“Гэгээн учрал” уран сайхны кинонд хөдөөгийн ичимхий хүү Бөхөөгийн дүрд чадварлаг тоглож, үзэгчдээс эерэг үнэлгээ авсан “Zev” фильмийн залуу жүжигчин С.Хонгорхүүтэй ярилцлаа. Тэрбээр Соёл урлагийн их сургуулийг жүжигчнээр 2021 онд төгссөн бөгөөд бидний мэдэх “Chost” “Single ladies 4” ''Снежинка'' зэрэг кинонд гол болон туслах жүжигчнээр ажилласан билээ.

-Танд энэ өдрийн мэнд хүргэе. "Zev flim"-ийн талаар ярихгүй юу залуу жүжигчдийн байгуулсан продакшн шүү дээ. Шинэ зүйл эхлүүлэх ямар байсан бэ?

                -Аливаа зүйлийг эхлүүлэхэд хэцүү болон аз жаргал мэдрүүлсэн амттай зүйлс ч олон тохионо шүү дээ. “Zev” флимийг үе тэнгийн зургаан залуу, арай ахмад, туршлагатай ах нартайгаа хамтран байгуулсан. Манай фильмийн захирал Б.Буянбат ах болон зохиолч, найруулагч Х.Чойлхагва ах болон найзуудтайгаа нэг зүгийг харж эхлүүлсэн ажил. Төдийгөөс өдий хүртэл олон зүйлийг алдаж оносон ч зорилгодоо хүрэхээр хичээж байгаа.

-"Гэгээн учрал" уран сайхны киноны талаар ярихгүй юу. Анхны ажилласан уран бүтээл нь байсан уу?

                -Миний ажилласан анхны гол дүр байсан. Б.Буянбат, Х.Чойлхагва хоёр маань нэг зун хөдөө айлын найрт очсон нь энэхүү киног хийх эхлэл болсон. Залуу уран бүтээлчдэд гараа сунгаж, тусалсан зочломтгой нутгийн ард болон байгалийн гайхалтай тогтоц тэдний сэтгэлийг татсан хэрэг л дээ. Уран бүтээл хийхэд зориулсан бүх л зүйл тэнд байсан.  Тиймээс бид залууст зориулсан хөгжилтэй, хөнгөн романс жанрын кино хийхээр эргэлт буцалтгүй шийдсэн дээ. 

-Гол дүр дээр ажилласан талаараа ярихгүй юу. Ажилласан дүр нь танаас нь хэр өөр дүр байв. Кинонд ажиллах ямар байсан бэ?

                -Анх зохиолын уншлага хийж, дүр сонгох үеэс эхлээд Бөхөөгийн дүр л биш байгаасай гэж бодсон. Учир нь надаас нэлээн өөр хүн байсан л даа. Гэхдээ нэгэнт сонгогдсон учраас “Би чадах болов уу” гэж бодохоос илүү чадахгүй байсан ч хичээгээд дүрээ сайн гаргахыг л хичээж, болгоно гэсэн сэтгэхүйгээр ажилласан даа. Киноныхоо зураг авалтыг хөдөө хийсэн учраас нэг талаараа амралт шиг л санагдсан.

-Өнгөрсөн онд нээлтээ хийсэн ''Снежинка'' уран сайхны киноны талаар яривал гол дүр дээр ажилласан шүү дээ.Тус киноны онцлог нь юу байсан бэ?

                -Өвөл хийгдсэн учраас үзэхэд л сэрүүцүүлэх кино юм болов уу. Бид аль болох гэгээлэг кино хийхийг мөн үзэгчдийг бага насаар нь аялуулахыг зорьж, хичээж бүтээсэн. Манай найруулагчийн баг сайн ажиллаж, гоё шийдлүүдийг олсон, гаргасан гэж боддог.

-Жүжигчнээс гадна “Гэгээн учрал” кинонд стилист хийсэн юм билээ. Жүжигчнээс өөр ажил хийх ямар байсан бэ ?

                -Тухайн үед бид байгуулагдаад удаагүй хүн хүч багатай байсан л даа. Тиймээс бүгд л давхар  үүрэг хүлээсэн. Миний хувьд стилистээр ажиллах ёстой болсон. Хэт чамин хээнцэр биш өдөр тутамдаа өмсөх, энгийн загваруудыг сонгосон. Мөн харилцан тоглож байгаа жүжигчнийхээ өмсөж байгаа хувцастай зохицох хувцсыг сонгохыг хичээсэн. Давхар үүрэг хүлээх тийм ч хэцүү байгаагүй ээ.

-Яагаад жүжигчин уран бүтээлч болохоор шийдсэн бэ. Юу нөлөөлсөн бэ?

                -Би багадаа сансрын нисгэгч болно гэж боддог байлаа. Сансарын нисгэгчийн тухай кино үзсээр байгаад кино урлагт татагдаж, жүжигчин болохоор шийдсэн. Аав, ээждээ хошин шог дуурайж тоглож өгдөг байлаа.Тэр бүр нь жүжигчин болох хүслийг минь илүү өдөөсөн байх. Гэр бүлийнхэн миний жүжигчин болох сонголтыг сайн дэмжсэн.

-Шинэ уран бүтээл дээр ажиллаж байгаа болов уу. Энэ талаар төлөвлөсөн зүйл бий юү?

                -Бид саяхан шинэ уран бүтээлийнхээ зураг авалтыг хийж дууссан. Эвлүүлгийнхээ ажилд идэвхтэйгээр орсон байгаа. Олон хүний хүч хөдөлмөрийн шимээр хийгдэж байгаа бүтээл. Шинэ содон зураг авалт болон зохиолч, зураачийн багийн маань хэр сайн ажилласныг тус уран бүтээлээс үзэх боломжтой.

-Үлгэр дуурайлал авдаг уран бүтээлч бий юу?

                -Жүжигчин Брэд Питтээс үлгэр дуурайлал авдаг. Түүний тоглосон бүх киног заавал үздэг.

-Оролцсон зураг авалтууд дундаас нь таны хувьд хамгийн сонирхолтой байсан зураг авалт ямар уран бүтээлийнх вэ. Юу нь сонирхолтой байсан юм бэ?

                -Шинэ уран бүтээл дээр маань буугаар бууддаг хэсэг олон гардаг. Буудаж үзэх их сонирхолтой байлаа. Багадаа буу ашиглаж байгаа кино үзээд “Энэ үнэхээр бууддаг юм байхдаа” гээд их сониучирхдаг, шимтэж үздэг байлаа. Тиймээс үргэлж сонирхдог байсан зураг авалтаа хэрхэн хийгддэгийг мэдэх их сонирхолтой, дурсамжтай байсан.

-Ямар дүр дээр ажиллахыг хүсдэг вэ?

                -Монголд супер баатрын тухай кино, уран бүтээл байдаггүй шүү дээ. Тиймээс Монголын анхны супер баатрын дүрд ажиллахыг хүсдэг.  

-"Zev flim" ирээдүйг ямар байгаасай гэж хүсэж, зорьдог вэ?

                -Гэгээлэг ирээдүйг харж эхлүүлэн шүү дээ. Тиймээс “Zev” фильмийнхээ залуусыг зорьсон зорилго, мөрөөдөлдөө хүрээсэй гэж хүсдэг дээ.

-Ярилцлага өгсөн танд баярлалаа.

                -Баярлалаа.