К-поп сонирхогч залуусын дунд Cherry bomb хамтлагийг мэдэхгүй хүн ховор болов уу. Алдартай дуучин, хамтлагийн дуунуудаар чанартай ковер хийдэг тэд “Авьяаслаг монголчууд” шоуны шилдэг гурван оролцогчийн нэг болсон билээ. Дуулж, бүжиглэх авьяастай залуус энэ сард өөрсдийн анхны уран бүтээлээ гаргасан нь цахим хуудаснаа хандалт өндөртэй байгаа. Тус хамтлагийн үүсгэн байгуулагч, ахлагч aryanna буюу Д.Ариунзаяатай ярилцлаа.

-Хамтлаг нь “Авьяаслаг монголчууд” шоуны шилдэг оролцогчид боллоо шүү дээ. Тус шоуны аялал анх хэрхэн эхэлсэн бэ?

                -“Авьяаслаг монголчууд” шоунд хамтлагийн маань гишүүн бүр золиос, зориг, тэвчээр гаргаж оролцсон. Тун өндөр цалинтай гадаадад хамтлагаараа зургаан сарын гэрээтэй бүжиглэх санал ирсэн үетэй давхцаж “Авьяаслаг монголчууд” шоуны бүртгэл эхэлсэн. Гэрээнийхээ цалингаар хамтлагаа их зүйл сураад, уран бүтээлээ хийгээд ирье гэж бодож байсан ч өөр улсыг төлөөлж зогссоноос илүү эх орондоо үлдэж, дэлхийн хэмжээний тайзан дээр эх орноо төлөөлөн зогсож, өөрсдийн дуу хоолойгоо хүргэхийг сонгосон. Энэ сонголт маань ч зөв байж гурван сая шүүгчтэй энэ том шоуны гайхалтай авьяаслаг 2000 гаруй оролцогчидтой өрсөлдөж шилдэг гурван оролцогчийн нэг болж чадсан нь үнэхээр гайхалтай. Тус шоунд амжилттай оролцсоноос гадна бид өөрсдөдөө итгэлтэй болж, олон чадварт суралцсан. Мөн биднийг хэн бэ, хэр чансаатай хамтлаг вэ гэдгийг батлан харуулж өгсөн гайхалтай аялал байлаа.

-Хагас финалын шатанд бэртэлтэй оролцсон шүү дээ. Тухайн үед юу бодогдсон бэ?

                -Гай газар доороос гэдэг шиг л хагас финалын шатны яг өмнөх орой нь маш хүнд бэртсэн. Эхэндээ хөхөрсөн төдий гэж бодоод тэвчээд яваад байсан. Багаасаа л өвдөлтийг их юманд боддоггүй хүүхэд байсан юм. Гэтэл хөлийн өвдөлт илүү хүчтэй болоод байсан учраас гэрийнхэнтэйгээ хамт эмнэлэгт үзүүлсэн. Гэтэл “Зөөлөн эд нь бяцарч, гуяны мах тасарсан байна, 2-3 сар болж байж бүрэн эдгэрнэ. Тэр болтол хөдөлгөөнөө хорьж, хөлөө сойх хэрэгтэй. Ялангуяа эхний 14 хоног огт хөдөлгөхгүй” гэсэн огт төсөөлөөгүй хариулт ирсэн. Хэдэн сар хөлс хүчээ гаргаж бэлдсэн үзүүлбэрээ ганцхан өдрийн дотор л үзүүлэх боломжгүй болчихсон. Тийм үед уйлахаас өөр юу ч хийж чаддаггүй юм байна лээ. Продакшны зүгээс намайг сууж дуулах, эсвэл оролцохгүйгээр үзэгчдийн суудлаас үзээд өнжих сонголт өгсөн. Хамтлагийн минь гишүүд долуулаа л тайзан гарахгүй бол оролцохоо бүр больё гэж байсан. Тэгээд яг шоуны өглөө нь тайз засаад нэмж сандалтай хэсэг засаад, надад маш гоё чимэглэсэн хөлтэй микрофон бэлдчихсэн байсан. Хараад продакшны ах эгч нартаа их баярласан. Тэгээд хэд хэдэн удаа сууж дуулаад бэлдэж үзсэн. Яг тэр үед дуулж ч чадахгүй хоолой зангираад нүднээс өөрийн эрхгүй нулимс урсаад байсан. Тэгээд “Би сууж дуулж чадахгүй ээ, бүжиглэнэ” гээд зоригтой хэлсэн. Энэ үед хамтлагийн гишүүд, манай гэр бүл, продьюсерүүд аль нь ч дэмжээгүй “Энэ үзүүлбэр чиний амьдралыг шийдэх ганц зүйл биш, эрүүл мэнд хамгийн чухал, алхаж ч чадахгүй байж, дараа нь гарах эрсдэлийг л бод, хөлгүй болбол яах вэ” гээд бүгд л их хатуухан ярьж байсан. Бараг бүтэн цаг намайг ятгасны эцэст шоуны эмч “Хөлдөөгч цацлага хэрэглэж болно. Өвчин мэдрэхгүй тухайн хэсгийг түр хугацаанд хөлдөөж мэдээ алдуулна. Тамирчид тоглолтын дундуур бэртэх үедээ их хэрэглэдэг” гэж хэлсэн. Дахин ярилцаад хөлдөөгч цацлага цацуулаад тайзан дээр гарахаар болсон. Мэдээж энгийн үе шигээ бүжиглэж чадаагүй, миний хөл минийх биш юм шиг л мэдрэгдэж байсан. Гэхдээ дараа нь бичлэгээ үзэхэд тийм ч муу харагдаагүй ээ.

