Энэ удаагийн “Түүчээ” буландаа сурагчийн ширээнээс дэлхийн ур чадварын тэмцээнд 13 дугаар байранд шалгарсан Дашдондовын Амаржаргалыг урьж, ярилцлаа

-Сайн байна уу. Эзэмшиж байгаа мэргэжлээрээ дэлхийд өрсөлдөн, амжилт үзүүлсэнд баяр хүргэе. Цахим орчинд баярын мэндчилгээ нэлээд хөвөрлөө. Таны тухайд энэ баярт үйл явдлаа хэрхэн хүлээж авсан бэ?

    -Юун түрүүнд намайг дэмжиж байгаа бүх хүмүүстээ баярлалаа гэж хэлмээр байна. Миний талаар цахим сүлжээнд олон сайхан мэдээлэл гарсныг нислэгтэй байсан болохоор сайн мэдээгүй байлаа. Нэг найз маань надад харуулахад нь мэдээд, маш их баярласан. Тийм олон хүн намайг дэмжиж, урмын үгээр урамшуулна гэж бодоогүй. Үнэндээ хоёрхон оноо илүү авсан бол медалийн болзол хангах байсан. Тиймээс тэмцээнд орсон амжилтынхаа хувьд бага зэргийн харамсалтай санагдаж байгаа. Уг нь өмнөх үеийн шагналт байр болон, медаль хүртэж байсан ах нарынхаа амжилтыг ахиулах зорилготой орсон.

-Тэмцээн нь хэд хоногийн хугацаанд үргэлжилсэн бэ. Та тэмцээний үеэр ямар бүтээл хийсэн бэ?

   -Тэмцээн дөрвөн өдөр үргэлжилсэн. Дөрвөн модуль буюу үе, шаттайгаар өрсөлдсөн. Эхний модульд нь хоолой хавтан, хоёрдугаар модульд нь даралт саваа, гуравдугаар модульд хөнгөн цагаан, дөрөвдүгээр модульд нь зэвэрдэггүй ган гагнасан.

-Та тэмцээндээ хэр хугацаанд бэлдэв. Ямар үедээ илүү анхаарч, дадлага хийсэн бэ?

   -Өмнө жилийн арваннэгдүгээр сард тэмцээний маань эхний шат нь явагдсан. Нийт 10 гаруй сургуулийн хүүхдүүдтэй өрсөлдөн шалгарч, дараагийн шатандаа оролцохоор болсон. Энэ оны гуравдугаар сараас аравдугаар сар хүртэл бэлдсэн. Би хоёрдугаар модульдаа буюу даралт саваа гагнахдаа илүү анхаарч, дадлага хийсэн. Тийм болохоор энэ үедээ хамгийн өндөр оноо авсан.

-Анхны том тэмцээндээ оролцож байна уу. Тэмцээнээс юуг сурч авсан бэ?

    -Тийм ээ. Дэлхийн хэмжээний анхны том тэмцээнд оролцоод ирлээ. Би тэмцээний өмнө долдугаар сард Солонгос Улсад оролцож байгаа оролцогчидтой 14 хоног хамт бэлтгэл хийсэн. Солонгосоос оролцож буй хүүхэд зургаан жилийн хугацаанд бэлтгэгдсэн байсан болохоор түүнээс олон зүйл сурч, мэдлээ. Тэмцээний үеэр ч солонгос найз маань надад их тус болсон. Би долоон сарын хугацаанд л бэлдсэн болохоор эхний шатандаа бага зэрэг сандраад тааруу оноо авсан. Багш маань ч “Шинэ юм туршихгүйгээр дадлага дээр хийж байсан чаддаг зүйлээ хамгийн сайнаараа хийгээрэй” гэж захиж байсан.

 Хамгийн гол нь тайван байж, чадах зүйлээ хамгийн сайнаараа хичээж хийх нь чухал юм билээ

-Ойрын хугацаанд ямар тэмцээнд оролцох вэ. Дараагийн тэмцээндээ юун дээр анхаарч ажиллах вэ?

   -Ойрын хугацаанд улсын аваргын тэмцээнд оролцоно. Хэрвээ сайн оролцвол Хятад Улсад болох олон улсын тэмцээндээ бэлдэнэ. Сая оролцсон ур чадварын тэмцээндээ эхний модуль дээрээ тааруухан оноо аваад байр маань хойшилсон болохоор дараагийн тэмцээндээ шархаа нөхөж, медалийн төлөө зүтгэх болно. Цаашдаа Монголынхоо нэрийг дэлхийн тавцанд дуудуулахын тулд хамгийн сайнаараа хичээх болно.

-Анх энэ мэргэжлийн сайхан талыг мэдрэхэд тань хэн хамгийн их урам зориг өгсөн бэ. Одоо хэнээс үлгэр дуурайлал авч явдаг вэ?

