Бид энэ удаагийн “Залуус” буландаа энэ цагийн түүчээ  уран бүтээлчдийн нэг болох Ургамалын Билэгт-Одыг урьж, ярилцлаа.

                Тэрбээр СУИС-ийг 2016 онд Төрийн шагналт, УДЭТ-ын ерөнхий найруулагч Н.Наранбаатар, найруулагч Ц.Батнайрамдал нарын удирдлага дор хөгжимт театрын жүжигчин мэргэжлээр төгсчээ. У.Билэгт-Од урлагийн гэр бүлд өсөж, багаасаа дуулах, бүжиглэх, гитар тоглох авьяастай байж. Харин тэрбээр саяхан жүжигчин  Э.Төрбаттай хамтран “Хамаагүй” гэх уран бүтээл гаргасан билээ.  

Бид түүнтэй шинэ уран бүтээлийнх нь талаар ярилцлаа.

-Сайн байна уу. Сүүлийн үеийн сонин сайхнаас яриагаа эхлэх үү?

                -Кино урлагийн салбартаа ажиллахын хажуугаар багын мөрөөдлөө биелүүлж дуу хийж байгаа.  Энэ цаг чадварлаг залуу уран бүтээлчдийн нэг болох Э.Төрбат найзтайгаа хамтран “Хамаагүй” гэх нэртэй хоёр дахь уран бүтээлээ гаргалаа. Бид хоёр өмнө жилээс хойш ярилцаж, кино уран бүтээл гэж явсаар одоо л дуугаа олонд түгээж байна. Юун түрүүнд  ямарваа нэгэн зүйлд баригдахгүйгээр эрх чөлөөтэй уран бүтээлээ хийх нь бидний зорилго болсон.

-Цаашдаа энэ салбарт хүч үзэх бодолтой байна уу?

                -Нэг хэв маягаар бус олон сонирхолтой уран бүтээл гаргах бодолтой байгаа.  Э.Төрбат бид хоёрт төлөвлөсөн зүйл их бий. Удахгүй дахин нэг бүтээл цацахаар бэлтгэлээ хийгээд явж байгаа. Бид хоорондоо хошигноод хоёулаа хэзээ нэг өдөр “Төв цэнгэлдэх хүрээлэн”, “UB Palace”-ийг дүүргэсэн тоглолт хийнэ ээ гэж ярьдаг.  Эр хүний замын хүзүү урт гэдэг шүү дээ. Миний хувьд өмнө нь ганцаараа “Хүсэл тэмүүлэл” гэх дуу гаргаж байсан удаатай.

-Та урлагийн гэр бүлд өссөн гэдэг байх аа?

                -Ээж, дүү хоёртойгоо хамт бусад хүүхдүүдээ ялгараад байх зүйлгүй л бага насаа өнгөрөөсөн дөө. Аав минь жүжигчин, найруулагч Ц.Ургамал, ээж минь бүжигчин. Би сахилгагүй, хичээлээс илүү урлаг, спортод дуртай байсан гэдэг. Магадгүй урлагийн хүмүүсийн хүүхэд болоод тэр байх. Ер нь миний амьдралын бүхий л цаг үе, орон зайг урлаг эзэлж ирсэн. Бага байхдаа хөлбөмбөгчин болно гэж мөрөөддөг байлаа.  Харин өсвөр насандаа дуучин, бүжигчин болохыг хүсэж эхэлсэн. Тэгээд “Хэрвээ би жүжигчин болбол энэ хоёрыг нэг дор хийж болох юм байна” гэж бодоод Соёл Урлагийн Их Сургуульд орж байлаа даа.

-Таны аав ГИТИС төгссөн цөөн хэдэн чамгүй авьяастай хүмүүсийн нэг шүү дээ. Аавынхаа талаар яриа дэлгээч?

                -Миний аав дэндүү мундаг хүн байсан. Хүүхэд, залуучуудын театрт ажиллан, сүүлд МҮОНТ-ийн “Харц” нэвтрүүлгийг хөтөлдөг байсныг ихэнх хүмүүс мэдэх биз ээ. Аавынхаа талаар илүү дэлгэрэнгүй яримааргүй байна.

