Охидын нөхөрлөлийг харуулсан “Girls” олон ангит кино үзэгчдийн хүртээл болоод таван жилийн хугацааг ардаа үджээ. Энэ хугацаанд дөрвөн бүлэг гаргаж, тасралтгүй гарсан анхны цуврал болж чадсан билээ. Тэгвэл бид уг киноны Мишээлийн дүрийг бүтээсэн жүжигчин Б.Сэтгэлтүвшинтэй цөөн хором ярилцлаа.

                Тэрбээр “Girls” олон ангит кино түүний “Анхны кино болохоор хамгийн их хайртай. Мөн дүрээрээ дамжуулан охидод урам зориг өгөхийг хүсдэг талаараа ярьсан билээ.

-Сайн байна уу. “Girls” олон ангит киноны шинэ бүлэг гараад удаагүй байна. Уг киноны талаар яриагаа эхлэх үү?

                -Анхны бүхэн хүний сэтгэлд нандин байдаг шүү дээ. Тийм дээ ч Мишээлийн дүрдээ хамгийн их хайртай. “Girls” олон ангит кино маань хөнгөхөн, хөгжилтэй, эерэг маш сайхан уран бүтээл бид үүгээрээ дамжуулан охид зориг өгсөн байх гэж боддог .

-Таны хүүхэд нас хэрхэн өнгөрсөн бэ?

              -Би хүүхэд байхдаа даруухан байгаа үгүй нь мэдэгдэхгүй чимээгүй л байж байдаг байлаа. Харин өсвөр насандаа хүн дуурайх, жүжиглэх дуртай болж, хошин шогийн мэдрэмжтэй болж өөрийгөө нээж эхэлсэн. Сургуулийнхаа урлагийн наадамд гоцлол дуу, бүжгээр оролцож, шагнал авахгүй байж үзээгүй л арван жилээ төгсөж байсан.

             Аав, ээжийнхээ жүжигчин найзуудтай хамт хөдөө явж, тоглолтод нь дагаж явдаг байсан нь нөлөөлсөн байх.Тэднийг дэргэдээс нь хараад, яг л тэдэн шиг жүжигчин болно доо гэж мөрөөддөг байлаа. Толинд харж, жүжиглэлтийн бэлтгэл хийж, өөрийгөө алдартай жүжигчин болсон мэтээр төсөөлөх дуртай байсан.

-Аав, ээж нь “Урлагийн болно” гэхэд нь яаж хүлээж авч байв?

       -Манай гэр бүлийнхэн их диктатуртай, хүмүүжилтэй, хөдөлмөрч хүмүүс байдаг.  Тиймдээ зөвшөөрөхгүй байх гэж боддог байлаа.   Харин  аав, ээж маань их уриалгахан хүлээж аваад, “Тийм ээ, чи угаасаа урлагийн хүн болохоор төрсөн хүн” гэж хэлж байсан.  Тэгээд “Хошин урлагийн жүжигчин л болно” гэх мөрөөдөлтэй хүн СУИС-д элсэж байлаа. Тэгээд сураад ирсэн надад кино урлаг эсвэл  театр л тохирох юм байна гэдгийг мэдэрсэн.  

-Та ихэнхдээ эсрэг дүр дээр ажилладаг шүү дээ. Эсрэг дүрийг бүтээхэд хүндрэлтэй зүйл гарч байв уу?

                -Эсрэг дүр “мөлжүүртэй”, хийх юм ихтэй, жүжигчнээс чадвар, бүтээлч байдал маш их шаарддаг учраас надад маш их таалагддаг.  Аливаа кинонд эсрэг дүр  байж гэмээнэ гол дүр тодорч, илүү сонирхолтой болж өгдөг шүү дээ. 

-Та урлагаас өөр чиглэлээр ажиллаж байна уу?

                -Мэдээж жүжигчний мэргэжлээ мөрөөдөж, чин сэтгэлээсээ хүсэж сонгосон болохоор мэргэжилдээ “шатаж”, чин сэтгэлээсээ ажилдаг. Үүнийхээ хажуугаар онгоцны үйлчлэгчээр ажиллаж байгаа.  Залуу хүн зүгээр суугаад, залхуураад хэвтэж байж болохгүй шүү дээ.  Жинхэнэ “гал барын аманд гараа хийхээс буцахгүй” гэдэг шиг л эрч хүчтэй, хөдөлмөрч амьдрахыг хичээдэг. 

-Яагаад онгоцны үйлчлэгчийн мэргэжлийг сонгосон юм бол?

                -Урлагийн сургуульд сурч мэдсэн зүйлс маань энэ мэргэжлээр ажиллахад, дөхөм болгож өгсөн. Анх харагдах байдалд нь дурлаж сонгож байлаа.  Онгоцны нисгэгчид болон ажилчид зэрэг алхахыг харах сүртэй, цэмбэгэр үнэхээр гоё харагддаг шүү дээ.  Тэгээд “Би яагаад чадахгүй” гэж бодоод, өөрийгөө сорьж үзэхээр сонгон шалгаруулалтад ороод, тэнцэж байлаа.

                Яг ажиллаад ирсэн миний бодож байснаас тэс ондоо байсан. Зүгээр хөөрхөн болоод, зорчигчдод хоол, цайгаар хүргэж өгөх гэж л ойлгодог байж. Гэтэл түүний цаана асар их хөдөлмөр, тэсвэр тэвчээр байдгийг биеэрээ мэдэрсэн.

-Та урлагийн салбарт  ажиллахыг зорьж буй дүү нартаа юу гэж зөвлөх вэ?

                -Мэргэжилдээ дурлаж, “шатаж” ажилладаг, бүтээж буй дүрээрээ “өвчилдөг” байгаарай л гэж хэлмээр байна.