      -Би 2019 онд гагнуурчин Э.Уужимсэтгэл эгчийн “Хүн өөрөө хичээвэл аливаа амжилтыг хэн ч гаргаж болно” гэдэг үгийг уншаад урам зориг, итгэл найдвар авч байсан. Тухайн үед гагнасан бүтээл нь ч их гоё харагдсан. Тэгээд л гагнуурыг сонирхож эхэлсэн. Одоо бол Герман Монголын мэргэжлийн сургалт үйлдвэрлэлийн төвийн захирал, багш Ганхуягаас их үлгэр дуурайлал авч явдаг. Багш маань намайг тэмцээнд оролцоход маш их тусалсан.

-Техник технологи хөгжсөн энэ үед залуус янз бүрийн мэргэжил эзэмших болсон. Харин өөрөө гагнуурчин гэх мэргэжлийг эзэмшээд үүгээрээ Монгол Улсынхаа нэрийг дэлхийд дурсгалаа. Чухам яагаад энэ мэргэжлийг сонгов?

   - Аав, ээжийн аль, аль талынхан маань гарын ур дүй сайтай хүмүүс байдаг л даа. Тухайлбал, аавын тал уран дархан, ээжийн талаас мужааны удамтай. Багаасаа гарын ур дүйтэй хүмүүсийн дунд хийж буй бүтээлийг нь гайхаж, биширч өссөн. Иймээс ч 13 наснаасаа мужаан ахдаа тусалж, мужааны чадвараас нь суралцаж байлаа. Тэгээд манай аавын дүү “Чи гарын ур дүй сайтай юм чинь энэ мэргэжлийг сонгож болох юм байна” гээд санал болгоход надад маш их таалагдсан. Ингээд есдүгээр ангиа төгсөөд энэ мэргэжлээрээ суралцахаар коллежид орсон.

-Гэр бүлийнхэн нь гагнуурчин мэргэжлээр явахад сайн дэмждэг байх даа?

   -Гэр бүлийнхэн маань намайг энэ мэргэжлийг сонгохоор болсон гэхэд маш их дэмжсэн. Тэр тусмаа ээж минь үргэлж намайг урамшуулж, итгэл, хүч өгдөг. Тэмцээндээ оролцчихоод урамгүйхэн ээжтэйгээ утсаар ярьсан. Гэтэл ээж минь “Миний хүү шантарч болохгүй шүү. Монголынхоо нэрийг дэлхийд гаргана гэдэг сайн хэрэг. Дараагийн тэмцээндээ илүү хичээгээрэй” гэж хэлсэн. Ээжийнхээ үгийг сонсоод л тайтгарсан даа.

-Хийж байсан хамгийн ур чадвар шаардсан зүйлээсээ хуваалцвал?

      -Тэмцээний үеэр хийсэн даралт саваа минь миний хийж байсан бүтээлүүдээс хамгийн хүч, хөдөлмөр шаардсан бүтээл байсан. Даралт саваагаа удаан хугацаанд туршиж бэлдсэн бөгөөд тэмцээнд есөн цагийн хугацаанд тасралтгүй гагнасан. Тэмцээнээс өмнө бол хичээл дээрээ төмрөөр гоёл маягаар сарнай хоёр хоног гагнаж байсан.

-Эзэмшсэн мэргэжлийнх нь үнэ цэн нь юундаа байдаг гэж боддог вэ?

   -Гагнуур бол тэвчээр, мэдрэмж маш их шаарддаг. Гагнуур хийхэд хүнд, хөнгөн бэртэл амархан авах эрсдэлтэй болохоор юун түрүүнд анхаарал шаарддаг. Гараа гагнуурын очинд түлэх нь энгийн л үзэгдэл.  Гэхдээ гагнуур хийгээд, гагнасан оёдол маань гоё болсныг харах л их  сайхан байдаг даа. Тэр мэдрэмжээс их кайф авдаг.

Гагнуурын оёдлыг миллиметрээр хэмждэг.Нэг миллиметр зөрсөн байсан ч шууд алдаанд тооцдог. Их нарийн ажиллагаатай мэргэжил гэж гэж боддог.

-Мэргэжил бүхэн сайхан гэдэг. Цаашдын зорилгоосоо хуваалцвал?

    -Уран дархан, мужааны чадвараас сурч, хөгжүүлэхийг хүсдэг. Мөн гагнуурчин мэргэжлээрээ ажиллах хүсэлтэй байна.

-Ярилцлага өгсөнд баярлалаа.

   -Баярлалаа. Энэ боломжийг ашиглан тэмцээнд орлцоход минь тусалж, дэмжсэн гэр бүл ах, эгч нартаа баярлалаа гэж хэлмээр байна. Мөн сургуулийнхаа хамт олон болон Оюу Толгой компанидаа баярлалаа.