-Та “Завсарлаагүй хичээл” кинонд олны дургүйцлийг хүргэсэн дүр бүтээж байсан шүү дээ. Дүрээ өмөөрч байв уу?

                -Энэ кинонд оюутан байхдаа анх гол дүрээ авч тоглож байсан. Тухайн үед жаахан байсан болоод ч тэр үү, дүрээ өмөөрөх талаар мэддэггүй байж дээ. Хүмүүс олон өнцгөөс харсан л байх.

-Уран зөгнөлт дүр тоглохыг хүсдэг гэж байсан. Яагаад заавал уран зөгнөлт юм бол, ихэнх жүжигчид түүхэн дүр гэдэг юм билээ?

                -Жүжигчин болохоор шийдсэн цагаасаа л уран зөгнөлт кинонд тоглох юм сан гэж бодож ирсэн. Өөрөө ч энэ талдаа илүү сонирхолтой. Одоо манай улсад гоё хийж чадахгүй л байна. Удахгүй мундаг хийгээд ирэх байх. Тэр үед нь цус  сорогч, зомбины дүрд тоглоно доо.  Бас сүүлийн үед музекилд тоглож үзэхийг хүсэж байгаа. Би чинь СУИС-ийг хөгжим театрын жүжигчин мэргэжлээр төгссөн шүү дээ.

-Тэгвэл өнөө цагийн жүжигчдээс хэнээс нь илүү үлгэр дуурайлал авдаг вэ?

                -Тэр л миний дуртай жүжигчин гэж хэлэх хэцүү. Манай кино урлагийн салбарт  үлгэр жишээ авч, суралцах олон жүжигчин бий. Бас үеийнхэн, дүү нар маань их мундаг чадварлаг болж байгаа нь ажиглагдаж байна.

-Их сургуулиа төгсөөд ямар нэг продакшнд харьяалагдаж байв уу?

                -Дөрөвдүгээр курсийн оюутан байхдаа “Эмоци” продакшнд  ажиллаж байсан. Тийм ч удаан хугацаанд ажлаагүй ах, эгч нараасаа их зүйл сурсан. Одоо бол хувь уран бүтээлч байхыг л хүсэж, ажиллаж явна.

-Та мэргэжлээрээ ажиллаад удаагүй ч аль хэдийнэ үзэгчдэд танигдаж, киноны гол болон туслах дүрүүдийг бүтээсэн байдаг . Одоогийн байдлаар ямар уран бүтээлүүд дээр ажилласан байна вэ?

                - “Go” студийн найруулагч Д.Галбаярын “Шуугиан таригч”, найруулагч Б.Ганболдын “Завсарлаагүй хичээл”, “Big” фильмийн найруулагч З.Батболдын “Хуримын даашинзтай бүсгүй” зэрэг 20 гаруй уран бүтээлд гол болон туслах дүрийг бүтээсэн байна.

-Манай кино зах зээл жижиг шүү дээ. Уран бүтээлчид маань үүнийг тэлэх, дэлхийд өрсөлдөхүйц түвшинд хөгжүүлэхийн тулд чармайсаар байна. Таны хувьд Монголд жинхэнэ кино урлаг хөгжихөд саад, тушаа болдог зүйл гэвэл юуг нэрлэх вэ. Ямар нөхцөл, боломж байж гэмээнэ манай кино урлаг урагшлах бололцоотой гэж хардаг вэ?

                -Хуучны хэт зарчимтай зүйлээ шинэчлэх хэрэгтэй. Мөн залуу уран бүтээлчид өөрийн гэсэн уран бүтээл хийе гэхээр санхүүгийн асуудал их тулгадаг. Гэхдээ миний хувьд кино урлагийн салбарын хөгжил ярих хэмжээнд мундаг болоогүй л байна.

-Тэгвэл та кино урлаггүйгээр амьдралаа төсөөлж чадах уу?

                -Чадалгүй яах вэ. Хүний амьдралын хамгийн чухал зүйл гэр бүл байдаг. Тэдэнгүйгээрээ бол амьдралаа төсөөлж чадахгүй, төсөөлөхийг ч хүсэхгүй байна.