“Халх” продакшны продюсер, жүжигчин Э.Ууганбаярыг энэ удаагийн “Түүчээ” буландаа урьж, цөөн хором ярилцлаа.

-Сайн байна уу. “366 дахь өдөр” хэмээх шинэ уран бүтээлээ нээсэн танай хамт олонд баяр хүргэе.  Уг киноны талаар яриагаа эхлэх үү?

               -Баярлалаа. Бид энэ уран бүтээлээр дамжуулан орчлонгийн олон өнгөний зохицол нь чи бас бид гэдгийг  харуулахыг хүссэн. Мөн нийгмийн стресс, залуусын сэтгэл зүйн эрүүл мэнд, бидний санаатай бас санаандгүй нэгнээ гадуурхаж буй байдал болон хайр дурлалын үнэ цэнийн тухай өгүүлнэ. Ерөнхийдөө хүний амьдралыг олон өнцгөөс дүрүүдээрээ дамжуулан нэг дор үзүүлэхийг зорьсон.

-Хөвсгөл аймгийн Ханх суманд кино зураг авалтаа хийсэн байсан шүү дээ. Тэр талаараа яриа дэлгэвэл?

               -Далай хөлдөхийн яг өмнөхөн буюу арваннэгдүгээр сард кино зураг авалтаа хийсэн. Ханх суманд очих зам гарц хэцүү учир хүн их очоод байдаггүй. Манайхан Хөвсгөл далайг үзэхээр очоод, 10 хувийг нь үзээд л буцаад байдаг юм.  Кино бол дүрсний урлаг гэдэг шүү дээ. Тиймээс дөрвөн улирал нэг дор байгаа мэт тэр үзэсгэлэнг гаргахыг зорьж ажилласан.

              Зураг авалтын үеэр камер царцах, жүжигчид болон арын албаныхан даарах зэрэг хүндрэл гарч байсан. Мөн бид Улаанбаатар хотоос 1000 гаруй километрийн зайд дээрээс зам муутай газар байгаа учир тоног төхөөрөмж эвдэрвэл 4-5 хоног ажлаа алдана шүү дээ. Тиймээс бүгд бэлтгэлээ маш сайн хангаж очсон.  

-Цагаанаагийн дүрээр дамжуулан албино хүмүүсийн тухай кинондоо тусгаж өгсөн байсан. Энэ нь залуу уран бүтээлчдийн хүний эрхийн төлөө дуугарсан үйлдэл байх.

               - Монголд 20 гаруй албина хүмүүс байдаг. Тэднийг энгийнээр хүлээж авах хүн байхад санаатайгаар доромжилдог, сөргөөр хүлээж авдаг хүмүүс одоо ч байсаар байгаа. Гэтэл албино хүмүүс сөрөг сэтгэгдэл сонсохоос илүүтэй хүмүүс надаас битгий айгаасай, эвгүй сэтгэгдэлтэй битгий үлдээсэй гэж  хүсдэг гэж ярьдаг юм билээ. Манай кино багийнхан тэдэнд тулгардаг асуудлыг сайн судалсны үндсэн дээр Ханх сумыг байгальтай “уяж” гаргаж ирэхийг л зорьж ажилласан. Үүгээрээ тэдний төлөө бага ч болов дуугарч чадсан байх.

-Ингагийн аав, ээж хоёрын хайрын түүх болон түүний амьдрал бас нэгэн өөр өнцөг байсан шүү дээ. Тэр талаар?

               -МУГЖ О.Бат-Өлзий ахын бүтээсэн Энхбаярын дүрээр бид эр хүн хайрандаа үнэнч байж, амлалтаа хүрч чаддаг шүү гэдгийг л гаргаж ирэхийг хүссэн. Нөгөө талд түүний хайртай бүсгүй мөн л адил энэ насаа дуустал хайрандаа үнэнч хүлээж, санаж амьдарсан нь өөрөө хайрын үнэ цэн ямар гайхалтай гэдгийг харуулж байгаа юм. Харин Ингагийн дүрийн хувьд бид өөрийгөө дутуу үнэлэх, нийгэмд ийм залуу мянга мянгаараа сэтгэл зүйн эрүүл мэндээрээ хохирч байгаа гэдгийг илтгэнэ.

-Таны дүр кинонд чимэг болж өгсөн байсан. Дүрийнхээ талаар яриа дэлгээч?

               -Би хөдөө өссөн болохоор нутгийн залуугийн дүрийг бүтээхэд ойр байсан. Гэхдээ дүр бүтээсэн гэж ярихад ахдах байх, жижигхэн л хэсэг шүү дээ.

-Уран бүтээлийн яриагаа түр орхиод, хувь хүн талаас нь ярилцах уу. Таны бага нас хаана өнгөрсөн бэ?

               -Миний хүүхэд нас Хөвсгөл аймагт өнгөрсөн. Би хоёр хүүхэдтэй айлын том хүүхэд. Сурагч байхдаа сургуулийнхаа “Урлагийн наадам”, “Дэвжээ” гээд урлагийн тэмцээнүүдэд оролцдог, нийгмийн идэвхтэй, найзуудтайгаа нийлж хөлбөмбөг тоглодог байсан.  Долдугаар ангидаа “Надад жүжигчний мэргэжил тохирох юм байна. Би урлагийн л хүн болох ёстой юм байна” гэж бодож, мөрөөдөж эхэлсэн.

           Тэгээд  2021 онд СУИС-ийн театрын урлагийн сургуулийг М.Ариунжолоо багшийн удирдлага доор жүжигчин мэргэжлээр төгссөн. Одоо ямартай ч мөрөөдлийн мэргэжлээрээ найзуудтайгаа хамтран “Халх” продакшныг байгуулаад ажиллаж байна даа.

-“Халх” продакшн хэзээ байгуулагдаж байв?

               -Нэг үеийн 11 залуу нийлээд, хоёрдугаар курсийн оюутан байхдаа жижигхэн өрөө түрээслээд, камер зээлээр аваад,  ирээдүйд юу хийхээ төлөвлөөд л “Халх” продакшныг байгуулж байлаа. Оюутан байхдаа хэдэн богино хэмжээний кино хийсэн.  Тэгээд 2021 онд сургуулиа төгсөөд анхны бүрэн хэмжээний  киногоо “Gangbay” хамтлагтай “Кассета” уран сайхныг киног хийж байсан. Одоо харахад бага зэрэг алдаа харагддаг ч анхны бүтээл гэдэг утгаараа хайртай байдаг даа.

-Ярилцсанд баярлалаа.

               -Баярлалаа.