“Squadzz” студийн бүжигчин, бүжгийн багш Biggie буюу М.Болорсүхийг “Залуус” буландаа урьж ярилцлаа.

-Сайн байна уу. Өөрийгөө манай уншигчдад танилцуулаач?

      -Сайн байна уу. Намайг Мөнхтуяагийн Болорсүх гэдэг. Найзууд маань Боогий гэж дууддаг ч хүмүүс Biggie гэх нэрээр минь илүү мэдэх байх. Айлын ганц хүүхэд. 69 дүгээр сургуулийг 2017 онд төгссөн. Одоо “Squadzz” студид бүжигчин, бүжгийн багшаар ажиллаж байна. Бүжгийн урлагаар тууштай хичээллээд есөн жил болж байгаа. Бүжиглэхээс гадна дуу хийх, сагсан бөмбөг сонирхдог. Хувь хүн талаасаа яривал хэнтэй ч нээлттэй харилцдаг, их инээдэг, энгийн ч гэсэн дотроо маш их зүйл боддог төрлийн хүн л дээ. 

Миний хувьд бүжгийн урлаг зүгээр нэг хөдөлгөөн гэхээсээ илүүтэй маш гүн гүнзгий утга санаа агуулдаг, сүнслэг зүйл л дээ.

-Багаасаа бүжиглэх дуртай байсан уу. Яагаад бүжигчин болсон юм бэ?

    -Манай аав, ээж хоёр маш сайхан бүжиглэдэг хүмүүс байдаг. Энэ нь надад өвлөгдөж, бага байхаас намайг хөглөсөн гэж боддог. Цэцэрлэгт байхаасаа бүжиглэсэн дээ. Гудамжны бүжгийн стилиэр бол 2014 оноос бүжиглэж байна. Хүмүүс бүжгийг  зүгээр л нэг хөдөлгөөн гэж хардаг бол би бүжгийн урлагаар дамжуулан зөв амьдралын хэв маяг, хүнтэй зөв харилцах, орчноо мэдрэх, аяыг маш гүнзгий түвшинд ойлгож, сонсох зэрэг олон зүйлийг сурсан. Анх бүжгийн дугуйланд суралцаж эхлэхэд миний өмнөх хүрээллээс тэс ондоо хүмүүс хүлээж авсан. Тэдний дунд ороод “Хүн биеэ ингэж авч явах ёстой юм байна. Хамаагүй савсганаад гүйгээд байж болохгүй юм байна. Хэл, яриагаа ингэж засах хэрэгтэй юм байна” гэж өөрийгөө бага багаар засаж, өөрчилж эхэлсэн. Ер нь бүжгийн урлаг намайг тэр чигээр нь өөрчилсөн. Миний хувьд бүжгийн урлаг зүгээр нэг хөдөлгөөн гэхээсээ илүүтэй маш гүн гүнзгий утга санаа агуулдаг, сүнслэг зүйл л дээ. 

-Гудамжны бүжиг юугаараа онцлог юм бэ?

        -Өмнө нь би хэд хэдэн төрлийн бүжиг бүжиглэж байсан. Гэхдээ надад Гудамжны бүж­гийн соёл хамгийн их таалагдаж, яагаад ч юм намайг соронздон татдаг.  Хичээллэж, суралцах тусам илүү гүнзгийрүүлмээр мэдрэмж өгдөг. Хип хоп урлаг бол мөн л бүхэл бүтэн соёл шүү дээ. 

Бүжиглэж эхэлснээр яг яаж амьдрах ёстой утга учраа олсон

-Бүжгийн урлагаар хичээллээд олж авсан хамгийн сайхан зүйл тань юу вэ?

      -Бүжиглэж эхэлснээр яг яаж амьдрах ёстой утга учраа олсон. Хэрвээ би бүжиглээгүй байсан бол яг юу хийх учраа ойлгохгүй, стресстэй амьдрах байсан байх. Мөн зөв найз нөхөд, хүрээллийг олж авсан, тэдэнтэйгээ одоо ч хамтдаа хөгжиж, бүжиглэсээр байна. 

-Өөрийн дэглэсэн бүжгээ заал дүүрэн хүнд заах мэдрэмж ямар байдаг вэ?

       -Би өөрийгөө бүжиг сурахаас илүүтэй, бусдад  бүжиг заахдаа сайн гэж боддог.  Дэглэлтээ гаргачихаад л зааландаа очоод заах, тэр өөр амьсгалыг мэдрэх үнэхээр сайхан байдаг.  Би анхлан суралцаж буй хүүхдүүдэд суурь хөдөл­гөөнүүдийг заахаас гадна бүжиг сурах нь амьдралд ямар хэрэгтэй талаар хэлж өгдөг. Бас шавь нартайгаа маш сайн ярилцахыг хичээдэг.

-Найзуудынхаа тухай яриач?

     -Хамгийн сайн найз, хамтрагчдын минь нэг болох Jason буюу Билгээгийнхээ  тухай ярья. Тэр надад хамгийн анх Гудамжны бүжгийг заасан багш минь, бас хамгийн сайн хамтрагч минь. Би түүнтэй байхад олон зүйлийг амархан мөртлөө маш сайн хийж чаддаг. Өөрөөр хэлбэл, би түүнээс зөвхөн бүжиг бус амьдралын маш олон чухал чанар, дадлыг суралцсаар л байгаа. 

-Бүжигчин хүн бүжиглэхийн тулд аяа маш сайн ойлгож, мэдэрч бүжиглэдэг шүү дээ. Тэр хэмжээгээрээ ч хөгжмийн тухай мэдлэг нь нэмэгддэг байх. Энэ нь таныг дуу хийж эхлэхэд нөлөөлсөн үү?

        -Олон жил, өдөр болгон, олон цагаар бүжиглэхээр яах аргагүй хөгжмийг маш сайн ойлгодог болдог. Би сүүлийн гурван жил trap soul стилиэр дуу хийхийг оролдоод байна. Монголд энэ урсгал төдийлөн сайн хөгжөөгүй ч би хувь нэмрээ оруулна. Би удахгүй Итали Улсад суралцахаар явна. Тэндээс сурсан зүйлсээ эргэж ирээд, эх орондоо хэрэгжүүлнэ. Ялангуяа урлагийн талаар суралцах, судлах зүйл маш их байна.