Одоогоос таван жилийн өмнө “Girls” эхний анги үзэгчдийн хүртээл болж өсвөр насны хүүхдүүдийг байлдан дагуулж байлаа.  Харин одоо тус кино  олон шинэ дүрүүдээр бүл нэмж, илүү сонирхолтойгоор дөрөвдүгээр бүлгээ үзэгчдэд хүргэж байна.

          Бид “Girls” цувралын зохиолыг бичиж, Сарнайгийн дүрийг бүтээсэн жүжигчин Ч.Сэлэнгэтэй цөөн хором ярилцснаа хүргэж байна.  Тэрбээр Б.Отгонбат багшийн удирдлага дор СУИС-ийг төгсөж байжээ.

-Сайн байна уу. Энэ удаагийн цувралд шинэ дүрүүд нэмэгдэв үү?

                -Байнга нэг жүжигчид нь тоглоод байвал уйтгартай шүү дээ. Дөрөвдүгээр бүлэгт маань шинэ гол дүрүүд орж ирж байгаа. Мөн “Girls-1,2” бүлгийн гол дүрийг бүтээсэн Э.Ариунзаяа, С.Сэтгэлтүвшин болон миний бие цувралдаа эргэн орж байна.

-Анхны бүлгийн гол дүрүүд эргэн ирнэ гэлээ. Өнгөрсөн  хугацаанд та хэд хэр өөрчлөгдсөн байна вэ?

     -Намайг олонд таниулсан кино магадгүй “Girls” байх. Бүлгээс бүлгийн хооронд би илүү хөгжиж ирсэн байна. Таван жилийн дараа дөрөвдүгээр бүлэгтээ тоглож байхдаа бид гурав “Хэдий цаг хугацаа өнгөрсөн ч бид буцаад уулзахад яг л өмнөх шигээ гал цогтой хэвээрээ байна” гэж ярилцаж байлаа. Мөн “”Frends” цуврал шиг олон жил авч явъя” гэсэн бодол төрж байгаа. Одоогоор Монголын кино урлагт тасралтгүй дөрвөн бүлэг хийсэн олон ангит кино байдаггүй юм билээ. Тасралтгүй үргэлжилж буй төсөлдөө болон уг төслөөр дамжуулан маш сайхан хүмүүстэй учирсан байна. Киногоороо дамжуулан нэг гэр бүлд төрөөгүй ч найзалж, хамь амьдарч, жаргал зовлонгоо хуваалцаж болдог юм аа гэдгийг дүү нар маань ойлгосон  байх.

-Гуравдугаар бүлэгт одоогийн  өсвөр насны хүүхдийн үерхэл нөхөрлөлийг харуулдаг. Энэ удаагийн бүлэг маань яаж явагдах вэ?

                -Хоёр өөр насныханд зориулсан тусдаа хоёр зохиолоор хийгдсэн гэж хэлж болно. Орчин үеийн хүүхэд, залуус бүгд л гаднын хамтлаг дуучид, уран бүтээлчдийг харж тэр соёлоор хүмүүжигдэж байна. Харин бид энэ хоёр үеийг монгол ахуйн дээр л огтлолцуулах гэж хичээсэн.

-“Girls” киноны бүлэг бүр өөрийн гэсэн дуутай байдаг. Энэ удаа шинэ хамтлаг гарах уу?

                -Бидний нэг онцлог, киногоо олон нийтэд хүргэж, хоногшуулах хэлбэр нь дуу байдаг. Энэ удаад эрэгтэй хамтлаг байгуулж, хэд хэдэн дуу цацах төлөвлөгөөтэй байгаа.

-Өмнөх бүлгийн дүрүүдийг сонгох хэр хүндрэлтэй байв?

                -Гуравдугаар улирлын гол дүрийн хүүг бид их хайсан. Ерөнхий Боловсролын Сургуулиудаар найруулагчтайгаа хамт өдөржин яваад, хайгаад “Заза больё” гэж явахдаа Болдоотой таарсан. Тэгээд санал тавьхад нааштайгаар хүлээж авсан.  Яг л бидний хайж байсан хүү байсан даа.

-Хүүхдүүдтэй хамтран ажиллаж хэр байдаг вэ?

     -Найз нөхөрлөлийн  үнэ цэнийг харуулсан болохоор би энэ кинондоо хамгийн их хайртай. Дүү нартаа зөв үлгэр дуурайлал үзүүлэхийг хичээж ирлээ. Ер нь хүүхдийн сэтгэлд хүрсэн кино бүтээнэ гэдэг хүнд даалгавар юм билээ. Дүү нартаа энэ бүлгээрээ дамжуулах монгол ахуйн талаар ойлголт өгөхийг зорьж байгаа. Мөн киноны ихэнх хэсэг зуслан дээр болсон гэдгээрээ онцлог юм.  Хамт ажиллаж байгаа дүү нараа харахаар яг л “Grils-1”-ийн бид нар харагддаг.  Цаашдаа  дүү нар ямар ч мэргэжил сонгосон энэ цувралаар овоглогдоно. Магадгүй зарим нь мөрөөдлийнхөө эхний алхмыг ч хийж байж мэдэх юм.

-Дөрвөн бүлгийн турш тасралтгүй “Grils” киног үзсэн үзэгдэдээ хандаж үг хэлээч?

                -Биднийг үргэлж дэмжиж, үнэн сэтгэлээсээ хайрлаж ирсэн та бүхэндээ маш их баярлалаа. Хэрэв та нар байхгүй байсан бол цуврал маань өнөөдрийг хүртэл үргэлжлэхгүй байлаа.

-Ярилцсанд баярлалаа.

                -Баярлалаа.