“Кассета”  киноны репперийн дүрээр үзэгчидтэй танилцсан залуу жүжигчин Т.Лхагважаргал “366 дахь өдөр” уран сайхны киногоороо үзэгчидтэй дахин уулзаж байна. Түүний тоглосон шинэ уран бүтээл өчигдөр нээлтээ хийж бүх IPTV-д тавигдсан юм.

-Танд энэ өдрийн мэнд хүргэе. “366 дахь өдөр” кино нээлтээ хийлээ шүү дээ. Сэтгэгдлээсээ хуваалцахгүй юу?

                 -Энэ өдрийн мэнд хүргэе. Хийсэн уран бүтээлээ үзэгчдэд нээх үе догдлом, гайхалтай хэрнээ айдастай мэдрэмж байдаг юм байна. Уран бүтээлчид бүгд шинэ уран бүтээл хийх бүрдээ ийм мэдрэмж авдаг байх.

-Дүрийнхээ талаар ярихгүй юу. Дүрээрээ юу өгүүлэхийг хүссэн бэ?

                -“366 дахь өдөр” кинонд МУГЖ О.Бат-Өлзий ахын залуу насны дүр дээр ажилласан. Үнэнч байдал, хүн чанар, хүнийг хайрлах тэвчээр гэсэн үнэт зүйлээ гээгээгүй амьдарч байгаа залуугийн дүрийг гаргахын хичээлээ.

-Хөвсгөл аймгийн Ханх суманд очиж удаан хугацаанд зураг авалт хийх ямар байсан бэ?

                -Хөвсгөл аймагт өвөл гэдэг утгаараа болдог юм билээ. Үзэсгэлэнтэй хэрнээ тэсгэм хүйтэнд зураг авалтаа хийх амаргүй байлаа. Өвлийн -40 хэмийн хүйтэнд кино багийнхан маань тун амжилттай ажилласан. Тухайн сценийг сайн авахын тулд  хүйтэнд ч ажиллаж байгаа хүмүүсийг харахаар илүү хурдан, сайн хийх ёстой юм байна гэсэн бодол төрдөг юм билээ. Бид нэгнээсээ эрч хүч авч ажилласан.

-Таны бодлоор тус киног үзээд хүмүүс юуг олж харах бол. Кино багийнхны зүгээс юу харуулахыг хүссэн бэ?

                - “Хүнд итгэх, мэдрэх” гэх хоёр үг хамгийн эхэнд бодогддог юм. Амьдрах, хайрлах, өөртөө итгэх итгэл гээд энэ хорвоо дээр байдаг бүх итгэлийн талаар энэ кино өгүүлэх болно. Хорвоо дээр байгаа бүхний сайхныг мэдэрвэл бүгдээс нь сайхан зүйлс, итгэлийг олж харж болно шүү дээ.

-Кассета кинонд ажиллаж байсан. Анхны дүр байсан уу. Кассета киноны талаар яривал?

                - “Халх” продакшны найзуудтайгаа хамтраад их сургуулиа төгсөөд зургаан сарын дараа анхны бүрэн хэмжээний киногоо нээж байлаа. Тухайн үед бүрэн хэмжээний киноны ард гарсан гэдэгтээ өөрсдөдөө итгэхгүй баярлаж байсан. Бидний амжилттай яваа нь үргэлж тусалж, дэмждэг, зөвлөдөг ах эгч нарын минь өгсөн итгэл. Хүмүүсийн тойроод хүрэх замыг тэднийхээ ачаар дөт замаар туулдаг. Авиа болгон Эртура студийн ах, эгч нартаа баярлалаа. Кассета бол миний ажилсан анхны эсрэг дүр.

-Яагаад жүжигчин мэргэжлийг сонгосон бэ. Юу нөлөөлсөн бол?

                -Ээж минь dvd тоглуулагчаар үзэх олон төрлийн кино, хошин шог, цувралууд үздэг байлаа. Үзсэн киногоороо хашаандаа жүжиг тавьж, гэр бүлийнхнийгээ баясгана. Манай хашаа миний тоглосон дуу хөгжмөөр тасардаггүй байсан даа. Найруулагч Ж.Сэнгэдоржийн “Бодлын хулгайч” киног үзээд кино урлагийг сонирхож эхэлсэн. Б.Амарсайхан ах шиг жүжигчин болно гээд СУИС-д элсэж байсан даа.

-Ажилласан кинонуудаас нь хамгийн сонирхолтой зураг авалт нь хэзээ, ямар киноны үеэр байсан бэ?

                -Удахгүй нээлтээ хийх уран бүтээлийн үеэр хүнд зураг авалтад олон орсон. Нээлтээ хийх үеэр нь ямар кино гэдгийг нь хүмүүс мэдэх байх.

-Залуу уран бүтээлчийн хувьд ямар жүжигчин, хувь хүн байхыг хичээдэг вэ?

                -Энэ нийгэмд бидний хийж чадах зүйл бол хүмүүсийн сэтгэлгээг өөрчлөх, зөв зам руу нь хөтлөх. Нийгэмд ямар ч үг хэлэхгүй уран бүтээл хийхгүй юмсан л гэж боддог. Бид төв талбай дээр “Албино хүний эрх” гэж бичээд гүйх бус хүмүүсийн сэтгэлгээнд нөлөөлөх бүтээл хийхийг хүссэн. Өөрсдийн чадах зүйлээрээ нийгэмд нөлөөлөхийг зорьсон.

-Ямар дүрд, ямар кинонд ажиллаж үзэхийг хүсдэг вэ?

                -Надад оногдсон дүр бүрийг сайн гаргаж, дүр бүрдээ онцлог үлдээхийг хүсдэг. Өгөгдсөн дүр, нөхцөлдөө хамгийн сайнаар жүжиглэж, тухайн дүрээр амьдран. Хүний сэтгэлд үлдэх онцтой дүрд ажиллахыг хүсдэг.

-“366 дахь өдөр” киног заавал үзэх шалгаан хэлээч гэвэл?

                -Бидэнтэй нэг ертөнцөд хамт оршин байгаа хэрнээ тэр бүр сайн мэддэггүй, ойлгодоггүй ч хамгийн үзэсгэлэнтэй төрх, нүд, үстэй төрсөн гайхалтай хүмүүсийн талаар энэхүү киногоор сайн мэддэг болно байх.

-Таны дараагийн зорилго төлөвлөгөө юу вэ?

                -Кино уран бүтээл хэрхэн бүтдэг, хийгддэгийг энэ гурван жилийн хугацаанд бага ч гэсэн ойлгож байна. Сурсан мэдсэн бүхнээ илүү сайжруулж, эрч хүчээ алдалгүй үргэлжлүүлэн сайн уран бүтээл хийхийн төлөө хичээх болно.