Лос Анжелис хотноо зохион байгуулагдсан “Miss Asia USA 2023” тэмцээнд Монгол Улсаа төлөөлөн оролцож “Miss Asia USA California” болон “Delegate of the Year” шагналын эзэн болж титэм зүүсэн загвар өмсөгч О.Мэндсайхантай ярилцлаа.

-“Miss Asia USA 2023” тэмцээнд Монгол Улсаа төлөөлөн оролцлоо шүү дээ. Титэм зүүх үеийн мэдрэмжээсээ хуваалцвал?

                -Би АНУ-ын Лос Анжелис хотод есөн жил амьдарсан. Жүжигчин, загвар өмсөгчөөр ажиллах их хүсэлтэй. Мөрөөдөлөө биелүүлэхийн тулд олон загварын шалгаруулалтад орсон. Ажлынхаа хажуугаар мөрөөдлөө орхигдуулахгүйг хичээсэн. Хэд хэдэн агентлагийн загварын шоунд орж байсан. Өнгөрсөн жилээс  “Miss Asia USA California 2024” тэмцээнд оролцохоор бэлдэж эхэлсэн. Анх удаа гоо бүсгүй шалгаруулах тэмцээнд оролцлоо. Тэмцээн маань урт хугацаанд олон төрлийн шалгууртайгаар боллоо. Нийт 48 гоо бүсгүйтэй өрсөлдөж “Miss Asia USA California” болон “Delegate of the Year” шагналыг хүртэж, титмийг эзэн болсондоо баяртай байна.

-Монгол Улсынхаа нэрийг дуудуулах мөчид юу мэдэрсэн бэ?

                -Хамгийн онцлох гоо бүсгүйгээр шалгарсандаа баяртай байна. Хэзээ ч авна гэж төсөөлөөгүй байсан учраас эх орныхоо нэрийг дуудуулан шагнал авсан даа их баяртай байгаа.

-Өмнө гоо бүсгүй шалгаруулах тэмцээнд оролцож байв уу. Энэ талаараа яривал?

                -Гоо бүсгүй шалгаруулах тэмцээнд анх удаа оролцоод төсөөлөөгүй их амжилт гаргасандаа баяртай байна. Загварын тайзан дээр өмнө гарч байсан. Гадаад төрх минь хурц, зоригтой төрх гаргахад илүү тохирдог. Энэ жил өөртөө тавьсан зорилгоо биелүүлж, гоо бүсгүйн тэмцээндээ оролцож чадлаа. Энэ төрлийн тэмцээнд оролцсоноор өөрт байгаа бүх чадвараа нээж, өөртөө итгэлтэй болдог юм байна.

-Лос Анжелес хотод  амьдардаг монголчууд ирж дэмжсэн гэж байсан?

                -Би Лос Анжелес хотод амьдардаг монголчуудын ашгийн бус байгууллагын нарийн бичгийн даргаар ажилладаг юм. Монголчууддаа түүх соёлыг нь түгээхээс гадна уламжлалт баяруудаа хамтдаа тэмдэглэдэг. Энэ жил тус тэмцээнийг үзэж, биднийг дэмжихийн тулд олон хүн ирсэн. Тэднийхээ өмнө “Mongolia” гэж дуудуулж, тайзан дээр “Сайн байна уу” гэж мэндлэх гайхалтай байлаа. Төрийн далбаагаа намируулаад биднийг дэмжиж байгааг харах гайхалтай байсан.

-Багаасаа  загвар өмсөгч, мисс болно гэж боддог байв уу?

                -Багаасаа урлагийн хүн болно гэж боддог байсан. Дэлгэцээр гардаг жүжигчин болохыг их хүсдэг байлаа. Загвар өмсөж байгаа минь цаашид жүжигчин болохдоо өөрийгөө бэлдэж байгаа нэгэн зүйл минь юм. Хэдий өөр мэргэжил эзэмшсэн ч мөрөөдлөө биелүүлнэ. Хүмүүс өндөр нуруу, Монгол төрхийг минь их онцгой гэдэг. Загвар зохион бүтээгчид намайг хараад “Хаанаас ирсэн бэ” гэж их асуудаг. Тэр бүрд нь “Би Монголоос ирсэн загвар өмсөгч” гэж хэлэх дуртай.

-Хамгийн анх тайзан дээр алхаж байх үеийн дурсамжаас хуваалцахгүй юу?               

                -Монголд байхдаа анх зураг авалтад орж байлаа. Тэр үед эмэгтэйчүүдийн эмнэлэгт касс, угтах ажил хийдэг байсан юм. Эмнэлэг маань 120 гаруй эмэгтэй ажилтантай. Эмнэлгийг маань сурталчлах, реклам хийх багийнхны сонголтоор нүүр царайгаар нь тодорч байлаа. Лос Анжелес хотын нэр хүндтэй загварын шоуны тайзан дээр алдартай загвар зохион бүтээгчийн даашинзыг өмсөөд анх удаа загварын алхаагаа хийж байсан.

-Эмэгтэйчүүд бид өөрсдийгөө бусад бүсгүйчүүдтэйгээ жиших, харьцуулах үе гардаг. Таны хувьд охид ямар үед өөрийгөө бусадтай харьцуулдаг гэж боддог вэ?

                -Багадаа ийм асуудалтай их тулгардаг байлаа. Миний хувьд өөрийнхөө онцгой, сэтгэл татам байдлыг мэдэхгүй учраас өөрийгөө бусадтай харьцуулдаг гэж боддог. Эмэгтэй хүн бүр өөрийн гэсэн гоо үзэсгэлэнтэй. Хүн бүрийн онцгой зүйлс өөр. Хэзээ ч төгс үзэсгэлэнтэй эмэгтэй байхгүй байх. Гоо үзэсгэлэн гэдэг үгийг стандарттай болгож, хайрцаглаж болохгүй. Гоо бүсгүй шалгаруулах тэмцээнд гоо үзэсгэлэнгээс гадна ухаан, авьяас, өөртөө итгэлтэй байгаагаас нь шалтгаалж шалгаруулдаг . Хэзээ ч битгий өөрийгөө хэн нэгэнтэй жишээрэй. Энэ тэмцээнд ороод надад маш их нөөц боломж байгааг мэдэрсэн. Эмэгтэй хүн өөртөө итгэлтэй байх үед ямар их энерги гардгийг мэдсэн. Хүн бүрд “Үргэлж өөрийнхөө мөрөөдлийн төлөө алхаарай” гэж хэлмээр байна.