Танхил бол мөрөөдлөөрөө жигүүр хийсэн, ирээдүйгээ хамгийн гэгээлгээр ярьдаг охин. “Алдартай жүжигчин болоод та хоёрыгоо ядраахгүй ээ” гэж ярьдаг ухаантай охин. Тэр бас чанга, хатуу байж чадна. Өөрийн нууцаа хамгаалахын тулд хэн нэгийг сүрдүүлж эсвэл аргадаж чадна. Найзуудыгаа өмгөөлж, хэнд ч хэлээгүй нандин нууцаа тэдэнтэй хуваалцаж тэр сайн найз байж чадна. Гэхдээ тэр сэтгэл эмзэглэм түүхтэй гэр бүлийн эзэгтэй болж мэдэх эмзэг дүр. Энэ бүсгүй бол “Бид нэг гэр бүл” олон ангит киноны гол дүрийн сайн найз Танхил. Тус дүрд та бидний сайн мэдэх “Тэгри Чину” киноны Боорончиг, “Тархи баригч” киноны Намууны дүрд ажилласан залуу жүжигчин З.Аминсанаа ажилласан. Түүнтэй ярилцсанаа танд хүргэж байна.

-“Бид нэг гэр бүл”олон ангит кино үзэгчдийн хүртээл болсоор байна. Тус кинонд ажилласан сэтгэгдлээсээ хуваалцахгүй юу?

                      -“Бид нэг гэр бүл” олон ангит уран сайхны кино Боловсрол телевиз, "Хүлэгү пикчирс"-ын дэлгэцийн 12 дахь олон ангит кино юм билээ. Бага байхаасаа л Боловсрол телевизийн олон ангит киног үзэж өссөн миний хувьд “Бид нэг гэр бүл” олон ангит киноныхоо Танхилын дүрд ажиллах сайхан байлаа. Киноныхоо зохиолыг уншаад шууд саналыг нь хүлээж авсан.  Танхилын дүр өнөөгийн нийгэмд хамгийн их үзэгддэг дүр. Ажиллахад урамтай, дурлаж ажилласан дүр минь байлаа.

-Таны анхны дүр “ Тэгри Чину” Боорончийн дүр байсан шүү дээ. Анх удаа кинонд ажиллах ямар байсан бэ?

                       -Гуравдугаар курсээ төгссөн зун Бэлгүтэй пикчерсээс  түүхэн олон ангит киноны дүрийн шалгаруулалт зарлахад нь оролцсон. Шалгаруулалтад тэнцэж, Бооронч гэх гол дүрийн охины дүрд тэнцэж, хамгийн анхны дүрээ авч байлаа. Сургуулиа төгсөж амжаагүй оюутан анх удаа уран бүтээлд ажиллахдаа олон сорилттой тулгарсан. Манай киноны зураг авалт бараг арван сарын турш үргэлжилсэн. Зураг авалтаараа Хөвсгөл аймгийн Хорьдол сарьдагт яг бүтэн байрлаж зураг авалт хийсэн. Байгалийн давагдашгүй хүчин зүйлүүдээс шалтгаалж зураг авалтуудад хүндрэлтэй зүйл олон тулгарсан ч манай кино групп 140 гаруй баг бүрэлдэхүүнтэй ажиллаж байсан учраас бие биеэ түшиж нэг сэтгэлээр ажиллаж, би биш бид гэдэг үгийн утгыг хамгийн анх Тэгри Чину киноны баг бүрэлдэхүүнээсээ мэдэрсэн. Хүүхэд байхаасаа л үзэж өссөн мундаг хүмүүстэйгээ хамт нэг уран бүтээлд ороход хувь хүнийхээ хувьд ч мэргэжлийнхээ хувьд ч олон зүйлийг сурч мэргэжилдээ улам дурласан хайртай уран бүтээл минь юм.

-Дараа нь “Тархи баригч” кинонд тоглосон шүү дээ. Тус киноныхоо талаар яривал?

                   -"Тархи баригч" уран сайхны кино бол манай “Update” энтертайнментын уран бүтээл. Мөн залуу уран бүтээлч миний хувьд хариуцаж хийсэн анхны уран бүтээл байсан. Тус киноны зохиол болон найруулагчийн багт ажилласан. Намууны дүрээс гадна давхар киноныхоо арын албанд ажилласан.

-Яагаад жүжигчин болохоор шийдсэн бэ. Юу нөлөөлсөн бол?

                    -Жүжигчин болох миний багын хүсэл, мөрөөдөл. Бага ангид байхад ээж маань надад “Миний охин жоохон байхдаа ээжээ би ингэж зурагтаар гардаг л хүн болмоор байна гэж хэлдэг байсан” гэсэн. Яг тэр хүсэл тэмүүлэл, зорилгоороо 10 жилээ төгсөөд СУИС-д орж байсан. Аав, ээж, гэр бүлийнхэн маань намайг анхнаасаа л маш их дэмждэг байсан болохоор итгэл дүүрэн, хайр дүүрэн л энэ мэргэжлээ сонгож суралцсандаа.

