"Ханжоу 2022" Азийн спортын наадмын  сагсан бөмбөгийн 3x3 төрөлд  хүрэл медаль хүртсэн Монгол Улсын шигшээ багийн тамирчин Л.Авирмэдийг "Түүчээ" буландаа урьж, ярилцлаа. Тэрбээр 15 насандаа NBA-ийн тоглолт үзэж, сагсан бөмбөгийн спортод дурлаж байжээ. Мөн тоглож чадахгүй болох хүртлээ талбай дээрээ гарах болно гэж ярьсан юм.

 -Сайн  байна уу. Азийн наадмаас хүрэл  медаль хүртсэнд баяр хүргэе. Тэмцээний сэтгэгдлээсээ хуваалцаач?

      -Үнэхээр сайхан тэмцээн болж өндөрлөлөө. Монголынхоо шигшээ багт багтаж, медаль хүртсэнээ их аз, хувь тавилан гэж харж байна.  Миний бодлоор манай багт илүү их амжилт гаргах нөөц боломж байсан. Бид дахиад жаахан бэлтгэл хийсэн бол медалийн өнгөө хувиргаж чадах байлаа.

-Багийнхныхаа тухай яриа дэлгээч?

                -Эхний тоглолтууд дээр бид нээх сайн гар нийлж чадахгүй байсан. Харин сүүлийн тоглолтууд дээр нэгэндээ илүү итгэж, гар нийлж чадсан даа. Миний бодлоор багийнхан минь үнэхээр сайн тоглож, ур чадвараа харуулсан. Дээр хэлсэнчлэн жаахан бэлтгэл дутлаа даа. Улсын шигшээ баг гэдэг хамгийн сайн тамирчдын нийлбэр байдаг. Залуу тамирчны хувьд чадлаараа хичээж, багийнхнаасаа их зүйл сурсан даа.

-3X3 бусад төрлөөс юугаараа онцлог байдаг вэ?

            -Сагсан бөмбөгийн 3х3 төрөлд маш их хүч тэмцэл тэвчээр шалгадаг. Мөн илүү их энерги гаргаж тэмцэж чадсан нь л хождог юм шиг санагддаг.

-Таны хүүхэд нас хаана, хэрхэн өнгөрсөн бэ?

                -Би айлын бага, нэг эгчтэй. Аав минь намайг бага байхад бурхан болсон доо.  Одоо хүүгээ тэнгэрээс хараад бага ч гэсэн баярлаж байгаа байх. Хүүхэд нас минь Завхан аймагт өнгөрсөн.

-Хэзээнээс сагсан бөмбөг сонирхож эхэлсэн бэ?

                -Анх 15 насандаа NBA-ийн тоглолт үзээд, сагсан бөмбөгийн спортод дурлаж байлаа. Тэгээд 16 наснаасаа хичээллэж эхэлсэн. Анх 17 насандаа Завхан Бродерст багт  н. Мөнхбилэг багшийнхаа удирдлага дор Улсын аварга шалгаруулах тэмцээнд оролцож байлаа.

 -Бэлтгэлдээ хэрхэн анхаардаг вэ?

                -Бэлтгэлээ бүрэн хийж, амралт, уураг, витамин, хоолоо сайн тохируулахыг хичээдэг. Тэгж чадахгүй ямар ч үр дүн ахиц гарахгүй.

-Тамирчин хүнд бэртлээс хол байх л хамгийн чухал байдаг. Та бэртэж, гэмтэхээс хэрхэн сэргийлдэг вэ?

                -Би бэлтгэлийн өмнө маш сайн халаалт, сунгалт хийдэг. Мөн жижиг булчингуудаа сайн ажиллуулж, чангалж чадвал бэртлээс холуур байж чадна. Бэртэл авснаасаа хойш үүнийг өөртөө байнга сануулж, дадал болгож байна даа.

ЯЛАГДЛААСАА СУРАЛЦСАН ТАМИРЧИН Л ДАРААГИЙН ТҮВШИНД ХҮРЧ ЧАДНА.

 

-Та ямар тамирчныг дуурайж, тоглолтыг нь дурлаж үздэг вэ. Яагаад?

                -Энхбатын Дөлгөөн ахыгаа хүндэлж, тоглолт бүрийг нь үзэх дуртай.  Хамгаалалт, самбараас бөмбөг авалт сайтай, багтаа хамгийн хэрэгтэй тоглогч гэж боддог.

-Тэгвэл таны тоглолтын арга барил юу бол?

                -Хамгаалалтандаа илүүтэй анхаарч, сайн ажиллахыг хичээдэг. Би багийн системийн тоглолтод илүү тохирдог юм шиг санагддаг.

-Сагсан бөмбөгийн спорт таны амьдралыг хэрхэн өөрчилсөн бэ. Танд өөрчлөлт мэдрэгдсэн үү?

                -Сагсан бөмбөг надад багаар ажиллах чадвар, сахилга бат, зөв хүн байхыг сургасан гэж боддог.  Мөн амьдралын сайн найзуудтай минь учруулсан. Ер нь спорт хүнд гайхалтай зүйлсийг бэлэглэдэг гэж боддог доо.

-Тамирчин хүнийг ялж, ялагдаж сурах ёстой гэж ярьдаг. Харин та юу гэж боддог вэ?

                -Мэдээж ялж, ялагдаж сурах хэрэгтэй. Ялагдал хэцүү гэхдээ ялагдлаасаа суралцсан тамирчин л дараагийн түвшинд хүрч чадна.

-Сагсан бөмбөгийн спортын юунд дурладаг вэ. Спортоо орхиж чадах уу?

                    -Бөмбөг агаарт эргэлдээд орох агшин хамгийн сайхан. Ер нь тоглож чадахаа болих хүртлээ талбай дээр зогсож, бэлтгэлээ хийнэ гэж боддог доо.

-Ярилцсанд баярлалаа.

                -Баярлалаа. Цаашдаа илүү олон амжилт гаргаж, сагсан бөмбөгийн спортод хайртай та бүхнийг баярлуулж явах болно оо.

                 Залуу тамирчин Л.Авирмэдийн амжилтын буухай үл тасарч, эх орныхоо нэрийг дэлхийд дуурсгана  гэдэгт итгэлтэй байна. Түүнийг илүү тод гялалзах үед уншигч тантай дахин уулзуулах баярт мөч удахгүй биз ээ.