатай болдог.

-Тэмцээний үед сэтгэлийн хөдөлгөөн, сэтгэл зүйгээ хэрхэн удирддаг вэ?

                -Өрсөлдөгч тамирчин, тэмцээний явц зэргээс үл хамааран зөвхөн тоглож байгаа өрөгтөө анхаарлаа хандуулахыг хичээдэг. Анхаарлаа сарьзнуулахгүй байх нь тун чухал.

-Оюун ухааны спорт шатраас гадна өөр спорт, урлагаар хичээллэдэг үү?

                -Өнгөрсөн зун шатрын клубийнхээ хичээлийн хажуугаар сагсан бөмбөгөөр хичээллэсэн. Шатрын бүтэн бэлтгэлдээ ороод сагсан бөмбөгийн дугуйландаа явах цаг гарахаа больсон учраас одоохондоо хичээллэхгүй байгаа. Ер нь сагсан бөмбөгт тун сонирхолтой, хөгжилтэй спорт санагдсан.

-Насанд хүрэгчдийн улсын аварга болчихлоо. Одоо дараагийн зорилго, зорилт, хүсэл мөрөөдөл юу байна вэ?

                -Миний дараагийн зорилго шатрын их мастер, шатрын дэлхийн аварга болох байгаа. Зорилгодоо хүрэхийн тулд өөрт байгаа бүхнээ дайчлан хичээх болно оо.