-Албан ёсоор анхны уран бүтээлээ гаргасан. Сэтгэгдлээсээ  хуваалцахгүй юу?

                -Өөрсдийн уран бүтээлтэй болох нь манай хамтлагийн хэдэн жилийн зорилго, мөрөөдөл байсан. Энэ ондоо багтаж гаргасандаа үнэхээр  сэтгэл өндөр байгаа. Дуу, клипээ цацаж, хүмүүст сонсгож, урмын үг их сонсож байгаа учраас бүгд баяртай байна. Одоо дараагийн дууныхаа ажилд орсон. Цаашид идэвхтэй уран бүтээлүүд гаргаж, өөрсдийн шинэ дүр төрхүүдийг дэмжигчдэдээ харуулах болно.

-Анх “Cherry Bomb” хамтлагийг хэрхэн байгуулсан юм бэ. Хамтлагтай болж хүмүүсийг хариуцаж гэдэг том үүрэг хариуцлага шүү дээ. Энэ талаар яривал ?

                -Анх ийм хол явах хамтлаг болно гэж бодоогүй. Найзуудтайгаа чөлөөт цагаа хөгжилтэй, дуртай зүйлээ хийж өнгөрүүлэх гээд л байгуулж байсан. Дөнгөж байгуулагдаад бичлэг цацтал олон хүнд хүрч, дэмждэг хүмүүстэй болж байсан учраас хобби гэдэг талаас нь биш илүү ажил хэрэг болгож ажилласан. Хамт олон, баг ахална гэдэг том хариуцлага, алсын хараа, ухаан, тэсвэр тэвчээр шаарддаг. Аль болох бусдадаа ачаа үрүүлэхгүйгээр өөрөө бүх юмаа зохицуулахыг хичээдэг. Хамтлагийн гишүүдийнхээ мөрөөдлийг биелүүлэх нь миний эрх ашгаас илүү чухал санагддаг. Би  нэлээн нухацтайгаар хамтлагтаа ханддаг шиг гишүүдээсээ тийм хандлагыг хүсдэг. Хариуцлагатай байх, биеэ зөв авч явах, цаг барихыг шаарддаг. Эвээр хэлэх үедээ хэлнэ, бас загнаж зэмлэх ч үе бий. Урлаг гэдэг маш хатуу салбар. Энэ стандартад нийцэж өөрийгөө бүрэн дайчилж чадахгүй гардаг хүүхдүүд олон бий. Өсвөр насны хүүхдүүд ихэвчлэн орж ирдэг учраас сэтгэл хөдлөлөөрөө орж ирээд шантраад гарах тохиолдол олон. Хаанаас ямар хүүхэд ирж байгааг нь хэн ч шууд хэлж чадахгүй шүү дээ. Бүгд өөр орчинд өссөн, өөр хандлагатай. Ахлагч гээд бүгдийг нь хүчээр нэг баг болгох шаардлагагүй санагддаг. Байх ёстой, хоорондоо зохицож чадах, өөрийгөө дайчилж чадах хүмүүс нь л үлдэг гэж боддог. Ер нь урлагт хэн болгон нь тэсэж үлдэх боломжгүй шүү дээ. Ахлагчийн нүдээр харахад бол хамтлаг дундын харилцаа, уур амьсгал маш таатай байдаг.

