"Жүжигчин болох мөрөөдөлдөө “Өндгөн сүй” кинонд тоглоод илүү итгэлтэй болсон" хэмээн ярих охиныг Б.Мишээл гэдэг. 18 настай тэрбээр Youtube хуудаснаа 82.6 мянган дагагчтай youtuber билээ. “Өндгөн сүй” киногоороо анхныхаа уран бүтээл дээр ажилласан бөгөөд багадаа бидний мэдэх “Fanta” ундааны сурталчилгаанд тоглож байсан авьяаслаг нэгэн юм.

   -Танд энэ өдрийн мэнд хүргэе. Таны тоглосон “Өндгөн сүй” уран сайхны кино нээлтээ хийснээсээ хойш үзэгчдээс эерэг үнэлгээ хүлээн авсаар байна. Энэхүү кинонд тоглох саналыг хэрхэн хүлээж авсан бэ?

                -“Өндгөн сүй” киноны хоёрдугаар найруулагч холбогдож, кинонд тоглох санал тавьсан. Кинонд тоглох  санал ирсэн талаараа гэр бүлийнхэнтэйгээ ярилцаад, өөрийгөө сорихоор шийдсэн л дээ. Жүжигчин болж, кинонд тоглохыг хүсдэг учраас саналыг нь баяртайгаар хүлээн авсан даа.

-Мэргэжлийн жүжигчин биш учраас кино уран бүтээлд тоглох ямар байсан бэ. Санаа зовоосон асуудал гарсан уу?

                - Мэргэжлийн жүжигчин биш учраас санаа зовоосон зүйлс байлаа. Үгээ бүрэн тод хэлж, бүтэн хоолойгоор ярих гэх мэтчилэн асуудал тулгарсан. Тэр бүрд  Э.Аминхүслэн эгч зөвлөгөө өгч тусалсан учраас эгчтэй болчихсон юм шиг санагдсан. Найруулагчид хэрхэн тухайн үеийн жүжиглэлтээ сэтгэлд хүртэл гаргах талаар олон зөвлөгөө өгсөн. Кино урлагт дуртай учраас оройн цагаар зураг авалт хийгдэх үед, бие тавгүйтсэн ч цааргалалгүйгээр ажилласан.

-“Өндгөн сүй” кинонд ажилласан дүр нь Б.Мишээлээс хэр өөр ааш зантай байсан бэ?

                -Надтай огт адилгүй ааштай, амьдралын хэв маягтай хүний дүр байлаа. Айлын бага, эрх, жоохон дураараа охин дүр. Би айлын том учраас даруу, аль болох хүнтэй сайхан харьцахыг хичээдэг. Тиймээс зохиолынхоо  “Яах гээд дагаад байгаа юм”, “Чи одоо яв, би хичээлээ хиймээр байна” гэх үгнүүдийг хэлэх жаахан хэцүү байсан.

-Анхны тоглосон киногоо үзэх ямар байсан бэ. Жүжиглэж байгаа өөрийгөө хараад юу бодогдсон бэ?

                - Киноныхоо ерөнхий зохиолыг мэдэж байсан ч уран бүтээл бэлэн болсны дараа үзээд ямар утга учиртайг нь ойлгосон. Дэлгэцээр өөрийгөө харж байсан учраас эвгүй санагдаж, цочирдоогүй ээ. Гэхдээ утсаараа бичсэн влог, мэргэжлийн камераар бичсэн кино тэс өөр санагдсан. Өөрийгөө харахаар ичдэг ч кинон дээрээ ер нь бодсоноос хамаагүй илүү гоё гарсан байна лээ.

-Багадаа сурталчилгаанд тоглож байсан юм билээ. Жүжигчин, моделийн чиглэлээр ажиллана гэж боддог байв уу?

                - Үеэл эгчийн санал болгосон сурталчилгаанд тоглож байлаа. Тухайн үед жүжигчин болно гэж боддог байсан учир саналыг нь баяртайгаар хүлээн авсан.

-Одоо тэр сурталчилгаагаа үзэхээр ямар мэдрэмж төрдөг вэ. Найзууд нь чамайг гэж таньдаг уу?

                -Одоо үзээд тэр үед их бондгор хүүхэд байжээ гэж бодогддог. Найзууд  бол намайг хэлэхээс нааш мэддэггүй юм. Намайг гэж мэдсэнийхээ дараа үзчихээд “Мишээлээ яаж турсан нууцаа хэлчих л дээ” гэдэг.

-Хэзээнээс Youtube хуудас хөдөлдөг болсон бэ. Хөтөлж эхлэхэд юу нөлөөлөв?

                -Нэг жилийн өмнөөс youtube хуудас хөтөлдөг болсон. Өдөр тутмын амьдралд тохиолддог сонирхолтой үйл явдлынхаа талаар хуваалцдаг. Youtube хуудас хөтлөх талаар боддог байсан ч зориглон эхлүүлж чаддаггүй байлаа.

-Youtube хуудас хөтөлдөг болсноор танд эерэг өөрчлөлтүүд гарсан уу?

                - Youtube хуудас хөтөлдөггүй байсан бол кинонд тоглох санал ирэхгүй байсан болов уу. Намайг тодорхойлох нэг зүйл учраас дүрс бичлэг хийх бүрдээ баяртай байдаг.

- Цахим хуудсанд сөрөг сэтгэгдэл үлдээж, хүмүүсийг шүүмжлэх нь ихэссэн шүү дээ. Өсвөр насны хүүхдийн хувьд тэр бүрдээс сэтгэлзүйгээ хэрхэн хамгаалдаг вэ?

                -Сөрөг сэтгэгдэл ирэх үе бий. Тэр бүгдийг хүндээр тусгаж авдаггүй ээ. Youtube хуудас хөтөлж эхлэхээсээ өмнө энэ тал дээр бэлтгэлтэй байсан. Үүнийг гэр бүлийнхэн ч сануулж, хэлсэн учраас сүртэй ач холбогдол өгөөгүй.

-Өөр уран бүтээлийн санал ирвэл зөвшөөрөх үү. Кинонд тоглосны дараа жүжигчнээр сурахдаа илүү итгэлтэй болсон уу?

                -Кинонд тоглох санал ирвэл гэр бүлийнхэнтэйгээ ярилцаж шийдвэрээ гаргана. Кинонд тоглосны дараа сонгохыг хүссэн мэргэжилдээ илүү дурлаж, дуртай болсон. Жүжигчний мэргэжлийг ямар хэцүү гэдгийг мэддэг болохоор шантрах зүйл гараагүй. Ирээдүйд ч гарахгүй байх.

-Ярилцлага өгсөн танд баярлалаа.

                -Баярлалаа.