“Дээд лиг”-ийн хоёр удаагийн аварга, “Эрчим” багийн холбон тоглогч Л.Хосбаяртай цөөн хором ярилцлаа.

-Сайн байна уу. Өөрийнхөө тухай болон спортын хүн болсон түүхээсээ хуваалцаач?

               -Тэр үед нуруу намхан охиноо үүгээр хичээллэнэ гэж бодоогүй байх. Нэг өдөр дуртай спортоороо хичээллэх хүсэлтэй байгаагаа аавд хэлэхэд багш дээр хөтөлж очоод танилцуулахдаа “Би танд холбогч авчирлаа. Сайн тамирчин болгоорой” гэж байсан  даа.  Тухайн энэ спорт намайг өөрийн эрхгүй л татаад байсан даа. Тэгэхээр аав минь намайг энэ спортод хөтөлсөн гэж хэлж болно оо. Хэрэв тэр үед аав заал руу аваачаагүй бол би спортын хүн болоогүй байх.

-Танай баг хоёр жил дараалан “Дээд лиг”-ийн аварга боллоо шүү дээ. Сэтгэгдлээсээ хуваалцаач?

               -Миний хувьд “Дээд лиг”-ийн тэмцээнд дөрөв дэх жилдээ оролцож, эхний хоёр жил мөнгөн медаль хүртэж, сүүлийн хоёр жил аварга болсон байна. Өмнө нь жил хоёр ялагдлын дараа аварга авсан учир нэлээн сандралтай байсан. Харин энэ жилийн хувьд харьцангуй тайван байлаа.

-Таны хувьд “Эрчим” багт нэгдээд удаж байна уу?

               -2022 онд “Hobby” клубээсээ гарч, “Эрчим” багт нэгдэж байсан.

-Энэ спортын юунд дурлаж сонгосон бэ. Гар бөмбөгийн спортоор хичээллээд амьдралд тань гарсан өөрчлөлтүүд юу вэ ?

               -Энэ спортод хөл тавьснаар өөрийгөө зөв төлөвшүүлж, хамт олныхоо сайн талаас суралцсан эерэг хандлагатай хүн болжээ. Волейбол намайг өмнөхөөс минь өөрчилж чадсан. Мөн энэ спортоор хичээллэж эхлээд амьдралынхаа хань, найзуудыг олж авсан даа. 

-Заал дүүрэн үзэгчдийн алга ташилт, халуун энерги дунд тоглох мэдрэмж ямар байдаг вэ ?

               -Орчлон дээр хүний мэдэрч болох олон чимээ бий. Тэр дундаас тамирчин хүний хамгийн дуртай чимээ заал дүүрэн үзэгчийн алга ташилт байдаг. Үзэгчид байснаар тэр тоглолт илүү амьд болж өгдөг. Гэхдээ заримдаа хэт их чимээтэй үед багийнхныхаа хоолойг сонсож чадахгүй, хоорондоо ярилцаж чадахгүй үе гардаг.

-Тоглолтын үеэр сэтгэл зүйгээ хэрхэн бэлтгэдэг вэ. Багийн сэтгэл зүйч байдаг уу ?

               -Манай баг финалын тоглолтын үеэр сэтгэл зүйчтэй ажилласан. Багийн сэтгэл зүйчтэй байснаар илүү дүнтэй санагдсан. Миний хувьд бол тэмцээний үеэр аль болох тайван байхыг л хичээж, тоглолтдоо анхаардаг.

-Үлгэр дуурайлал авдаг тамирчин байдаг уу ?

               -Япон Улсын шигшээ багт тоглож байсан, 159 см өндөртэй, холбон тоглогч Ёоши Такашита гэх хүний бичлэгийг ойр ойрхон үзэж, үлгэр дуурайлал авдаг даа.

-Таны хүүхэд нас хаана, хэрхэн өнгөрсөн бэ, Хосбаяр тамирчин багадаа ямархуу хүүхэд байв?

               -Миний бага  нас Багануур дүүрэгт өнгөрсөн. Би их эршүүд, хөдөлгөөнтэй, заалнаас салдаггүй хүүхэд байсан даа. Хичээлээ тараад л шууд заал руу явдаг байлаа.

-Ямар мэргэжлээр ажилладаг вэ ?

               -Би бараа, материал хангамжийн чиглэлээр ажилладаг. ШУТИС-ийг төгсөх жил “Хобби эйс” багийн эзэн Ж.Наранбаатар захирал клубтээ ажиллуулах санал тавьсан юм. 

-Тамирчин хүний чөлөөт цаг хэрхэн өнгөрдөг вэ?

               -Сүүлийн жилүүдэд чөлөөт цагаараа гэртээ амарч, олон зүйлд тархиа ажлуулахгүй байхыг л боддог болсон байна лээ.

-Мэргэжлийн тамирчин гэдэг ойлголт манай улсад ямар байдаг вэ ?

               -Манай улс сүүлийн хоёр жилийн турш мэргэжлийн тамирчин гэх нэршил рүү арай дөхөж байна. Бид ажлынхаа хажуугаар спортоо хөөдөг учир мэргэжлийн тамирчин гэж хэлэхэд хэцүү. Бусад спорт ямар байдгийг мэдэхгүй ч манайд гар бөмбөгийн спорт мэргэжлийн хэмжээнд хараахан хүрээгүй байгаа.

-Энэ спортоор хичээллэж байгаа хүүхдүүдэд зөвлөгөө өгч, туршлагаасаа хуваалцвал ?

               -Спорт чиний ажил байх ёстой. Хэрвээ хүсэж байвал тууштай байгаарай.