-Өмнө  “Kpop Festival” тэмцээнд оролцож байсан шүү дээ. Тус нэвтрүүлгийн талаар ярихгүй юу?

                - Хүн зөв газраа олж очвол яаж тод гялалзаж болдгийг тус хоёр шоунаас ойлгож авсан. Зохион байгуулж байгаа ажлаа сайн мэддэг, таарсан төсөв, техник технологийн чадалтай продакшн, шүүж байгаа зүйлээ ойлгодог, зохих хэмжээний мэдлэг чадвартай шүүгчид байх нь чухал юм байна лээ. Зөв хэмжээтэй тайз, хийж бүтээсэн зүйлтэй, ард түмэндээ хүлээн зөвшөөрөгдсөн, мэргэжлийн шүүгчидтэй байх хэрэгтэй. “Авьяаслаг монголчууд” бол дэлхийн хэмжээний шоу, тэр хэмжээний стандартаар явагддаг, мэргэжлийн шүүгчид болон гурван сая шүүгчтэй учраас тун ялгаатай санагдсан даа.

-Бүжгийн урлагаар хэр удаан хичээллэж байгаа вэ. Анх яагаад бүжиглэх болов?

                - Манай гэр бүлийнхэн бүгд урлагийн хүмүүс байдаг учраас багаасаа л урлагтай ойр өссөн. Хэзээнээс гэж хэлж мэдэхгүй л дуулж бүжиглэх дуртай болчихсон байсан.

-Энэ зун төв талбайн тайзан дээр тоглолт хийсэн. Онцгой тайзуудын нэг байсан байх даа?

                -Манай хамтлаг хичээвэл боломжгүй зүйл гэж байхгүй гэдгийг хүмүүст батлан харуулж, урам зориг болдог. 2022 онд XMF-дээр өөрсдийн уран бүтээлгүй хэрнээ ковер уран бүтээлээр  үндсэн артистуудын line-up-д орж байсан. Сая энэ зун төв талбайн хүндэтгэлтэй тайзан дээр өөрсдийн бие даасан тоглолтоо хийсэн. Үнэхээр итгэхэд ч хэцүү боломж, үйл явдлууд бидэнд тохиолддог.

-Ковер бүжгийн бичлэгүүдийг нь үзэхээр хувцас, нүүр будалт, орчинд их анхаарал хандуулсан байдаг. Энэ бүхнийг өөрсдөө хийж, бүтээх ямар байдаг вэ?

                - Бичлэг бүрээ маш их сэтгэл гаргаж, байж болох хамгийн төгс хувилбараар нь хийдэг. Манай хамтлаг гарч ирэхээс өмнө Монголд хийгдсэн ковер бичлэгүүд гар утсаараа, энгийн газар, дуртай хувцсаа өмсөөд хийчихсэн, хандалт ч их муу харагддаг байсан. Гадаадын олон хамтлагуудтай сошиал зах зээлд өрсөлдөж байгаа учраас, илүү чанартай хийх хэрэгтэй. Манай хамтлаг ковер бичлэг гэхгүйгээр, клипний түвшинд ажилладаг. Хөрөнгө оруулалт, төсөв байхгүй ч өөрсдөө бүх зүйлсээ болгоод чанартай бичлэг гаргаж болдгийг харуулсан. Үүнийг дагаад бусад  хамтлагууд ч бичлэгийн чанартаа анхаарч эхэлсэн нь үнэхээр бахархууштай.

-Өсвөр насны хүүхдүүдэд шантрах зүйл гардаг байх. Хамтлагийг нэгтгэдэг зүйл юу вэ?