-Ажилласан кинонуудаас нь хамгийн сонирхолтой зураг авалт нь хэзээ, ямар киноны үеэр байсан бэ?

                   -Сургуулиа төгсөөд удаагүй учраас олон уран бүтээлд ороогүй ээ. “Тэгри Чину” кино маань л хамгийн сонирхолтой хүнд зураг авалтуудтай байсан санагддаг. Боорончийн дүр маань ер нь их чанга хатуу дайчин эршүүд эмэгтэйн дүр. Хамгийн сонирхолтой зураг авалт  тулааны зураг байсан. Маш олон эрэгтэй хүмүүс дунд ганцаархнаа эмэгтэй хэрнээ эр хүн шиг л шороо тоостойгоо хутгалдсан. Тэр үед тойрог хэлбэртэй гал  дотор нь тулалдах зураг авалт байсан юм. Нэлээн өндөр асаж байгаа гал дотор тулалдаж байгаа зураг авалт хийлгэх жаахан хэцүү байсан. Гэхдээ одоо ингээд бодоход хамгийн сайхан дурсамж болжээ.

-Залуу уран бүтээлчийн хувьд ямар жүжигчин, хувь хүн байхыг хичээдэг вэ?

                     -Би уран бүтээлийн багт орж ажиллахдаа бусдадаа хүндрэл учруулдаггүй хариуцлагатай, багийнхандаа дэмтэй байхыг эрхэмлэдэг.

-"Бид нэг нэр бүл" киноны дүрийнхээ талаар ярихгүй. Энэ дүр дээр ажиллахдаа юу дээр хамгийн их анхаарав?

               -Өмнө нь ажилласан дүрүүдээс Танхилын дүр огт өөр байсан. Гэхдээ ажиллахад бол хүндрэлтэй байгаагүй ээ. Найруулагч Б.Жаргалсайхан ахтайгаа ярилцаад дүр дээрээ ажилласан. Би Танхилын дүрээс олон зүйл сурсан. Олон сэтгэл зүйн хувирлуудтай, мэдрэмж өндөртэй тэсвэр тэвчээр хатуужилтай охины дүр дээр ажиллахад хувь хүнийхээ хувьд болон мэргэжилдээ ч дахин дахин суралцсан дүр байлаа.  Амьдралтай их ойрхон дүр учраас үнэн байхыг л хичээсэн дээ.

-Ямар дүрд, ямар кинонд ажиллаж үзэхийг хүсдэг вэ?

                 -Түүхэнд тод мөр үлдээсэн хүний амьдралаас сэдэвлэгдэн хийсэн баримтат болон түүхэн кинонд ажиллаж үзэхийг л хамгийн их хүсдэг дээ.

-Та ямар үед өөртөө хамгийн итгэлтэй байдаг вэ?

                 -Би ямар ч ажлыг маш төлөвлөгөөтэй хийхийг хичээдэг. Ажлаа төлөвлөсөн байхдаа л өөртөө итгэлтэй байдаг даа.

-“Бид нэг гэр бүл” киног заавал үзэх шалтгаан хэлээч гэвэл та юу гэж хэлэх вэ. Үзэгчид тухайн киноноос юуг ойлгох бол?

                 -Гэр бүлийн халуун дулаан уур амьсгал, найз нөхдийн үнэ цэний тухай өгүүлсэн эерэг сэдэвтэй кино байгаа. Бид одоо маш стресстэй нийгэмд амьдарч байна. Сүүлийн үед гарч байгаа ихэнх кино нийгмээ дагаад ч юм уу их л стресстэй хүнд жанрын кинонууд байх болсон. Харин манай кино маш эерэг сэдэвтэй Монголд аавуудыгаа хайрласан, сайн аавуудын кино ховор байдаг шүү дээ. Бид энэ киногоороо аавуудыгаа хайрлаж, алдаршуулна. “Бид нэг гэр бүл” кино маань маш олон гэр бүлүүдийн амьдралыг харуулах болохоор үзэгч та бүхнийг заавал үзээсэй гэж хүсэж байна.

-Таны дараагийн зорилго төлөвлөгөө юу вэ?

                -Одоо дараагийн кинондоо ороод ажиллаж байна. Өмнө нь ажилласан дүрүүдээс анх удаа эсрэг дүр дээр ажиллаж байгаа болохоор их хичээж байгаа. Хайрлаж сонгосон мэргэжилдээ эзэн байж илүү их суралцахаар зорилго тавин ажиллаж байна.

-Ярилцлага өгсөн танд баярлалаа.

                -Баярлалаа.