“Jamts International Dance Studio”-ийн бүжигчин Ц.Амин-Эрдэнэтэй ярилцлаа. Тэрбээр БНХАУ-ын Бээжин хотод зохион байгуулагдсан “Дэлхийн цом элит бүжигчин 2023” тэмцээний ганцаарчилсан болон хосын төрөлд тэргүүлж, алтан цомын эзэн болсон юм.

-Танд энэ өдрийн мэнд хүргэе. Цэнгээнт бүжгээр хэр удаан хичээллэж байгаа вэ. Анх хичээллэж эхэлсэн дурсамжаасаа хуваалцвал?

                -Сайн байна уу, би бүжгээр хичээллээд хоёр жил болж байна. Хичээллэж эхэлснээс хойш өөртөө илүү итгэлтэй болсон. Мөн бие бялдар зөв хөгждөг учраас  дуртай. Цэнгээнт бүжгийн хөдөлгөөн, ая нь таалагддаг учраас илүү сонирхож, суралцаж эхэлсэн.

-БНХАУ-ын Бээжин хотод зохион байгуулагдсан “Дэлхийн цом элит бүжигчин 2023” тэмцээнээс алтан медальтай ирсэн юм билээ. Сэтгэгдлээсээ хуваалцахгүй юу?

                - Миний оролцсон хоёр дахь том тэмцээн. Энэ тэмцээнд амжилттай оролцоод ирсэндээ сэтгэл хангалуун байна. Алтан медаль хүртсэн нь дараагийнхаа зорилгод илүү итгэлтэй хүрэхэд түлхэц болсон.

-“17th International Elite Dancer” олон улсын тэмцээнээс мөн нэгдүгээр байрт шалгарсан юм билээ. Тус тэмцээнийхээ талаар яривал?

                -“17th International Elite Dancer”  бол миний оролцсон анхны тэмцээн, сандарч бас догдолсон. Тэр үед мэдэрсэн мэдрэмжээ дахиад мэдрэхийг хамгийн хүсдэг дээ.

-“Дэлхийн цом элит бүжигчин 2023” тэмцээний хоёр төрөлд өрсөлдөх, хоёуланд нь амжилт гарах ямар байсан бэ?

                -Бүжгийн спортын төрөл бүрийг сайн эзэмшиж, амжилт гаргахыг зорьж байгаа учраас  төрөл бүрд өөрийгөө бүрэн дайчилж оролцсон. Ганцаарчилсан төрөлд өрсөлдөх нь өөрийгөө болон сурсан зүйлээ илүү харуулах боломж гэж үзээд бүх хөдөлгөөнөө эрч хүчтэй, алдаагүй, цэвэр, цэгцтэй хийхийг хичээж бүжиглэсэн. Хосын төрөлд оролцохдоо нэгнийгээ мэдэрч бүжиглэх нь чухал юм билээ. Мөн хосоор бүжиглэнэ гэдэг нь хамтрагчтайгаа ойлголцож нэг хүн шиг бүжиглэх, цаашлаад зөвхөн бүжиг ч биш бусад зүйлд хамтаар ажиллахад юуг анхаарах нь чухал вэ гэдгийг ойлгож авсан.

-Хосоороо бүжиглэхийн давуу тал нь юу байв?

                -Хосоор бүжиглэх хамгийн сайхан. Ганцаараа бүжиглэхээс илүү хостойгоо бүжиглэхээр би илүү сайн бүжиглээд байгаа юм шиг санагддаг. Миний бодлоор хосоор бүжиглэж байхдаа бие биеэ мэдэрч бүжиглэхэд анхаарах хэрэгтэй байх гэж бодож байна. Би хамтрагчтайгаа хамт бүжиглэхдээ өөртөө илүү итгэлтэй байдаг.

-Бэлтгэлээ хэрхэн хийдэг вэ?

                - Бие халаалтын дасгал хийснийхээ дараа сунгалт хийж дараагаар нь техникээ давтдаг. Чадвараа сайжруулахын тулд боломж олдох бүрд бүжиглэхийг хичээдэг дээ.

-Цэнгээнт бүжгээр хичээллэснээр хүнд ямар эерэг өөрчлөлтүүд гардаг бол?

                -Хүн илүү мэдрэмжтэй болдог юм шиг санагддаг. Бие бялдрын хувьд ч уян хатан, булчинлаг болж бас өөртөө итгэлтэй байдал нэмэгддэг.

-Хамгийн их сэтгэлд үлдсэн тэмцээн, бүжгийн үзүүлбэрийнхээ талаар ярихгүй юу?

                -Хамгийн их сэтгэлд үлдсэн тэмцээн гэвэл хамгийн анхны буюу “17th International Elite Dancer” олон улсын тэмцээн. Бүх зүйл нь анхны удаа байсан учраас их догдолж, сандарч найзуудаараа нэгнийгээ дараагийн шатанд оролцох болоход хамтдаа дэмжиж, нэгэндээ урам  өгөх нь хүртэл сайхан дурсамж үлдээсэн.

-Хэнээс хамгийн үлгэр дуурайлал авдаг вэ?

                -Би багшаасаа, клубийн найзууд, дүү нараасаа үлгэр дуурайлал авдаг. Найзууд, дүү нараасаа мэдэхгүй хөдөлгөөнөө асууж заалгана. Мэддэг зүйлээ тэдэндээ хэлж өгнө. Үргэлж нэгнийгээ гэсэн сайхан сэтгэлтэй хүмүүстэй хамт байгаа учраас илүү хичээдэг.

-Бүжиглэж байхдаа мэдэрдэг мэдрэмжүүдийнхээ талаар ярихгүй юу?

                -Бүжгийн төрөл бүрээс өөр мэдрэмж авдаг. Румба бүжгээс тайван мэдрэмж авдаг бол жайв бүжгээс баяр хөөр, жаргалтай мэдрэмж гэх мэтчилэн өөр мэдрэмжүүд мэдэрдэг. Би бүжиглэж байхдаа өөр юунаас ч мэдэрдэггүй сайхан мэдрэмжийг авдаг. Цэнгээнт бүжгээс тайвшрал, хайр сэтгэл хөдлөл мэдэрдэг учраас бүжиглэх дуртай.

-Ирээдүйд ямар мэргэжилтэй болох вэ. Дараагийнхаа зорилгоос хуваалцвал?

                - Би ирээдүйд багш шигээ сайн бүжигчин болохыг хүсдэг. Энэ бүжгийн урлаг миний амьдралын хамгийн том хэсэг. Дараагийн зорилго минь олон улсын тэмцээнд амжилттай оролцож, эх орныхоо нэрийг өндөрт өргөх байгаа.