                -Хүн бүрд шантрах үе гардаг. Гол нь зорилгоо ойлгосон хүнд шантрах тийм ч том асуудал биш. Бидний хувьд зорилгоо ойлгоод, биелүүлээд явж байгаа учраас шантарсан ч хамт олныхоо хүчээр даваад гардаг. Олон хүний хүч хөдөлмөр, олон хүүхдийн боломжийг аваад явж байгаагаа ухамсарлаад цааш явж чадах хүмүүс нь л үлддэг. Тэр хариуцлагыг ойлгож чадаагүй хүүхдүүдийг хүчээр барьж хорих шаардлагагүй гэж боддог. Хүн болгон алдартай дуучин, бүжигчин болж чадахгүй шүү дээ. Чадах зүйлээ олоод түүндээ цагаа зарцуулаад явсан нь дээр санагддаг.

-Удаан хугацааны бүжгийн бэлтгэлийн үр дүнд бүжиг бэлэн болж, хүмүүст үзүүлдэг шүү дээ. Бэлдсэн бүх зүйлсээ хүнд үзүүлэх тэр мөчид ямар мэдрэмж төрдөг вэ?

                -Үзүүлбэрээ үзүүлж байхдаа юу ч мэдэрч амждаггүй. Үзүүлбэр дуусах үед хүмүүсийн урмын үг, алга ташилтаас харин хамгийн сайхан мэдрэмж авдаг. Гэхдээ зэрэгцээд “Одоо яах билээ, дараа нь юу хийх билээ”гэж бодогдсон хоосон мэдрэмж төрдөг.

-Хүн дуртай зүйлээсээ илүү их зүйл сурч мэддэг гэдэг шүү дээ. Танд  к-поп сонссоноор ямар өөрчлөлт гарсан бэ?

                - Сонирхлоороо дамжуулж соёлд суралцах хамгийн үр дүнтэй. Бидэнд хэзээ ч бүжгийн, дууны багш гэж байгаагүй. Хамгийн их суралцаж байгаа зүйл бол мэдээж урлагийн мэдрэмж, чадварууд. Хатуу стандарт, хариуцлага, ёс суртахуун, хэл соёл гэх мэт зүйлсийг сурна гэж бодоогүй байхад л тархинд суучихсан байдаг.

-Онцгой дурсамж үлдээсэн ковер бүжиг, тайз бий юү ?

                - Хамгийн онцгой нь гэвэл “Авьяаслаг монголчууд” шоуны эхний шатны тайз байсан. Дэмжигчдийн дуу хоолой, шүүгчдийн сэтгэгдэл, сандрал гээд бүх зүйлс хамгийн тод дурсамж үлдээсэн.

-Хамтлагийнхандаа хандаж хэлэхийг хүсдэг үг бий юү?

                -Үнэхээр хайртай, хүндэлдэг хүмүүс. Үнэнийг хэлэхэд энэ хүүхдүүдийг ийм хол явж, өдий зэрэгт хүртэл хөгжинө гэж бодоогүй ээ. Яаж бүжиглэх учраа ч мэдэхгүй орж ирж байсан хүүхдүүд одоо дуулангаа бүжиглэх хэмжээнд хүрсэн байгааг нь хараад гишүүдээрээ бахархаж байгаа.

-Таны болон хамтлагийнх нь дараагийн зорилго юу байгаа вэ?

                - Хамтлагаараа тун холыг зорьж, мөрөөдөж  байгаа. Чанартай уран бүтээлүүд гаргаж, өөрсдийн гэсэн үнэнч сонсогчидтой болно. Мэдээж дэлхийн зах зээлд хүч үзэж, өөрсдийгөө сорино. Үргэлж хэлдэг шигээ дэлхий нийтэд Монгол дуу хөгжим, хэл соёлыг сурталчилж, гадаад хүмүүс Монгол хэл дээр бидний дууг дагаж дуулдаг болох өдрийг хүсэж байгаа. “Cherry Bomb” хамтлаг дэлхийд Монголын нэрийг цуурайтуулахын төлөө бүх хөлс хүч, өөрт байгаа авьяас чадвараа бүрэн дайчилна.

-Ярилцлага өгсөн танд баярлалаа.

                -Баярлалаа. Ярилцлагыг маань уншсан хүн бүхэнд аз жаргал, сайн сайхан бүхнийг хүсэж байна.