“Хоосон”, “Хүслийн зааг”, “Галт уулын нулимс”,“1997” зэрэг дуунуудаараа олны танил болоод буй “HYP LABEL”-ийн залуу уран бүтээлч Tush1g буюу Б.Түшигбаатартай ярилцлаа. Тэрбээр сэтгэл судлаачаар Хүмүүнлэгийн ухааны их сургуульд сурдаг бөгөөд ном уншиж, шүлэг бичдэг байсан нь дуучин болоход нөлөөлжээ.

-Танд энэ өдрийн мэнд хүргэе. Хамгийн анхны уран бүтээлийнхээ талаар ярихгүй юү?

                -Сайн байна уу, би хамгийн анхны дуугаа 2019 онд эмээдээ зориулж хийж байсан юм. хамгийн хайртай хүн минь өөд болсон учраас дуугаа зориулж хийсэн. Түүнд хэлж чадаагүй үгнүүдээ дуу болгохыг хүссэн. “Дулаахан” гэдэг нэртэй зөвхөн гэр бүлийн хүмүүс  маань л сонсож болохоор цахим сүлжээнд байршуулж байлаа. Сэтгэл санаагаар унах шантрах гээд сэтгэлзүйн асуудлууд тулгарах үед тэр дуугаа сонсоод эмээдээ тэврүүлж байсан үедээ буцаад очсон юм шиг болдог.

-Хэзээнээс уран бүтээлч болно гэж боддог болсон бэ. Зорилгодоо хүрсэн сэтгэгдэл ямар байна?

                -Дуучин болно гэж төсөөж байгаагүй. Багадаа ном их уншдаг, шүлэг, өгүүлэг зохиодог хүүхэд байсан. Өсвөр насандаа дуу хөгжимтэй илүү нөхөрлөж эхэлсэн. Тэр үед л шүлгүүдээрээ дуу хийхийг хүссэн. Дуучин болохын тулд өдөр бүр зогсолтгүй хөдөлмөрлөж эхэлсэн.

-Уран бүтээлч, дуучин болоход юу хамгийн их нөлөөлсөн бэ?

                - Хамгийн их нөлөөлсөн зүйл гээд яг оноод хэлчих зүйл байхгүй юм байна. Энэ хугацаанд олон зүйл нөлөөлсөн. Хөгжим надад яг эм эсвэл эмчилгээ шиг санагддаг. Эрх чөлөөтэй өөрийнхөөрөө тав тухтай юу хүссэнээ хөгжмөөр илэрхийлж, хэн нэгнээс хараат бус байж болдог. Магадгүй энэ шинж чанар нь надад нөлөөлсөн байх.

-Залуу реппер, артистууд олон болсон шүү дээ. Тэднээс юугаараа онцгойрохыг хүсдэг, юу нь илүү онцгой байдаг бол?

                -Өөрийгөө бусдаас ялгарах зүйл багатай гэж бодож байна. Яагаад гэвэл над шиг шүлэг бичдэг эсвэл төстэй хоолойтой хүн дэлхийн хаа нэгтээ байх магадлал өндөр шүү дээ. Харин надаас гардаг, надаас мэдрэгддэг ганцхан мэдрэмж байдаг гэдэгт итгэдэг.

-Залуу уран бүтээлчийн хувьд ямар уран бүтээлч байхыг хүсэж, зорьдог вэ?

                -Надаас гарч байгаа аялгуу болон үгнүүд хэн нэгэнд хүрэхдээ сэтгэлд нь дутагдаж байгаа зүйлийг нөхдөг байгаасай гэж хүсдэг. Миний хийж  байгаа  дуунууд  хүмүүст хүрэхдээ тав тух, гунигаа дэвтээх  орон зай, дулаан хөнжил зөөлөн буйдан шиг нь мэдрэгдээсэй  л гэж хүсдэг дээ.

-Уран бүтээлүүдээсээ сонсогчдодоо онцолж санал болгох дуу бий юү?

                - Ер нь хийж байгаа дуу болгоноо л хүмүүст зориулж хийхийг зорьдог. Уран бүтээл бүр минь надад утга учиртай. Хэд хоногийн өмнө сонсогчдодоо хүргэсэн “Feelings” дууг маань  хүмүүс бараг л сонсож амжаагүй байгаа байх. Надад энэ уран бүтээл хөнгөн гуниг хүн байхгүй хотоор алхаж байгаа юм шиг мэдрэмж өгдөг.

-“Хүслийн зааг” дууг артист “Shuwu”-тай хамтран бүтээсэн шүү дээ. Хамтралынхаа талаар ярихгүй юу?

                -Shuwu миний хамгийн хайртай найзуудын нэг намайг хурцалж, итгэл өгдөг дасгалжуулагч шиг хүн гэх үү дээ. Амьдралд тохиолдох хэцүү үед, шантармаар мөчүүдэд миний хажууд байж өгдөг.  “Хүслийн зааг” дууны хувьд  их сонирхолтой байдлаар бүтсэн. Бид урьдчилж шүлэг бичээгүй. Хөгжмөө сонсоод мэдэрч байгаа мэдрэмжээрээ шууд дууныхаа хоолойг бичүүлсэн. Энэ дууг ярих гэхээсээ илүү хүмүүс сонсоод юуны талаар гардаг гэдгийг мэдээсэй гэж би хүсэж байна.

- Дуу хөгжим таны хувьд юу вэ?

                -Дуу хөгжим бол миний хувьд ус агаар тайван байж чадах газар.

- Амьдралаас юуг чухалчилдаг вэ?

                -Агшин бүрийг нь адал явдлаар дүүрэн байлгахыг чухалчилдаг даа.

-Дууныхаа үгийг өөрөө зохиодог шүү дээ. Дуугаараа дамжуулж юу илэрхийлэхийг зорьдог вэ?

                -Хэвшмэл болсон үгнүүдээс зайлс хийж аль болох мэдэрч байгаа зүйлээ нүдэнд харагдаж гарт баригдахаар төсөөлөхөд амраар бичихийг оролддог.

-Таны дараагийн зорилго төлөвлөгөө юу вэ?

                - “Hyp label”-ынхээ хамт олноороо шинэ дуу гаргахаар ажиллаж байна. Сэтгэл судлалаар сурдаг найзуудтайгаа хамт хөгжмийн эмчилгээний талаар судалгаа хийхийг зорьж байна.