Охидын нөхөрлөлийг харуулсан “Girls” олон ангит кино үзэгчдийн хүртээл болоод таван жилийн хугацааг ардаа үджээ. Тэгвэл бид уг киноны Ононгийн дүрийг бүтээсэн дуучин, жүжигчин Э.Ариунзаяатай цөөн хором ярилцлаа.

-Сайн байна уу. Сүүлийн үеийн сонин сайхнаас яриагаа эхлэх үү?

         -Гурван жилийн өмнө нөхөртэйгөө хамтран “UNIVAL” энтертайнментыг үүсгэн байгуулж байсан. Бидний гурав дахь дэлгэцийн уран бүтээл болох  “Улаан явар” уран сайхны киногоо 2024 оны нэгдүгээр сарын 1-нд үзэгчдийн хүртээл болгох гээд догдлоод хүлээж байна. Кино маань тулаант, инээдмийн төрлөөр хийгдсэн. Киноны гол дүрд  жүжигчин У.Цогтбаяр, О.Самданпүрэв, Б.Хулан нар ажилласан.

          Кино багийн хувьд 250 -300 гаруй хүний маш том баг бүрэлдэхүүнтэйгээр ажиллаа. Хөвсгөл, Говь-Алтай, Улаанбаатар, Эрдэнэт гэх мэт маш олон үзэсгэлэнт газруудад зураг авалтуудаа хийсэн байгаа.

-Уг киног үзсэн үзэгчид ямар мэдрэмж авах бол кино зохиолын тухай товч яриа дэлгэвэл?

                -Тулаант кино учир зураг авалтууд хүндрэлтэй байсан ч бид бүхэн даваад гарсан. Киноны нэрийн хувьд Говь-Алтай аймгийн Бигэр суманд байрлах Онцын улаан явар гэх нэртэй догшин савдагтай байгалийн үзэсгэлэнт тогтоц бүхий газрын нэрээр нэрлэсэн. Нутгийнхан нь очихоос эмээдэг тийм газар байдаг юм билээ.  Одоогоор киноны талаар өөр мэдээлэл өгөх боломжгүй байна. Ямартай ч кино маань үзэгчдийг уйдаахгүй гэдэгт итгэлтэй байна.

-“Girls” олон ангит киноны шинэ бүлэг гараад удаагүй байна. Таны анхны дүр бүтээсэн кино шүү дээ, цувралдаа эргэн ирэх ямар байв?

                -“Girls” олон ангит кино бол бидний амьдралын хамгийн гоё дурсамжуудын нэг. Одоо ч намайг хүмүүс ““Girls”-ийн Онон” гэж дууддаг. Намайг жүжигчин болгож мөрөөдлийг минь биелүүлсэн гайхалтай цуврал байсан. Энэ дүрийг бүтээснийхээ дараа өөрийгөө илүү хөгжүүлэх, урам зоригтой болсон. Тиймдээ ч энэ дүрдээ маш их хайртай. Дөрөвдүгээр бүлэгтээ эргэн тоглоход үнэхээр сайхан байлаа. Энэ дашрамд “Girls” олон ангит кинотой дөрвөн бүлгийн турш хамт байж, биднийг үргэлж дэмжиж, хайрлаж байсан үзэгчдэдээ баярлалаа гэж хэлмээр байна.

-“Миний сахилгагүй залуу” уран сайхны киноны дүрийнхээ талаар яривал?

                -Гол дүрийн хосын найзын дүрийг бүтээсэн. “Миний сахилгагүй залуу” уран сайхны кино маань эерэг  сайхан уран бүтээл болсон гэж боддог. Киноны цаг хүрэхгүй улмаас зарим гоё хэсгүүд маань хасагдсанд жаахан гонсгор байгаа./инээв/

-Дуучны мэргэжлийг хэрхэн сонгож байв. Таны ойр тойронд урлагийн хүн байдаг уу?

                -Манай гэр бүлд урлагийн хүн байхгүй ээ. Цэцэрлэгийн хүүхэд байхаасаа л дуулах, бүжиглэх дуртай байсан даа. Арван жилийн сургуулиа төгсөөд Соёл Урлагийн Их сургуульд шалгалт өгсөн ч манай Баянхонгор аймагт цөөн хуваарь ирсэн учир орж чадаагүй юм. Тэгээд “Би ямар ч байсан урлагийн хүн болно” гээд дуулаачийн ангид шалгалт өгөөд, нэгдүгээрт жагсаж орж байсан. 

-Сүүлийн жилүүдэд дуулахаас илүүтэй кино уран бүтээлд ажиллаж байна уу?

                -Удахгүй шинэ дуугаа цацахаар бэлтгэж байна. Мөн ирэх онд зургаан дуунаас бүрдсэн цомгоо гаргах төлөвлөгөөтэй байгаа.

-Монголын жүжигчдээс хэнээс нь илүү үлгэр дуурайлал авдаг вэ?

                -Алтан үеийн жүжигчдийг багаасаа л үзэж, үлгэр дуурайлал авч, тэдэн шиг болохыг мөрөөдөж өссөн дөө. Ер нь манайд чадварлаг жүжигчин олон болохоор нэр цохож чадахгүй байна аа.

-Удахгүй 2024 он гарах гэж байна. Та өөрийнхөө хамгийн дурсамжтай шинэ жилээс хуваалцаач?

                -Миний хүүхэд нас Баянхонгор аймагт өнгөрсөн. Би айлын дунд эрх охин байсан юм. Бага байхад аав минь уруулын будгаар хацраа будаад, өвлийн өвгөн болж орж ирж байсан юм. Аавыгаа алдсанаас хойш тэр өдрүүдийг л маш их санаж үгүйлж сууна даа. Ер нь хүүхэд насандаа гэр бүлтэйгээ элэг бүтэн тэмдэглэсэн шинэ жил одоо бодоход хамгийн сайхан байжээ.

-Ярилцсанд баярлалаа.

                -Баярлалаа.